Krennlavarioù 6 - Bibl Koad 21: Ar Bibl e Brezhoneg evit ar Vretoned

Pennad 6

¹ Va mab, mar ec'h eus kretaet da nesañ, mar ec'h eus tonket evit unan bennak da zorn,

² ereet out dre c'herioù da c'henoù, tapet out dre c’herioù da c'henoù.

³ Va mab, gra buan an dra-mañ: en em denn ac'hane; pa'z out kouezhet etre daouarn da nesañ, kae, stou ha ped da nesañ.

⁴ Na ro ket na morgousk da'z taoulagad, na diskuizh da'z malvennoù,

⁵ en em denn evel ar yourc'h eus dorn ar chaseour, evel ul labous eus dorn al labousetaer.

⁶ Didalvez, kae etrezek ar verienenn, sell ouzh he hentoù ha deus da vezañ fur.

⁷ N'he deus na mestr, nag eveshaer, na penn,

⁸ kempenn a ra he boued e-pad an hañv, hag e tastum e-pad an eost peadra da zebriñ.

⁹ Didalvez, betek pegeit e vi gourvezet? Pegoulz e savi eus da gousk?

¹⁰ Un tamm kousket, un tamm morediñ, un tamm kroaziañ da zaouarn evit diskuizhañ,

¹¹ hag e teuio da baourentez evel ur reder, ha da zienez evel un den armet.

¹² An hini fallakr, an den drouk, a gerzh gant ur genoù tuet fall,

¹³ ober a ra sin gant e zaoulagad, komz a ra gant e dreid, reiñ a ra da c'houzout gant e vizied,

¹⁴ ar falloni a zo en e galon, ijinañ a ra an droug e pep amzer, lakaat a ra stourmadegoù da c'henel.

¹⁵ Setu perak e teuio e ziskar a-daol-trumm, buan e vo bruzunet, ha ne vo pare ebet.

¹⁶ C'hwec'h tra a zo kasaet gant an AOTROU, seizh zoken a zo euzhus evitañ:

¹⁷ An daoulagad otus, an teod gaouiat, an daouarn a skuilh ar gwad didamall,

¹⁸ ar galon o tivizout traoù fall, an treid a hast redek d'an droug,

¹⁹ ar falstest a lavar gevier, hag an hini a zegas stourmadegoù etre breudeur.

²⁰ Va mab, mir gourc'hemenn da dad, ha na zilez ket kelennoù da vamm.

²¹ Dalc'h anezho bepred ereet war da galon, stag anezho ouzh da c'houzoug.

²² Pa gerzhi, e renint ac'hanout; pa c'hourvezi, ez tiwallint; pa zihuni, e komzint ouzhit.

²³ Rak ar gourc'hemenn a zo ul lamp, al lezenn a zo ur sklêrijenn, hag ar rebechoù mat da gelenn a zo hent ar vuhez,

²⁴ evit da ziwall diouzh ar vaouez fall, diouzh teod lubanus an diavaeziadez.

²⁵ Na c'hoanta ket he c'haerder ez kalon, ha na lez ket anezhi da'z tapout gant he malvennoù.

²⁶ Rak dre garantez evit ur ribodez e teuer da vezañ evel un tamm bara, hag an avoultrerez a hemolc'ho an ene prizius.

²⁷ Ha gallout a ra unan bennak kemer tan en e varlenn, hep ma tevfe e zilhad?

²⁸ Ha kerzhout a rafe unan bennak war ar glaou, hep ma vefe devet e dreid?

²⁹ Evel-se eo evit an hini a ya etrezek gwreg e nesañ, piv bennak a stok outi ne vo ket didamall.

³⁰ Ne zisprizer ket ul laer en deus laeret evit en em leuniañ, p'en doa naon,

³¹ ha mard eo tapet, e roio seizh gwech kemend-all, reiñ a raio kement a zo en e di.

³² Met an hini a ra avoultriezh gant ur wreg a zo dibourvez a skiant, an hini a fell dezhañ en em goll a raio evel-se.

³³ Kavout a raio goulioù ha dismegañs, hag e vezh ne vo ket lamet kuit,

³⁴ rak gwarizi ar pried a zo ur fulor, hag e vo didruez e deiz ar veñjañs,

³⁵ ne lakaio evezh ouzh dic'haou ebet, ha ne gemero netra zoken pa greskfes an donezonoù.