Kanenn ar C’hanennoù 1 - Bibl Koad 21: Ar Bibl e Brezhoneg evit ar Vretoned

Pennad 1

¹ Kanenn ar c'hanennoù, gant Salomon.

(Ar Sulamitez)

² Ra boko din gant pokoù e c'henoù! Rak da garantez a zo gwelloc'h eget ar gwin.

³ Da frondoù o deus ur c'hwezh flour, da anv a zo evel ur frond skuilhet, setu perak o deus da garet ar merc'hed yaouank.

⁴ Va sach war da lerc'h ha redomp! Ar roue en deus degaset ac'hanon en e gambroù. Ni a drido hag a laouenaio ennout. Muioc'h eget ar gwin e veulimp da garantez. Reizh eo da garout.

⁵ O merc'hed Jeruzalem, du on, met kaer evel teltennoù Kedar, evel tinelloù Salomon.

⁶ Na roit ket fed mard on du, rak an heol en deus va skaotet. Mibien va mamm a zo en em fuloret em enep, va lakaet o deus da ziwall ar gwini. Met va gwinienn va-unan, ne'm eus ket he diwallet.

⁷ Lavar din, te hag a zo karet gant va ene, pelec'h e vesaez da dropell ha pelec'h e lakaez anezhañ da ziskuizhañ da greisteiz. Rak, perak e vefen evel ur wreg diank e-kichen tropelloù da gompagnuned?

(Salomon)

⁸ Ma n'ouzout ket-se, o te ar gaerañ e-touez ar merc'hed, kae war roudoù an tropell, ha laka da c'havrigoù da beuriñ e-kichen teltennoù ar vesaerien.

⁹ Va c'haredig, da lakaat a ran heñvel ouzh va c'hazeg staget ouzh kirri Faraon.

¹⁰ Koant eo da zivjod gant o bragerizoù, ha da c'houzoug gant e gelc'hennoù.

¹¹ Ober a raimp dit bragerizoù aour gant gwrioù arc'hant.

(Ar Sulamitez)

¹² E-pad ma'z eo ar roue azezet ouzh taol, va nard a laosk e c'hwezh-vat.

¹³ Va muiañ-karet a zo din evel ur vodenn mir a ziskuizh etre va divronn.

¹⁴ Va muiañ-karet a zo din ur blokad lugustr e gwini En-Gedi.

(Salomon)

¹⁵ Pegen kaer out, va c'haredig, pegen kaer out! Da zaoulagad a zo koulmed.

(Ar Sulamitez)