Kanenn ar C’hanennoù 4 - Bibl Koad 21: Ar Bibl e Brezhoneg evit ar Vretoned

Pennad 4 (Salomon)

¹ Pegen kaer out, va c'haredig, pegen kaer out! Da zaoulagad a zo koulmed a-drek da ouel. Da vlev a zo evel un tropell givri divilhet ouzh menezioù Galaad.

² Da zent a zo evel un tropell deñved touzet o pignat en-dro eus an dourlec'h, pep unan gant he gevelled, hini ebet n'eo gaonac'h.

³ Da vuzelloù a zo evel un neudenn ruz-mouk, ha da c'henoù a zo boemus. Da jod a zo evel un hanter greunaval a-drek da ouel.

⁴ Da c'houzoug a zo evel tour David, savet da servijañ da harnezerezh; mil skoed a zo skourret outañ, holl dirennoù ar re gadarn.

⁵ Da zivronn a zo evel div heizezig, evel gevelled ur c'hazelenn o peuriñ e-touez al lili.

⁶ A-raok ma c'hwezh avel an deiz ha ma tec'h kuit ar skeudennoù, ez in da venez ar mir ha da grec'hienn an ezañs.

⁷ Hollgaer ez out va c'haredig, ha dinamm.

⁸ Deus ganin eus al Liban, va fried, deus ganin eus al Liban! Sell diwar krec'h Amana, diwar krec'h Senir hag an Hermon, eus kevioù al leoned, eus menezioù al louparded.

⁹ Boemet ec'h eus va c'halon, va c'hoar, va fried, boemet ec'h eus va c'halon gant unan eus da selloù, gant unan eus bragerizoù da c'houzoug.

¹⁰ Pebezh boem ez karantez, va c'hoar, va fried! Pegement eo gwelloc'h da garantez eget ar gwin, ha da c'hwezhioù-mat eget louzoù frondus ebet.

¹¹ Da vuzelloù, va fried, a zever sun-gad. Dindan da deod emañ mel ha laezh, ha c'hwezh da zilhad a zo evel c'hwezh al Liban.

¹² Ul liorzh kloz eo va c'hoar, va fried, ur vammenn serret, ur feunteun siellet.

¹³ Da ganolioù a zo ul liorzh leun a c'hreunavalenned gant frouezh e-touez ar re wellañ, lugustr gant nard,

¹⁴ nard ha safran, korz-frond ha sinamona gant pep seurt gwez a ro an ezañs, mir hag aloez gant louzoù-frondus e-touez ar re wellañ,

¹⁵ ur feunteun a liorzhoù, ur puñs a zour bev, gwazhioù-dour eus al Liban.

(Ar Sulamitez)

¹⁶ Sav, avel-sterenn, ha deus, avel-greisteiz! C'hwezhit war va liorzh evit ma vo laosket e c'hwezh-vat! Ra zeuio va muiañ-karet en e liorzh, ha ra zebro e frouezh e-touez ar re wellañ.