Krennlavarioù 1 - Bibl Koad 21: Ar Bibl e Brezhoneg evit ar Vretoned

Pennad 1

¹ Krennlavarioù Salomon, mab David, roue Israel,

² evit reiñ da anavezout ar furnez hag an deskadurezh, evit reiñ da gompren ar gerioù meizus,

³ evit ober degemer ur gelennadurezh a boell, a reizhder, a varnedigezh hag a wirionez,

⁴ evit reiñ skiant-vat d'an hini eeun, hag anaoudegezh ha preder d'an den yaouank.

⁵ An den fur a selaouo hag a gresko e ouiziegezh, an den skiantek a zegemero evezhiañs,

⁶ evit kompren ar c'hrennlavarioù hag o zalvoudegezhioù, komzoù ar re fur hag o c'hevrinoù don.

⁷ Doujañs an AOTROU a zo penn-kentañ an anaoudegezh, met ar re ziskiant a zispriz ar furnez hag an deskadurezh.

⁸ Va mab, selaou kentelioù da dad, ha na zilez ket kelennoù da vamm,

⁹ rak ez int grasoù dastumet en-dro da'z penn, ha kelc'hennoù da'z kouzoug.

¹⁰ Va mab, mar fell d'ar bec'herien temptañ ac'hanout, n'asant ket,

¹¹ mar lavaront: Deus ganeomp, savomp antelloù evit lazhañ, stegnomp gripedoù d'an hini didamall hep abeg,

¹² lonkomp anezho holl bev evel lec'h ar marv, hag en o fezh evel ar re a ziskenn er poull,

¹³ kavout a raimp a bep seurt madoù prizius, leuniañ a raimp hon tiez gant diwisk,

¹⁴ da lod az po ganeomp, ne vo nemet ur yalc'h evidomp holl,

¹⁵ va mab, n'a ket en hent ganto, distro da droad diouzh o gwenodenn,

¹⁶ rak o zreid a red d'an droug, hag e hastont da skuilhañ gwad.

¹⁷ Ya, en aner eo e stegner ar roued dirak daoulagad kement holl en deus eskell,

¹⁸ met int a sav antelloù a-enep o gwad o-unan, hag e stegnont gripedoù d'o ene.

¹⁹ Evel-se emañ gwenodennoù an hini a c'hoanta ar gounid dizonest, hag a gollo ene ar re a yelo war e lerc'h.

²⁰ Ar furnez a gri kreñv en diavaez, lakaat a ra he mouezh da dregerniñ dre ar straedoù,

²¹ youc'hal a ra er c'hroashentoù m'en em vod an dud enno, ouzh toull an dorojoù; e kêr e lavar he gerioù:

²² Tud eeun, betek pegeit e karot sotoni? Betek pegeit e kavo ar c’hoapaerien plijadur oc'h ober goap, hag e kasaio ar re ziboell an anaoudegezh?

²³ Distroit pa damallan ac'hanoc'h. Setu, e skuilhin warnoc'h eus va spered, hag e roin deoc'h da gompren va c'homzoù.

²⁴ Dre m'em eus galvet ha n'eo ket fellet deoc'h, dre m'em eus astennet va dorn ha n'en deus den lakaet evezh,

²⁵ dre m'hoc'h eus taolet kuit va holl guzulioù, dre na garit ket va zamalloù,

²⁶ me a c'hoarzho war ho klac'har, goap a rin pa zeuio ho spont,

²⁷ pa zeuio ho spont evel un distruj hag ho reuz evel ur barr-avel, pa zeuio warnoc'h an estrenvan hag an enkrez.

²⁸ Neuze e huchint etrezek ennon, met ne respontin ket, klask a raint ac'hanon mintin mat, met ne'm c'havint ket,

²⁹ rak kasaet o deus an anaoudegezh, ha n'o deus ket dibabet doujañs an AOTROU.

³⁰ N'o deus ket kavet plijadur em c'huzul, ha disprizet o deus va holl c’hourdrouzoù.

³¹ Ra zebrint eta frouezh o hent, ha r'o devo o gwalc'h eus o c'huzulioù o-unan,

³² rak belbi ar re eeun o lazh, ha dibrederi ar re ziboell o c'holl.

³³ Met an hini a selaou ouzhin a vo o chom e surentez, hag a vo seder hep bezañ spontet gant droug ebet.