Leviegezh 23 - Bibl Koad 21: Ar Bibl e Brezhoneg evit ar Vretoned

Pennad 23 Gouelioù an AOTROU

¹ An AOTROU a gomzas da Voizez o lavarout:

² Komz da vibien Israel ha lavar: Gouelioù an AOTROU a embannot, hag e vint kengalvoù santel. Setu, ar re-mañ eo va gouelioù:

³ Al labour a vo graet e-pad c’hwec’h devezh, met er seizhvet devezh e vo ar sabad-diskuizh, bez’ e vo ur c’hengalv santel. Ne reot labour ebet, sabad an AOTROU e vo en hoc’h holl chomlec’hioù.

⁴ Setu gouelioù an AOTROU, ar c’hengalvoù santel, a embannot en amzerioù merket.

⁵ D’ar miz kentañ, d’ar pevarzekvet deiz eus ar miz, etre an daou abardaez, e vo Pask an AOTROU.

⁶ D’ar pemzekvet deiz eus ar miz e vo gouel ar bara hep goell evit an AOTROU; debriñ a reot bara hep goell e-pad seizh devezh.

⁷ D’an deiz kentañ e vo ur c’hengalv santel, ne reot labour-mevel ebet.

⁸ Kinnig a reot d’an AOTROU, e-pad seizh devezh, profoù graet dre an tan. D’ar seizhvet deiz e vo ur c’hengalv santel, ne reot labour-mevel ebet.

⁹ An AOTROU a gomzas da Voizez o lavarout:

¹⁰ Komz da vibien Israel ha lavar: Pa viot aet er vro a roan deoc’h ha ma reot an eost enni, e tegasot d’an aberzhour ur feskenn eus frouezh kentañ hoc’h eost.

¹¹ Hejañ a raio evel ur prof ar feskenn dirak an AOTROU, evit ma vo degemeret mat; an aberzhour a hejo anezhi an deiz war-lerc’h ar sabad.

¹² Da zeiz ma hejot ar feskenn, e kinnigot un oan disi eus ur bloaz evel loskaberzh d’an AOTROU,

¹³ ha gantañ un donezon a ziv dekvedenn a flour bleud mezet gant eoul, ur prof graet dre an tan, ur c’hwezh dudius d’an AOTROU, hag un evadkinnig eus ur c’hard hin gwin.

¹⁴ Ne zebrot na bara na tañvouezennoù rostet pe friket betek an deiz-se, betek ma tegasot ar prof d’ho Toue. Ur reolenn beurbadus eo evidoc’h a rummadoù da rummadoù, en hoc’h holl chomlec’hioù.

¹⁵ Kontañ a reot, da vont eus an deiz war-lerc’h ar sabad, adalek an deiz m’ho po degaset ar feskenn da hejañ evel ur prof, seizh sabad leun.

¹⁶ Kontañ a reot hanter-kant devezh betek an deiz war-lerc’h ar seizhvet sabad, hag e kinnigot ur prof nevez d’an AOTROU.

¹⁷ Eus ho chomlec’hioù e tegasot daou vara evit o hejañ evel ur prof; bez’ e vint a zaou dekvedenn a flour bleud, poazhet gant goell; ar re-se eo frouezh kentañ d’an AOTROU.

¹⁸ Gant ar baraoù, e kinnigot seizh oan disi eus ur bloaz, ur c’hole yaouank ha daou dourz; bez’ e vint ul loskaberzh d’an AOTROU gant an donezon hag an evadkinnig, ur prof graet dre an tan, ur c’hwezh dudius d’an AOTROU.

¹⁹ Kinnig a reot ur bouc’h evit an aberzh-dic’haouiñ, ha daou oan eus ur bloaz evit an aberzh a drugarekadennoù.

²⁰ An aberzhour a hejo anezho evel ur prof dirak an AOTROU, an daou oan gant bara ar frouezh kentañ; santelaet e vint d’an AOTROU, hag e vint evit an aberzhour.

²¹ Er memes deiz-mañ ec’h embannot e vo ur c’hengalv santel; ne reot labour-mevel ebet. Ur reolenn beurbadus e vo evidoc’h a rummadoù da rummadoù, en hoc’h holl chomlec’hioù.

