Krennlavarioù 13 - Bibl Koad 21: Ar Bibl e Brezhoneg evit ar Vretoned

Pennad 13

¹ Ar mab fur a selaou kelennadurezh e dad, met ar goapaer ne selaou ket ar rebechoù.

² An den en devo e walc'h gant frouezh e c'henoù, met ene ar re widreüs gant taerder.

³ An hini a evesha war e c'henoù a vir e ene, met an hini a zigor e vuzelloù a gavo e goll.

⁴ Ene an didalvez ne ra nemet c'hoantaat ha n'en deus netra, met ene ar re oberiant en devo e walc'h.

⁵ An den reizh a gasa ar gaou, met an hini drouk a zo kasaus hag a gouezh er vezh.

⁶ Ar reizhder a vir an hini a gerzh en eeunder, met an drougiezh a ziskaro ar pec'her.

⁷ Unan en em ra pinvidik ha n'en deus netra, unan all en em ra paour ha koulskoude madoù bras en deus.

⁸ Pinvidigezh un den a zo daspren e vuhez, met ar paour ne c'houzañv ket gourdrouz.

⁹ Sklêrijenn an dud reizh a laouena, met lamp ar re zrouk a vougo.

¹⁰ Al lorc'h ne daol nemet stourmadegoù, met gant ar re a gemer kuzul emañ ar furnez.

¹¹ Ar pinvidigezhioù deuet dre wall hent a vo bihanaet, met an den a zastum dre e labour o c'hresko.

¹² An esperañs daleet a laka ar galon da langisañ, met ar c'hoant sevenet a zo evel ur wezenn a vuhez.

¹³ An hini a zispriz ar gomz en em goll, met an hini a zouj ar gourc'hemenn a vo gopraet.

¹⁴ Lezenn an den fur a zo ur vammenn a vuhez, evit pellaat diouzh antelloù ar marv.

¹⁵ Ur meiz yac'h a ro gras, met hent an douellerien a zo kalet.

¹⁶ Pep den poellek a labour gant ijin, met an hini diboell a ziskouez e sotoni.

¹⁷ Ar c'hannad fall a gouezh en droug, met ar c'hannad leal a zegas ar yec'hed.

¹⁸ Ar baourentez hag an dismegañs a zeuio war an hini a daol kuit ar gelennadurezh, met an hini a selaou ar gourdrouz a vo enoret.

¹⁹ Ar c'hoant kaset da benn a zo c'hwek d'an ene, met distreiñ diouzh an droug a zo euzhus d'an amoeded.

²⁰ An hini a ya gant ar re fur a zeuio fur, met keneil ar sodien en em gollo.

²¹ An droug a red war-lerc'h ar bec'herien, met an eurvad eo gopr an dud reizh.

²² An den mat a dreuzkaso e hêrezh da vibien e vibien, met pinvidigezhioù ar pec'her a zo miret evit an den reizh.

²³ Kalz a zo da zebriñ er park labouret gant ar paour, met tud 'zo hag a ya da goll dre vank a varnedigezh.

²⁴ An hini a espern ar wialenn a gasa e vab, met an hini a gar anezhañ a hast e gastizañ.

²⁵ An den reizh a zebro hag en devo e walc'h, met kof ar re zrouk en devo dienez.