Krennlavarioù 23 - Bibl Koad 21: Ar Bibl e Brezhoneg evit ar Vretoned

Pennad 23

¹ Pa vi azezet da zebriñ gant ur priñs, evesha ouzh ar pezh a vo dirazout,

² ha laka ur gontell ouzh da c'houzoug, mard out mestroniet gant da naon.

³ Na c'hoanta ket e lipouzerezhioù, rak ur boued touellus eo.

⁴ Na labour ket evit bezañ pinvidik, na laka ket da boell e kement-se.

⁵ Perak teurel da zaoulagad war madoù na vint ken dizale? A-dra-sur en em raint divaskell evel an erer a nij war-zu an neñvoù.

⁶ Na zebr ket bara an den en deus ul lagad fall, ha na c'hoanta ket e lipouzerezhioù,

⁷ rak e kuzh e soñj e-barzh e ene. Debr hag ev, a lavaro dit, met e galon n'emañ ket ganit.

⁸ Disteurel a ri an tamm az po debret, hag e kolli da gomzoù plijus.

⁹ Na gomz ket ouzh skouarn ur sod, rak disprizañ a raio furnez da gomzoù.

¹⁰ Na zilec'h ket ar bonn kozh, ha n'a ket e parkeier an emzivad,

¹¹ rak o dasprener a zo galloudus; eñ a vreutaio o c'haoz a-enep dit.

¹² Stag da galon ouzh kelennadurezh, ha da zivskouarn ouzh gerioù anaoudegezh.

¹³ N'espern ket ar c'hastiz d'ar bugel yaouank, pa ez po skoet warnañ gant ar wialenn, ne varvo ket.

¹⁴ En ur skeiñ warnañ gant ar wialenn, e tieubi e ene diouzh lec'h ar marv.

¹⁵ Va mab, mard eo fur da galon, va c'halon a laouenaio,

¹⁶ ha va lounezhi a drido gant levenez, pa lavaro da vuzelloù traoù reizh.

¹⁷ Ra ne vo ket avius da galon ouzh ar bec'herien, met en em ro dalc'hmat da zoujañs an AOTROU.

¹⁸ Rak a-dra-sur ec'h echuo mat an traoù ganit, ha da c'hortoz ne vo ket touellet.

¹⁹ Te, va mab, selaou ha bez fur, ha ren da galon hervez an hent mat.

²⁰ Na vez ket gant an everien win, na gant ar re a blij dezho ober chervad,

²¹ rak an ever hag al lonker a zeuio paour, hag ar c'housker a vo gwisket gant truilhoù.

²² Selaou da dad, eñ eo en deus roet dit ar vuhez, ha na zispriz ket da vamm pa vo deuet da vezañ kozh.

²³ Pren ar wirionez ha na werzh ket anezhi, pren ar furnez, an deskadurezh hag ar poell.

²⁴ Tad an den reizh a vo laouen-kenañ, hag an hini a vo tad d'ur bugel fur en devo levenez gantañ.

²⁵ Ra laouenaio da dad ha da vamm, ha ra vo leuniet a levenez an hini he deus da c'hanet.

²⁶ Va mab, ro din da galon, ha ra lakaio da zaoulagad evezh ouzh va hentoù.

²⁷ Rak ar ribodez a zo ur poull don, hag an diavaeziadez ur puñs enk.

²⁸ Hi en em zerc'hel e ged evel ul laer, hag e lakaio meur a zen difeal.

²⁹ Da biv ar c'hlemm? Da biv ar gwalleur? Da biv an tabutoù? Da biv an haketerezh? Da biv ar goulioù hep abeg? Da biv ar ruzder en daoulagad?

³⁰ D'ar re a chom e-kichen ar gwin, hag a ya da glask ar gwin mesket.

³¹ Na sell ket ouzh ar gwin pa vez ruz, pa lugern en hanaf ha pa red aezet.

³² A-benn ar fin e krog evel an naer, hag e flemm evel an naer-wiber.

³³ Da zaoulagad a sello ouzh an diavaeziadezed, da galon a lavaro traoù fallakr,

³⁴ hag e vi evel an hini a gousk e-kreiz ar mor, evel an hini a gousk e beg ur wern:

³⁵ Skoet on bet, a lavari, ha ne'm eus ket poan, pilet on bet ha ne'm eus ket klevet. Pa zihunin, ez in adarre da glask.