Leviegezh 18 - Bibl Koad 21: Ar Bibl e Brezhoneg evit ar Vretoned

Pennad 18 Euzhusterioù a bep seurt

¹ An AOTROU a gomzas da Voizez o lavarout:

² Komz da vibien Israel ha lavar: Me eo an AOTROU ho Toue.

³ Ne reot ket ar pezh a vez graet e bro Ejipt ma hoc’h eus chomet enni, hag ne reot ket ar pezh a vez graet e bro Ganaan ma kasan ac’hanoc’h enni, ne gerzhot ket hervez o reolennoù.

⁴ Kerzhout a reot hervez va barnedigezhioù hag e virot va reolennoù evit o heuliañ. Me eo an AOTROU ho Toue.

⁵ Mirout a reot va reolennoù ha va barnedigezhioù; an den a gerzho enno a vevo drezo. Me eo an AOTROU.

⁶ Hini ac’hanoc’h ne dostaio ouzh ur plac’h kar dezhañ evit dizoleiñ he noazhder. Me eo an AOTROU.

⁷ Ne zizoloi ket noazhder da dad na noazhder da vamm, da vamm eo, ne zizoloi ket he noazhder.

⁸ Ne zizoloi ket noazhder gwreg da dad, noazhder da dad eo.

⁹ Ne zizoloi ket noazhder da c’hoar, merc’h da dad pe merc’h da vamm, ganet en ti pe ganet er-maez eus an ti, ne zizoloi ket he noazhder.

¹⁰ Ne zizoloi ket noazhder merc’h da vab pe merc’h da verc’h, ne zizoloi ket he noazhder, da noazhder eo.

¹¹ Ne zizoloi ket noazhder merc’h gwreg da dad, ganet eus da dad, da c’hoar eo, ne zizoloi ket he noazhder.

¹² Ne zizoloi ket noazhder c’hoar da dad, kig da dad eo.

¹³ Ne zizoloi ket noazhder c’hoar da vamm, kig da vamm eo.

¹⁴ Ne zizoloi ket noazhder breur da dad, ne dostaio ket ouzh e wreg, da voereb eo.

¹⁵ Ne zizoloi ket noazhder da verc’h-kaer, gwreg da vab eo, ne zizoloi ket he noazhder.

¹⁶ Ne zizoloi ket noazhder gwreg da vreur, noazhder da vreur eo.

¹⁷ Ne zizoloi ket noazhder ur vaouez hag hini he merc’h. Ne gemeri ket merc’h he mab pe merc’h he merc’h evit dizoleiñ o noazhder, he c’hig eo, un torfed eo.

¹⁸ Ne gemeri ket ur wreg gant he c’hoar, evit kreskiñ ur gasoni o tizoleiñ he noazhder e-kichen da wreg e-pad he buhez.

¹⁹ Ne dostaio ket ouzh ur wreg evit dizoleiñ he noazhder en amzer saotradur he dic’hlander.

²⁰ Ne’z po ket darempred reizhel gant gwreg da nesañ evit en em saotrañ ganti.

²¹ Ne roi ket da vugale da vezañ lazhet evit Molok, ne zisakri ket anv da Zoue. Me eo an AOTROU.

²² Ne gouski ket gant ur paotr evel ma kouskez gant ur wreg. Un euzhusted eo.

²³ Ne gouski ket gant ul loen evit en em saotrañ gantañ. Ur vaouez ne dostaio ket ouzh ul loen evit mont da c’hast gantañ. Un euzhusted eo.

²⁴ N’en em saotrit ket gant tra ebet, rak dre an holl draoù-se eo en em saotret ar pobloù a gasan kuit dirazoc’h.

²⁵ An douar a zo bet saotret hag e kastizin o direizhder; an douar a zislonko e annezidi.

²⁶ Mirout a reot va reolennoù ha va barnedigezhioù ha ne reot hini ebet eus an euzhusterioù-se, nag an henvroad nag an diavaeziad a chom en ho touez.

²⁷ Rak en holl draoù euzhus-se a zo bet graet gant tud ar vro hag a zo bet araozoc’h, hag an douar a zo bet saotret.

²⁸ Ra ne zislonko ket ac’hanoc’h an douar en ur saotrañ anezhañ, evel m’en deus dislonket ar bobl a oa araozoc’h.

²⁹ Ar re holl a raio unan bennak eus an traoù euzhus-se a vo lamet eus o fobl.

³⁰ Mirout a reot ar pezh a c’hourc’hemennan ha ne virot hini ebet eus ar boazioù euzhus-se a zo bet graet araozoc’h; n’en em saotrit ket ganto. Me eo an AOTROU ho Toue.