Krennlavarioù 12 - Bibl Koad 21: Ar Bibl e Brezhoneg evit ar Vretoned

Pennad 12

¹ An hini a gar ar reizhadenn a gar an anaoudegezh, met an hini a gasa ar gourdrouz a zo diskiant.

² An den mat a denn warnañ grad-vat an AOTROU, met Doue a gondaono an den a soñjoù gwidreüs.

³ An den ne vo ket startaet dre ar fallagriezh, met gwrizienn ar re reizh ne vo ket brañsellet.

⁴ Ur vaouez vertuzius a zo kurunenn hec'h ozhac'h, met an hini a ra vezh a zo evel breinadur en e eskern.

⁵ Soñjoù ar re reizh a zo eeunder, met alioù ar re zrouk a zo touell.

⁶ Komzoù ar re zrouk a zo antelloù evit skuilhañ ar gwad, met genoù an dud eeun o dieubo.

⁷ Diskaret eo ar re zrouk, n'emaint ken, met ti ar re reizh en em zalc'ho.

⁸ An den a vo meulet hervez e boell, met an hini a zo tuet fall a galon a vo disprizet.

⁹ Gwelloc'h eo bezañ disprizet ha kaout ur servijer, eget en em reiñ gloar ha mankout a vara.

¹⁰ An den reizh a gemer preder gant ene e loen, met trugarez ar re zrouk a zo kriz.

¹¹ An hini a labour e zouar en devo e walc'h a vara, met an hini a heuilh ar re zidalvez a zo dibourvez a skiant.

¹² An hini drouk a c'hoanta ar pezh o deus kemeret ar re fall, met gwrizienn an den reizh a ro frouezh.

¹³ Ur stign euzhus a zo e disentidigezh ar muzelloù, met an den reizh a yelo er-maez eus an estrenvan.

¹⁴ An den en devo e walc'h a vadoù gant frouezh e c'henoù, hag e vo roet da bep hini hervez labour e zaouarn.

¹⁵ Hent an diskiant a zo eeun dirak e zaoulagad, met an hini a selaou an ali a zo fur.

¹⁶ Desped an diskiant a vez anavezet bremañ, met an den poellek a c'holo an dismegañs.

¹⁷ An hini a lavar ar wirionez a gas ar reizhder war-raok, met ur falstest a douell.

¹⁸ Bez' ez eus tud a ra poan evel beg ar c'hleze pa gomzont, met teod ar re fur a zo yec'hed.

¹⁹ Ar vuzell wirion a zo startaet evit biken, met an teod gaouiat n'emañ nemet ur pennad.

²⁰ Touellerezh a zo e kalon ar re a ijin an droug, met levenez a zo evit kuzulierien ar peoc'h.

²¹ Gwalleur ebet n'en em gavo gant an den reizh, met ar re zrouk a vo bec'hiet a boanioù.

²² Ar muzelloù touellus a zo un euzhusted evit an AOTROU, met ar re a ra gant gwirionez a blij dezhañ.

²³ An den poellek a guzh ar pezh a oar, met kalon ar re ziboell a embann sotonioù.

²⁴ Dorn ar re oberiant a reno, met an dorn didalvez a vo mestroniet.

²⁵ Bec'hiet eo an den gant ar glac'har a zo en e galon, met laouenaet eo gant ur gomz vat.

²⁶ An den reizh a zo uheloc'h eget e amezeg, met hent ar re zrouk o c'holl.

²⁷ An didalvez ne rosto ket e jiber, met madoù an den oberiant a zo prizius.

²⁸ E gwenodenn an den reizh emañ ar vuhez, hag e hent ne gas ket d'ar marv.