Leviegezh 21 - Bibl Koad 21: Ar Bibl e Brezhoneg evit ar Vretoned

Pennad 21 Reolennoù evit an aberzhourien

¹ An AOTROU a lavaras da Voizez: Komz d’an aberzhourien, mibien Aaron, ha lavar: Un aberzhour n’en em lakaio ket dic’hlan e-touez e bobl evit unan marv,

² nemet evit e gerent nesañ, evit e vamm, evit e dad, evit e verc’h, evit e vreur,

³ evit e c’hoar gwerc’hez, tost dezhañ pa n’he deus ket a ozhac’h, eviti en em lakaio dic’hlan.

⁴ Ur penn-bras e-touez e bobl eo, n’en em lakaio ket dic’hlan oc’h en em zisakrañ.

⁵ Ne raint ket a lec’hioù moal war o fenn, ne douzint ket kornioù o barv, ne raint flañch ebet en o c’hig.

⁶ Santel e vint evit o Doue ha ne zisakrint ket anv o Doue, rak kinnig a reont d’an AOTROU ar profoù graet dre an tan, boued o Doue; santel e vint.

⁷ Ne gemerint ket ur wreg aet da c’hast pe disakret, ne gemerint ket ur wreg kaset kuit gant hec’h ozhac’h, rak santel ez int evit o Doue.

⁸ Sellout a ri outo evel santel rak e kinnigont boued da Zoue. Santel e vint evidout rak me a zo santel, me, an AOTROU a santela ac’hanoc’h.

⁹ Mar en em zisakr merc’h un aberzhour o c’hastaouiñ, e tisakr he zad; devet e vo en tan.

¹⁰ An hini a zo aberzhour-meur e-touez e vreudeur, a zo bet skuilhet war e benn eoul an oleviadur hag a zo gouestlet evit gwiskañ ar gwiskamantoù, ne zizoloio ket e benn ha ne rogo ket e zilhad.

¹¹ Ne d-aio etrezek hini marv ebet, n’en em lakaio ket dic’hlan, nag evit e dad, nag evit e vamm.

¹² Ne guitaio ket ar santual ha ne zisakro ket santual e Zoue, rak kurunenn an eoul a oleviadur eus e Zoue a zo warnañ. Me eo an AOTROU.

¹³ Kemer a raio ur wreg gwerc’hez.

¹⁴ Ne gemero nag un intañvez, nag ur wreg kaset kuit gant hec’h ozhac’h, nag ur wreg disakret pe aet da c’hast, met e kemero evel gwreg ur werc’hez a-douez e bobl.

¹⁵ Ne zisakro ket e ziskennidi e-touez e bobl. Me eo an AOTROU a santela anezhañ.

¹⁶ An AOTROU a gomzas da Voizez o lavarout:

¹⁷ Komz da Aaron ha lavar: Pep den eus da ziskennidi, e-touez da lignez, hag en devo ur si, ne dostaio ket da ginnig boued e Zoue.

¹⁸ Pep den en devo ur si ne dostaio ket, un den dall, pe kamm, pe gant ar fri togn, pe gant un ezel distumm,

¹⁹ pe un den en devo torret e zorn pe e droad,

²⁰ pe un den tort, pe gwan, pe gant un tarch en e lagad, pe galus, pe gant un darouedenn, pe gant e gelloù friket.

²¹ Pep den e-touez diskennidi an aberzhour Aaron hag en devo ur si, ne dostaio ket da ginnig ar profoù graet dre an tan d’an AOTROU. Ur si a zo ennañ, ne dostaio ket da ginnig boued e Zoue.

²² Debriñ a raio boued e Zoue, traoù santel-meurbet ha traoù santel,

²³ met ne d-aio ket war-zu ar ouel, ne dostaio ket ouzh an aoter, rak ur si a zo ennañ; ne zisakro ket va santualioù. Me eo an AOTROU a santela anezho.

²⁴ Moizez a gomzas evel-se da Aaron ha d’e vibien, ha da holl vibien Israel.