Krennlavarioù 31 - Bibl Koad 21: Ar Bibl e Brezhoneg evit ar Vretoned

Pennad 31

¹ Komzoù ar roue Lemuel, diouganoù a gelennas e vamm dezhañ.

² Petra, va mab? Petra, mab donañ va c'hof? Petra, mab va gouestloù?

³ Na ro ket da nerzh d'ar merc'hed, na da hentoù d'ar re a goll ar rouaned.

⁴ N'eo ket d'ar rouaned, Lemuel, n'eo ket d'ar rouaned evañ gwin, na d'ar briñsed an evaj kreñv,

⁵ gant aon na evfent, n'ankounac'hafent al lezenn ha na zireizhfent droed ar re c'hlac'haret.

⁶ Roit an evaj kreñv d'an hini a ya da goll, hag ar gwin d'an hini ez eo c'hwerv e ene,

⁷ ra evo hag ec'h ankounac'haio e baourentez, ha n'en devo ken soñj eus e drubuilh.

⁸ Digor da c'henoù evit ar mud, hag evit droed an holl vibien dilezet.

⁹ Digor da c'henoù, barn gant reizhder, breuta kaoz ar beorien hag an ezhommeien.

¹⁰ Piv a gavo ur wreg vertuzius? He friz a zo pell dreist hini ar perlez.

¹¹ Kalon he fried a laka he fiziañs enni, ha ne vanko ket dezhañ a breizh.

¹² Ober a raio vad dezhañ ha nann droug, holl zeizioù he buhez.

¹³ Klask a ra gloan ha lin, hag e labour a-youl-gaer gant he daouarn,

¹⁴ emañ evel listri ur marc'hadour, a-bell e tegas he bara.

¹⁵ Sevel a ra pa vez c'hoazh noz, hag e ro ar boued d'he ziegezh hag al labour d'he mitizhien.

¹⁶ Soñjal a ra en ur park hag e pren anezhañ, diwar frouezh he daouarn e plant ur winienn.

¹⁷ Gourizañ a ra a-nerzh he divgroazell, hag e starta he divrec'h,

¹⁸ gwelout a ra ez eo mat hec'h aferioù, he lamp ne voug ket e-pad an noz.

¹⁹ Lakaat a ra he daouarn d'ar gegel, hag he bizied a zalc'h ar werzhid.

²⁰ Astenn a ra he dorn d'ar paour, ha dougen a ra he daouarn d'an ezhommeg.

²¹ N'he deus ket aon rak an ec'h evit he ziegezh, rak he holl diegezh a zo gwisket gant ruz-moug.

²² Ober a ra pallennoù, he dilhad a zo graet gant lin fin ha tane.

²³ He fried a zo anavezet ouzh dorioù kêr, pa'z eo azezet gant henaourien ar vro.

²⁴ Ober a ra lien da werzhañ, ha gourizoù evit ar varc'hadourien.

²⁵ Nerzh ha splannder a stumm he dilhad, hag e c'hoarzh d'an deiz a zeu.

²⁶ Digeriñ a ra he genoù gant furnez, hag ul lezenn a vadelezh a zo war he zeod.

²⁷ Eveshaat a ra ouzh doare he ziegezh, ha ne zebr ket bara an didalvoudegezh.

²⁸ He mibien a sav hag he galv eürus, he fried a veul anezhi.

²⁹ Kalz merc'hed o deus labouret nerzhus, met te a zo a-us dezho holl.

³⁰ Gaou eo ar goantiz, moged eo ar c'haerder, ar wreg a zouj an AOTROU eo an hini a vo meulet.

³¹ Roit dezhi eus frouezh he daouarn, ha ra veulo anezhi hec'h oberoù ouzh dorojoù kêr.