²² Pa reot an eost en ho pro, ne echui ket da vediñ penn da bark ha ne zastumi ket ar pezh a vo manet da zañvouesa en da eost. Lezel a ri kement-se evit ar paour hag evit an diavaeziad. Me eo an AOTROU ho Toue.

²³ An AOTROU a gomzas da Voizez o lavarout:

²⁴ Komz da vibien Israel ha lavar: D’ar seizhvet miz, d’an deiz kentañ eus ar miz, ho po un diskuizh, un eñvor embannet gant son an trompilhoù, ur c’hengalv santel.

²⁵ Ne reot labour-mevel ebet hag e kinnigot d’an AOTROU profoù graet dre an tan.

²⁶ An AOTROU a gomzas da Voizez o lavarout:

²⁷ D’an dekvet deiz eus ar seizhvet miz-se e vo an deiz-pardon; bez’ ho po ur c’hengalv santel, ec’h izelaiot hoc’h eneoù, hag e kinnigot d’an AOTROU profoù graet dre an tan.

²⁸ Ne reot labour ebet en deiz-se, rak deiz-pardon e vo, graet e vo an dic’haou evidoc’h dirak an AOTROU ho Toue.

²⁹ Pep den n’en em izelaio ket en deiz-se a vo lamet eus e bobl.

³⁰ Pep den a raio ul labour bennak en deiz-se, me a zistrujo anezhañ a-douez e bobl.

³¹ Ne reot labour ebet. Ur reolenn beurbadus eo evidoc’h a rummadoù da rummadoù, en hoc’h holl chomlec’hioù.

³² Bez’ e vo evidoc’h ur sabad-diskuizh, hag ec’h izelaiot hoc’h eneoù; d’an navet deiz eus ar miz da noz, eus un noz da un noz all, e lidot ar sabad.

³³ An AOTROU a gomzas da Voizez o lavarout:

³⁴ Komz da vibien Israel ha lavar: D’ar pemzekvet deiz eus ar seizhvet miz-se, e vo gouel al logelloù evit an AOTROU, e-pad seizh devezh.

³⁵ D’an deiz kentañ e vo ur c’hengalv santel, ne reot labour-mevel ebet.

³⁶ E-pad seizh devezh e kinnigot d’an AOTROU ur prof graet dre an tan. D’an eizhvet deiz e vo ur c’hengalv santel hag e kinnigot d’an AOTROU ur prof graet dre an tan; ur vodadeg veur e vo, ne reot labour-mevel ebet.

³⁷ Ar re-se eo gouelioù an AOTROU, a embannot evel kengalvoù santel evit kinnig d’an AOTROU profoù graet dre an tan, loskaberzhoù, donezonoù, aberzhoù hag evadkinnigoù, pep tra d’e zeiz.

³⁸ Ouzhpenn-se e virot sabadoù an AOTROU, e reot ho tonezonoù, ho kouestloù, ho profoù a youl vat a roit d’an AOTROU.

³⁹ D’ar pemzekvet deiz eus ar seizhvet miz, pa ho po dastumet madoù an douar, e reot ur gouel d’an AOTROU e-pad seizh devezh; an deiz kentañ a vo un deiz a ziskuizh, an eizhvet deiz a vo un deiz a ziskuizh.

⁴⁰ D’an deiz kentañ e kemerot frouezh eus ar gwez kaerañ, brankoù palmez, skourroù gwez bodennek hag haleg eus ar stêrioù, hag en em laouenaiot e-pad seizh devezh dirak an AOTROU.

⁴¹ Ober a reot ar gouel-se d’an AOTROU e-pad seizh devezh bep bloaz. Ur reolenn beurbadus eo evidoc’h a rummadoù da rummadoù. Henn ober a reot er seizhvet miz.

⁴² E-pad seizh devezh e chomot dindan logelloù; an holl henvroidi en Israel a chomo dindan logelloù,

⁴³ evit ma ouezo ho tiskennidi penaos em eus lakaet mibien Israel da chom dindan logelloù pa em eus tennet anezho eus bro Ejipt. Me eo an AOTROU ho Toue.

⁴⁴ Neuze Moizez a zisklêrias da vibien Israel gouelioù an AOTROU.