Krennlavarioù 7 - Bibl Koad 21: Ar Bibl e Brezhoneg evit ar Vretoned

Pennad 7

¹ Va mab, mir va gerioù, ha dalc'h ganit va gourc'hemennoù,

² mir va gourc'hemennoù hag e vevi, mir va lezenn evel da ibil-lagad,

³ stag anezho ouzh da vizied, skriv anezho war daolenn da galon.

⁴ Lavar d'ar furnez: Te eo va c'hoar, ha gra eus ar poell: Va mignon,

⁵ evit ma tiwallint ac'hanout diouzh ar vaouez estren, an diavaeziadez a luban gant he gerioù.

⁶ Tra ma sellen dre brenestr va zi, a-dreuz va c'hael,

⁷ e welis e-touez ar re eeun, ec'h eveshais e-touez ar re yaouank, ur paotr dibourvez a skiant,

⁸ a dremene dre ar straed e-kichen he c'horn, hag a heulie hent he zi,

⁹ d'an abardaez, da serr an noz, pa zeue an noz du ha teñval.

¹⁰ Ha setu, ar vaouez a zeuas a-raok dezhañ, gwisket evel ur ribodez ha leun a douellerezh.

¹¹ Trouzus hag hep dalc'h eo, he zreid ne chomont ket en he zi;

¹² bremañ war ar straed, goude war al leurenn, emañ o c'hortoz e pep korn.

¹³ Kemer a reas anezhañ hag e pokas dezhañ, ha gant un dremm rok e lavaras dezhañ:

¹⁴ Un aberzh a beoc'h a oa ganin, hiziv em eus sevenet va gouestloù,

¹⁵ setu perak on deuet a-raok dit, evit da glask gant pres, hag em eus da gavet.

¹⁶ Gwisket em eus va gwele gant pallennoù, gant gwiadoù liesliv e lin eus an Ejipt.

¹⁷ Frondet em eus va gwele gant mir, aloez ha kinamona.

¹⁸ Deus, en em vezvomp a garantez betek ar mintin, laouenaomp er plijadurioù.

¹⁹ N'emañ ket va ozhac'h er gêr, aet eo da veajiñ pell.

²⁰ Kemeret en deus gantañ ur sac'had arc'hant, ha ne zistroio ket d'ar gêr a-raok al loar nevez.

²¹ Dre he lavaroù hoalus e laka anezhañ da zont, dre lubanerezh he muzelloù e redi anezhañ.

²² Mont a ra raktal war he lerc'h, evel ma'z a un ejen d'al lazherezh, evel ma'z a un diskiant ereet evit bezañ kastizet,

²³ betek ma teuio ur bir da doullañ e avu, evel ul labous en em daol etrezek al lindag, hep gouzout eo stegnet a-enep e vuhez.

²⁴ Bremañ eta, mibien, selaouit me, ha bezit evezhiek ouzh gerioù va genoù.

²⁵ Ra n'aio ket da galon etrezek he hentoù, n'en em goll ket war he gwenodennoù.

²⁶ Rak kalz he deus lakaet da gouezhañ, gouliet, ha bras eo niver ar re greñv he deus lazhet.

²⁷ He zi eo hent lec'h ar marv, a ziskenn betek chomlec'h ar marv.