Koloseiz 4 - Bibl Koad 21: Ar Bibl e Brezhoneg evit ar Vretoned

Pennad 4

¹ Mistri, roit d’ho mevelien ar pezh a zo reizh ha leal, o c’houzout penaos hoc’h eus ivez ur Mestr en neñvoù.

Alioù diwezhañ ha saludoù da glozañ

² Kendalc’hit er bedenn, beilhit e kement-se gant trugarekadennoù.

³ Pedit evidomp ivez, evit ma tigoro Doue deomp un nor evit ar ger, da brezeg mister Krist eo abalamour dezhañ ez on er chadennoù,

⁴ hag evit ma roin d’e anavezout evel ma tlean komz diwar e benn.

⁵ En em renit gant furnez e-keñver ar re a-ziavaez, o tasprenañ an amzer.

⁶ Ra vo atav ho komz leun a c’hras ha temzet gant holen, en un doare da c’houzout respont da bep hini evel ma’z eo dleet.

⁷ Tichik, ar breur karet-mat ha ministr feal, va c’henlabourer e servij an Aotrou, a roio da anavezout deoc’h an traoù a sell ouzhin.

⁸ E gas a ran deoc’h a-ratozh evit ma’c’h anavezo an traoù a sell ouzhoc’h ha ma frealzo ho kalonoù,

⁹ gant Onezim, ar breur feal ha karet-mat hag a zo eus ho touez. Disklêriañ a raint deoc’h kement a dremen amañ.

¹⁰ Aristark, va c’henbrizoniad, a salud ac’hanoc’h, kenkoulz ha Mark kenderv Barnabaz, hoc’h eus resevet urzhioù diwar e benn: Mar d-a d’ho kavout, degemerit anezhañ.

¹¹ Jezuz lesanvet Justuz a salud ivez ac’hanoc’h. Bez’ int eus an amdroc’h hag int eo ar re nemetañ o vezañ kenlabourerien din e rouantelezh Doue hag a zo bet ur frealz evidon.

¹² Epafraz hag a zo eus ho touez a salud ac’hanoc’h. Ur servijer eus Krist eo, ne baouez ket da stourm evidoc’h en e bedennoù, evit ma viot peurvat ha peurc’hraet en holl volontez Doue.

¹³ Rak reiñ a ran outañ an testeni-mañ, penaos en deus ur gred bras evidoc’h, evit re Laodikea hag evit re Hierapoliz.

¹⁴ Lukaz, ar medisin karet-mat, a salud ac’hanoc’h, kenkoulz ha Demaz.

¹⁵ Saludit ar vreudeur a zo e Laodikea, ha Nimfaz hag an Iliz a zo en e di.

¹⁶ Goude ma vo al lizher-mañ bet lennet en ho touez, grit ma vo lennet ivez en Iliz al Laodikeiz ha ma lennot c’hwi ivez an hini eus Laodikea.

¹⁷ Lavarit da Arkipuz: Taol evezh mat ouzh ar ministrerezh ac’h eus resevet en Aotrou evit e seveniñ mat.

¹⁸ Me Paol, a salud ac’hanoc’h eus va dorn va-unan. Ho pet soñj eus va ereoù. Ar c’hras ra vo ganeoc’h! Amen.