Krennlavarioù 5 - Bibl Koad 21: Ar Bibl e Brezhoneg evit ar Vretoned

Pennad 5

¹ Va mab, bez evezhiek ouzh va furnez, stou da skouarn da'm foell,

² evit ma talc'hi ar preder, ha ma viro da vuzelloù an anaoudegezh.

³ Rak muzelloù an diavaeziadez a laosk ar mel, hag he staon a zo dousoc'h eget eoul,

⁴ met ar pezh a zeu diouti a zo c'hwerv evel huelenn, ha lemm evel ur c'hleze a zaou droc'h.

⁵ He zreid a genred d'ar marv, he c'hammedoù a gas da lec'h ar marv,

⁶ ne daol ket evezh ouzh gwenodenn ar vuhez, he hentoù a zo kemmus, ne c'hellez ket o anavezout.

⁷ Bremañ eta, va mibien, selaouit ac'hanon, ha na zistroit ket diouzh gerioù va genoù.

⁸ Pella da hent diouti, ha na dosta ket ouzh dor he zi,

⁹ gant aon na rofes da enor da reoù all, ha da vloavezhioù da un den garv,

¹⁰ gant aon na zeufe an diavaezidi d'en em leuniañ eus da binvidigezhioù, ha na dremenfe en un ti estren ar pezh ac'h eus gounezet gant da labour,

¹¹ ha na yudfes pa vi tost ouzh da ziwezh, pa vo da gig ha da gorf kuzumet,

¹² ha na lavarfes: Penaos em eus kasaet ar gelennadurezh? Penaos he deus disprizet va c'halon ar gourdrouz?

¹³ Penaos n'em eus ket sentet ouzh mouezh ar re am c'helenne? Penaos n'em eus ket stouet va skouarn d'ar re a zeske ac'hanon?

¹⁴ War-bouez nebeud e en em gaven en holl boanioù, e-kreiz ar bobl hag ar vodadeg.

¹⁵ Ev dour eus da sistern, hag eus gwazhioù da buñs.

¹⁶ Daoust hag e tle da feunteunioù en em skuilhañ en diavaez, ha da zourioù-red er straedoù?

¹⁷ Ra vint dit-te da-unan, ha nann d'an diavaezidi.

¹⁸ Ra vo da andon benniget, ha laouena gant gwreg da yaouankiz,

¹⁹ evel gant ur garvez karedik hag ur c'havrig koant, ra laouenaio he divronn ac'hanout e pep amzer, ha bez dalc'hmat stag ouzh he c'harantez.

²⁰ Ha perak, va mab, e vefes boemet gant un diavaeziadez, hag e pokfes ar brennid eus un estrañjourez?

²¹ Rak hentoù an den a zo dirak daoulagad an AOTROU, hag e pouezata e holl bazioù.

²² An hini drouk a vo paket en e zireizher, hag a vo dalc'het en ereoù e bec'hed.

²³ Mervel a raio hep kelennadur, hag e kantreo dre vraster e sotoni.