Krennlavarioù 26 - Bibl Koad 21: Ar Bibl e Brezhoneg evit ar Vretoned

Pennad 26

¹ Evel an erc'h e-pad an hañv hag evel ar glav e-pad an eost, evel-se ar c'hloar ne zere ket d'an amoed.

² Evel ma tec'h ul labous hag evel ma nij ar wennili, evel-se ar vallozh dizellid ne zeuio ket.

³ Ar skourjez a zo evit ar marc'h, ar weskenn evit an azen, ar vazh evit kein an amoeded.

⁴ Na respont ket d'ar sod hervez e sotoni, gant aon na zeufes heñvel outañ.

⁵ Na respont ket d'ar sod hervez e sotoni, gant aon na soñjfe e vefe fur.

⁶ An hini a gas kemennadoù dre un den diboell a droc'h e dreid hag a ev nec'hamant.

⁷ Evel ma'z eo hep nerzh divhar an den mac'hagn, evel-se emañ ur c'hrennlavar e genoù an den diboell.

⁸ Ober enor d'un den diboell, a zo evel lakaat ur maen prizius en ur bern kailh.

⁹ Evel ur spernenn e dorn ar mezvier, evel-se emañ ur c'hrennlavar e genoù an den diboell.

¹⁰ An hini a gemer en e servij ar sodien hag ar re gentañ deuet, a zo evel ur gwareger a c'hloaz an holl.

¹¹ Evel ma tistro ar c'hi d'ar pezh en deus distaolet, evel-se e tistro ar sod d'e sotoni.

¹² Daoust hag ec'h eus gwelet un den a gred bezañ fur? Muioc'h a zo da c'hortoz diouzh un amoed eget dioutañ.

¹³ An didalvez a lavar: Al leon bras a zo en hent, al leon a zo er straedoù!

¹⁴ Evel ma tro an nor war he mudurunoù, an didalvez a dro war e wele.

¹⁵ An didalvez a laka e zorn er plad, ha poan en deus o tegas anezhañ d'e c'henoù.

¹⁶ An didalvez en em gav furoc'h eget seizh den a oar respont gant skiant-vat.

¹⁷ A hini a c'hell fuloriñ diwar-benn un tabut na sell ket outañ, a zo evel an hini a grog en ur c'hi dre e zivskouarn,

¹⁸ evel-se eo an hanter gounnaret a daol glaou, biroù hag ar marv,

¹⁹ evel-se eo an den a douell e nesañ hag a lavar: Ha ne oa ket evit c'hoari?

²⁰ Pa n'eus ket a goad e varv an tan, evel-se pa n'eus ket a deodeger e paouez an tabut.

²¹ Ar glaou a zo evit ober regez hag ar c'hoad evit ober tan, evel-se ar rioter a zo evit atizañ an tabutoù.

²² Komzoù an teodeger a zo evel lipouzerezh, mont a reont betek donañ ar c'hof.

²³ Ar muzelloù o teviñ hag ar galon fall a zo evel eon arc'hant da livañ ur pod pri.

²⁴ An hini en deus kasoni a guzh en ur gomz, met en e ziabarzh e tastum touellerezh,

²⁵ pa gomzo dereat, na gred ket anezhañ, rak seizh euzhusted a zo en e galon.

²⁶ An hini a guzh e gasoni gant an touell, a vo dizoloet dirak ar vodadeg.

²⁷ An hini a doull ur poull a gouezho ennañ, hag an hini a ruilh ur maen a welo anezhañ o tistreiñ warnañ.

²⁸ An teod gaouiat a gasa an hini en deus diskaret, hag ar genoù lubanus a laka da gouezhañ.