Krennlavarioù 3 - Bibl Koad 21: Ar Bibl e Brezhoneg evit ar Vretoned

Pennad 3

¹ Va mab, n'ankounac'ha ket va lezenn, ha ra viro da galon va gourc'hemennoù,

² rak deizioù hir ha bloavezhioù a vuhez, ha peoc'h ivez a zegasint dit.

³ Ra ne zilezo ket ac'hanout an drugarez hag ar wirionez, eren anezho ouzh da c'houzoug, skriv anezho war daolenn da galon,

⁴ hag e kavi madelezh hag intent mat dirak daoulagad Doue hag an dud.

⁵ Fiz en AOTROU eus da holl galon, ha n'en em harp ket war da boell,

⁶ anavez-eñ ez holl hentoù, hag e reno da wenodennoù.

⁷ Na vez ket fur dirak da zaoulagad da-unan, douj an AOTROU ha distro diouzh an droug,

⁸ kement-se a vo ar yec'hed da'z kigennoù, ha mel da'z eskern.

⁹ Enor an AOTROU gant da vadoù, ha gant frouezh kentañ da holl c'hounidoù,

¹⁰ ha da solieroù a vo leun a fonnusted, ha da waskoù a baoto gant gwin nevez.

¹¹ Va mab, na zispriz ket kastiz an AOTROU, ha na goll ket kalon pa rebech ac'hanout,

¹² rak an AOTROU a gastiz an hini a gar, evel ma ra un tad d'e vab a laka e levenez ennañ.

¹³ Eürus an den en deus kavet ar furnez, hag an den a laka ar meiz a-raok,

¹⁴ rak gwelloc'h eo ar splet anezhi eget hini an arc'hant, hag ar gounid anezhi eget aour fin.

¹⁵ Priziusoc'h eo eget perlez, hag an holl draoù c'hoantus ne dalvezont ket anezhi.

¹⁶ Deizioù hir a zo en he zu dehou, pinvidigezhioù ha gloar en he zu kleiz.

¹⁷ He hentoù a zo hentoù plijus, hag hec'h holl wenodennoù a ren d'ar peoc'h.

¹⁸ Ar wezenn a vuhez ez eo evit ar re a stag outi, hag an holl re a vir anezhi a zo eürus.

¹⁹ An AOTROU en deus diazezet an douar dre ar furnez, ha dre ar meiz en deus startaet an neñvoù.

²⁰ Dre an anaoudegezh eo e vez digoret an donderioù, hag e laosk ar goabrennoù ar c'hlizhenn.

²¹ Va mab, ra ne bellaint ket diouzh da zaoulagad, mir an ijin hag ar poell,

²² hag e vint buhez evit da ene, hag ur brageriz evit da c'houzoug.

²³ Neuze e kerzhi e surentez war da hent, ha da droad ne streboto ket.

²⁴ Mar gourvezez, ne'z po ket aon, ha pa vi gourvezet, da gousk a vo dous.

²⁵ Na'z pez ket aon rak ar spont buan, na rak distruj ar re zrouk pa en em gavo.

²⁶ Rak an AOTROU a vo da esperañs, hag e tiwallo da droad diouzh bezañ tapet.

²⁷ Na zinac'h ket ur madober d'an hini en deus ezhomm, pa'z eo ez kalloud e reiñ dezhañ.

²⁸ Na lavar ket da'z nesañ, kae ha deus en-dro, ha me a roio dit warc'hoazh, pa vez ganit peadra.

²⁹ Na ijin ket an droug a-enep da nesañ, a zo o chom e surentez ez kichen.

³⁰ Na stourm ket a-enep un den, pa n'en deus graet droug ebet dit.

³¹ Na'z pez ket avi ouzh an den taer, ha na zibab hini eus e hentoù.

³² Rak an hini a gerzh a-dreuz, euzh en deus an AOTROU outañ, met mignon eo d'ar re a zo eeun.

³³ Mallozh an AOTROU a zo war di an den drouk, met bennigañ a ra ti ar re reizh.

³⁴ Ober a ra goap ouzh ar c'hoapaerien, met reiñ a ra gras d'ar re uvel.

³⁵ Ar re fur o devo ar c'hloar da hêrezh, met an dismegañs a gouezho war ar sodien.