Krennlavarioù 21 - Bibl Koad 21: Ar Bibl e Brezhoneg evit ar Vretoned

Pennad 21

¹ Kalon ar roue a zo e dorn an AOTROU evel un dour-red, he zreiñ a ra da gement a fell dezhañ.

² Holl hentoù an den a zo eeun dirak e zaoulagad, met an AOTROU eo a bouez ar c'halonoù.

³ Ober ar reizhder hag ar varnedigezh a zo plijusoc'h d'an AOTROU eget an aberzhoù.

⁴ An daoulagad lorc'hus hag ar galon c'hwezhet eo lamp ar re zrouk, ha n'eo nemet pec'hed.

⁵ Soñjoù ar re a zo oberiant a ro fonnusted, met pep den skañbenn a gouezh er baourentez.

⁶ Gounit teñzorioù gant un teod touellus a zo ur vogedenn dec'hus a glask ar marv.

⁷ Laeroñsi ar re zrouk a vo o distruj, rak ne fell ket dezho ober hervez ar varnedigezh.

⁸ Hent an hini kablus a zo troidellus, met an den didamall a labour gant eeunder.

⁹ Gwelloc'h eo bezañ o chom e korn un doenn, eget gant ur wreg rioterez en un ti bras.

¹⁰ Ene an den fall a c'hoanta an droug, hag e nesañ ne gav ket grad-vat dirak e zaoulagad.

¹¹ Pa gastizer ar goapaer, an hini eeun a zeu da vezañ fur, ha pa gelenner an den fur, e tegemer anaoudegezh.

¹² An den reizh a evesha ouzh ti an hini drouk, pa'z eo diskaret ar re zrouk er gwalleur.

¹³ An hini a serr e zivskouarn ouzh kriadenn an ezhommeg, a grio ivez e-unan ha ne vo ket klevet.

¹⁴ An donezon roet e kuzh a sioula ar gounnar, hag an donezon lakaet er bruched a sioula ar fulor brasañ.

¹⁵ Ul levenez eo evit un den reizh ober hervez ar varnedigezh, met ur spouron eo evit ar vicherourien a zireizhder.

¹⁶ An den a bella diouzh hent ar poell, en devo e chomlec'h e bodadenn ar re varv.

¹⁷ An den a gar ar plijadurioù a vo paour, hag an hini a gar ar gwin hag al lard ne vo ket pinvidik.

¹⁸ An hini drouk a vo gopr an den reizh, hag an toueller hini ar re eeun.

¹⁹ Gwelloc'h eo bezañ o chom en ur gouelec'h, eget gant ur wreg rioterez ha buanek.

²⁰ Teñzorioù prizius hag eoul ez eus e chomlec'h an den fur, met an hini diboell a lonk anezho.

²¹ An hini a heuilh ar reizhder hag an drugarez a gavo ar vuhez, ar reizhder hag ar c'hloar.

²² An den fur a bign e-barzh kêr an dud kreñv, hag e tiskar an nerzh a oa he fiziañs.

²³ An hini a vir e c'henoù hag e deod, a vir e ene diouzh an estrenvan.

²⁴ Un den rok ha lorc'hus a zo galvet ur goapaer a labour gant kounnar ha fouge.

²⁵ C'hoant an didalvez a lazh anezhañ, rak ne fell ket d'e zaouarn labourat,

²⁶ ne ra nemet c'hoantaat a-hed an deiz, met an den reizh a ro ha n'espern netra.

²⁷ Aberzh ar re zrouk a zo un euzhusted, pegen muioc'h pa zegasont anezhañ gant mennadoù fall!

²⁸ An test gaouiat a yelo da goll, met an den a selaou a c'hello atav komz.

²⁹ An den drouk a ziskouez lorc'h war e zremm, met an den reizh a starta e hent.

³⁰ N'eus na furnez na meiz na kuzul evit herzel ouzh an AOTROU.

³¹ Ar marc'h a zo prest evit deiz an emgann, met dont a ra an dieubidigezh a-berzh an AOTROU.