Kanenn ar C’hanennoù 2 - Bibl Koad 21: Ar Bibl e Brezhoneg evit ar Vretoned

Pennad 2

¹ Me eo rozenn Saron, lilienn an traoniennoù.

(Salomon)

² Evel al lilienn e-touez ar spern, evel-se eo va c'haredig e-touez ar merc'hed yaouank.

(Ar Sulamitez)

³ Evel ar wezenn-aval e-touez gwez ar goadeg, evel-se eo va muiañ-karet e-touez an dud yaouank. C'hoantaet em eus he skeud hag on azezet ennañ; he frouezh a oa dous da'm staon.

⁴ Degaset en deus ac'hanon er sal-banvez. Ar banniel a sav warnon eo ar garantez.

⁵ Kreñva ac'hanon gant rezin, nerzh ac'hanon gant avaloù, rak klañv on a garantez.

⁶ Ra vo e zorn kleiz dindan va fenn, ha ra boko e du dehou din!

⁷ Me ho ped, merc'hed Jeruzalem, dre c'hazeled ha dre heizezed ar parkeier, na zihunit ket, na zihunit ket ar garantez, a-raok ma fello dezhi.

⁸ Mouezh va muiañ-karet eo! Setu e teu o lammat war ar menezioù, o sailhañ war ar c'hrec'hiennoù.

⁹ Va muiañ-karet a zo evel ar c'hazelenn pe evel hini bihan an heizez. Setu, en em zalc'h a-drek hor mogerioù, emañ o sellout dre ar prenestroù, oc'h evezhiañ dre ar gael.

¹⁰ Va muiañ-karet a gomz hag a lavar din: Sav, va c'haredig, va c'hoant, ha deus!

¹¹ Rak setu, ar goañv a zo tremenet, ar glav a zo paouezet, aet eo kuit.

¹² Ar bleuñv en em ziskouez war an douar, amzer ar c'hanaouennoù a zo deuet ha mouezh an durzhunell a vez klevet war hor maez.

¹³ Ar wezenn-fiez a vount he fiez, ar gwini, e-kreiz o bleuñv, a laosk o c'hwezh-vat. Sav, va c'haredig, va c'hoant, ha deus!

¹⁴ Va c'houlm, en em zerc'hel a rez e faoutoù ar roc'h hag e kuzhez er brioù serzh. Diskouez din da zremm, va laka da glevout da vouezh, rak da vouezh a zo dous ha da zremm a zo brav.

¹⁵ Kemerit deomp al lern, al lern bihan a wast ar gwini, rak emañ hor gwini en o bleuñv.

¹⁶ Va muiañ-karet a zo din ha me a zo dezhañ. Peuriñ a ra e dropell e-touez al lili.

¹⁷ A-raok ma c'hwezh avel an deiz ha ma tec'h kuit ar skeudennoù, deus en-dro, va muiañ-karet, bez evel ar c'hazelenn pe evel hini bihan an heizez war ar menezioù Beter.