Krennlavarioù 4 - Bibl Koad 21: Ar Bibl e Brezhoneg evit ar Vretoned

Pennad 4

¹ Mibien, selaouit ar gelennadurezh eus un tad, ha bezit evezhiek evit anavezout ar poell,

² rak alioù mat a roan deoc'h; na zilezit ket va lezenn.

³ Pa oan c'hoazh ur bugel tost da'm zad, tener ha karedik e-kichen va mamm,

⁴ e kelenne ac'hanon hag e lavare din: Ra zalc'ho da galon va c'homzoù, mir va gourc'hemennoù, hag e vevi,

⁵ degemer ar furnez, degemer ar poell, n'ankounac'ha ket kement-se, ha na zistro ket eus gerioù va genoù,

⁶ na zilez ket anezhi, da virout a raio, kar anezhi, da ziwall a raio.

⁷ Ar furnez eo ar penn-kentañ; degemer ar furnez ha, gant kement ec'h eus, degemer ar poell.

⁸ Azaouez anezhi hag hi a savo ac'hanout, reiñ a raio enor dit pa ez po staget outi,

⁹ grasoù a zastumo en-dro da'z penn, hag e roio dit ur gurunenn a c'hloar.

¹⁰ Selaou, va mab, degemer va gerioù, ha bloavezhioù da vuhez a vo kresket.

¹¹ Kelennet em eus dit hent ar furnez, ha lakaet em eus ac'hanout da gerzhout war wenodennoù eeun.

¹² Pa gerzhi, da gammedoù ne vint ket diaezet, ha pa redi, ne streboti ket.

¹³ Stag ouzh ar gelennadurezh, na laosk ket anezhi, mir anezhi, rak da vuhez eo.

¹⁴ Na gerzh ket war wenodenn ar re fallakr, ha n'a ket en hent ar re zrouk.

¹⁵ Diwall diouto, na dremen ket dre eno, pella, tremen e-biou,

¹⁶ rak ne gouskont ket ma n'o deus ket graet un droug bennak, hag o c'housk a zo lamet diouto ma n'o deus ket lakaet unan bennak da gouezhañ,

¹⁷ rak bara ar fallentez a zebront, ha gwin an daerded a evont,

¹⁸ met gwenodenn ar re reizh a zo evel ar sklêrijenn lugernus, a gresk he sked betek an deiz peurvat.

¹⁹ Hent ar re zrouk a zo evel an deñvalijenn, ne welont ket ar pezh o lakaio da gouezhañ.

²⁰ Va mab, bez evezhiek ouzh va c'homzoù, stou da skouarn da'm gerioù,

²¹ ra ne bellaint ket diouzh da zaoulagad, mir anezho ez kalon,

²² rak ez int buhez ar re a gav anezho, ha yec'hed o holl gorf.

²³ Diwall da galon gant evezh, rak anezhi eo e teu mammennoù ar vuhez.

²⁴ Dizarbenn diouzhit drougiezh ar genoù, pella diouzhit touellerezh ar muzelloù,

²⁵ ra sello da zaoulagad dirazout, ra en em lakaio da valvennoù eeun,

²⁶ pouez war wenodenn da dreid, starta da holl hentoù,

²⁷ na zistro nag a-zehou nag a-gleiz, tenn da droad diouzh an droug.