Krennlavarioù 9 - Bibl Koad 21: Ar Bibl e Brezhoneg evit ar Vretoned

Pennad 9

¹ Ar furnez he deus savet he zi, kizellet he seizh peul,

² lazhet he loened, kempennet he gwin, hag aozet he zaol.

³ Kaset he deus he mitizhien; eus lein lec'hioù uhel kêr e kri:

⁴ Ra zeuio amañ an hini a zo eeun! Hag e lavar d'ar re a zo dibourvez a skiant:

⁵ Deuit, debrit eus va bara, hag evit eus ar gwin am eus kempennet.

⁶ Disammit eus an diouiziegezh hag e vevot, hag e kerzhot war hent ar poell.

⁷ An hini a c'hourdrouz ur goapaer a resev mezh, hag an hini a repren un den drouk a resev dismegañs.

⁸ Na repren ket ur goapaer gant aon na gasafe ac'hanout, repren un den fur hag e karo ac'hanout.

⁹ Ro d'un den fur hag e teuio furoc'h c'hoazh, kelenn un den reizh hag e kresko e gouiziegezh.

¹⁰ Doujañs an AOTROU eo penn-kentañ ar furnez, hag anaoudegezh ar sent eo ar poell.

¹¹ Rak drezon eo e vo da zeizioù liesaet, ha bloavezhioù da vuhez a vo kresket.

¹² Mard out fur, out fur evidout da-unan, mard out goapaer, e tougi da-unan da boan.

¹³ Ur vaouez sot a zo trouzus, diskiant ha ne oar netra.

¹⁴ Azezañ a ra war dreuz he zi, war ur gador e lec'hioù uhel kêr,

¹⁵ evit krial d'ar re a dremen, hag a ya eeun en o gwenodenn:

¹⁶ Ra zeuio amañ an hini a zo eeun! Hag e lavar d'an hini a zo dibourvez a skiant:

¹⁷ An dourioù laeret a zo dous, hag ar bara debret e kuzh a zo plijus.

¹⁸ Ha ne oar ket emañ eno ar re varv; he re bedet a zo e foñs lec'h ar marv.