Krennlavarioù 16 - Bibl Koad 21: Ar Bibl e Brezhoneg evit ar Vretoned

Pennad 16

¹ Soñjezonoù ar galon a zo e-barzh an den, met respont an teod a zeu eus an AOTROU.

² Holl hentoù an den a seblant glan dezhañ, an AOTROU eo a bouez ar speredoù.

³ Ro da aferioù d'an AOTROU, ha da c'hoantoù a vo startaet.

⁴ An AOTROU en deus graet an holl draoù evel ur respont, an hini drouk zoken evit deiz ar glac'har.

⁵ Pep den lorc'hus a galon a zo un euzhusted evit an AOTROU, koulz pe ziwezhat ne chomo ket digastiz.

⁶ Dre an drugarez hag ar wirionez an direizhder a vo pardonet, ha dre zoujañs an AOTROU e tistroer diouzh an droug.

⁷ Pa blij d'an AOTROU hentoù un den, e sioula en e geñver zoken e enebourien.

⁸ Gwelloc'h eo nebeud gant reizhder, eget leveoù bras hep eeunder.

⁹ Kalon an den a soñj en hec'h hent, met an AOTROU a ren e gammedoù.

¹⁰ Diouganoù a zo war vuzelloù ar roue, hag e c'henoù ne bella ket diouzh an eeunder.

¹¹ Ar valañs hag ar skeuliad leal a zeu eus an AOTROU, hag holl bouezioù ar sac'hig a zo e oberenn.

¹² Ober an droug a zo un euzhusted evit ar rouaned, rak an tron a zo startaet gant ar reizhder.

¹³ Muzelloù reizh a blij d'ar rouaned, hag e karont an hini a gomz gant eeunder.

¹⁴ Fulor ar roue a zo ur c'hannad a varv, met un den fur a sioula anezhañ.

¹⁵ Dremm seder ar roue a ro ar vuhez, hag e c'hrad-vat a zo evel ur goumoulenn a zegas glav an diwezhañ amzer.

¹⁶ Pegen bravoc'h eo degemer furnez eget aour fin! Ha pegen gwelloc'h eo degemer poell eget arc'hant!

¹⁷ Hent an dud eeun eo distreiñ diouzh an droug, hag an hini a laka evezh ouzh e hent a vir e ene.

¹⁸ An ourgouilh a gas dirak an distruj, hag ur spered lorc'hus dirak an diskar.

¹⁹ Gwelloc'h eo bezañ izel a spered gant ar re vihan, eget lodennañ ar preizh gant ar re lorc'hus.

²⁰ An hini a bleustr war un afer gant poell a gavo ar mad, hag an hini a fiz en AOTROU a vo eürus.

²¹ Galvet e vo poellek an hini a zo a galon fur, ha douster ar muzelloù a gresk an anaoudegezh.

²² Ar meiz a zo ur vammenn a vuhez d'ar re a berc'henn anezhi, met deskadurezh ar re ziskiant a zo ar sotoni.

²³ Kalon an den fur a gelenn e c'henoù, hag a laka deskoni war e vuzelloù.

²⁴ Gerioù plijus a zo terennoù mel, douster d'an ene ha yec'hed d'an eskern.

²⁵ Bez' ez eus un hent a seblant eeun d'an den, met a-benn ar fin ez eo hent ar marv.

²⁶ An hini a labour a labour evitañ e-unan, rak rediet eo dre e c'henoù.

²⁷ An den fall a doull an droug, hag e vuzelloù a zo evel un tan o teviñ.

²⁸ An den gwallsiek a had stourmadegoù, hag ar flatrer a zisrann ar vignoned.

²⁹ An den taer a sach e amezeg d'e heul, hag e laka da gerzhout war un hent ha n'eo ket mat.

³⁰ An hini a serr e zaoulagad evit pleustriñ war an droug, an hini a stard e vuzelloù, en deus dija graet an droug.

³¹ Ar blev gwenn a zo ur gurunenn a c'hloar, kavet eo en hent ar reizhder.

³² An hini a zo gorrek da gounnariñ a dalvez muioc'h eget an den kadarn, hag an hini a zo mestr eus e galon eget an den a dap kêrioù.

³³ Taolet e vez d'ar sord e pleg ar sae, met a-berzh an AOTROU eo e teu an disoc'hoù.