Jozue 22 - Bibl Koad 21: Ar Bibl e Brezhoneg evit ar Vretoned

Pennad 22 Kudenn diwar-benn un aoter

¹ Jozue a c'halvas ar Rubeniz, ar C'hadiz hag hanter-veuriad Manase,

² hag e lavaras dezho: Miret hoc'h eus kement en doa gourc'hemennet deoc'h Moizez servijer an AOTROU , sentet hoc'h eus ouzhin e kement em eus gourc'hemennet deoc'h,

³ n'hoc'h eus ket dilezet ho preudeur e-pad an amzer hir-se betek hiziv, ha miret hoc'h eus karg urzhioù an AOTROU ho Toue.

⁴ Bremañ an AOTROU ho Toue en deus roet diskuizh d'ho preudeur, evel m'en doa lavaret. Distroit eta bremañ, kit d'ho teltennoù, d'ar vro a zo deoc'h, an hini en deus roet deoc'h Moizez servijer an AOTROU en tu all d'ar Jordan.

⁵ Eveshait da virout ar gourc'hemennoù hag al lezenn en deus roet deoc'h Moizez servijer an AOTROU ha grit diouto, karit an AOTROU ho Toue, kerzhit en e holl hentoù, mirit e c'hourc'hemennoù, en em stagit outañ, servijit anezhañ eus hoc'h holl galon hag eus hoc'h holl ene.

⁶ Jozue a vennigas anezho hag o c'hasas kuit, hag ez ejont d'o zeltennoù.

⁷ Moizez en doa roet da un hanter eus meuriad Manase ul lodenn e Basan, ha Jozue a roas d'an hanter all ul lodenn gant o breudeur en tu-mañ d'ar Jordan, er c'huzh-heol. Pa gasas Jozue anezho d'o zeltennoù, e vennigas anezho,

⁸ hag e lavaras dezho: Distreiñ a rit d'ho teltennoù gant pinvidigezhioù bras ha gant loened niverus, gant arc'hant, gant aour, gant arem, gant houarn, gant dilhad e-leizh; lodennit an diwisk eus hoc'h enebourien gant ho preudeur.

⁹ Mibien Ruben, mibien Gad hag hanter-veuriad Manase a zistroas hag a yeas kuit a-zigant mibien Israel, eus Silo a zo e bro Ganaan, evit mont da vro C'halaad, d'ar vro a berc'hennent, e-lec'h m'o doa bet o dalc'h, hervez gourc'hemenn an AOTROU dre c'henoù Moizez.

¹⁰ Dont a rejont da rann-vro ar Jordan, a zo e bro Ganaan; mibien Ruben, mibien Gad hag hanter-veuriad Manase a savas eno un aoter tost d'ar Jordan, un aoter a ziskouez bras.

¹¹ Mibien Israel a glevas lavarout: Mibien Ruben, mibien Gad hag hanter-veuriad Manase o deus savet un aoter a-dal da vro Ganaan, e rann-vro ar Jordan, en tu all da vibien Israel.

¹² Mibien Israel a glevas kement-se, hag holl vodadenn mibien Israel en em zastumas e Silo, evit pignat d'ober brezel dezho.

¹³ Mibien Israel a gasas Fineas mab Eleazar an aberzhour da gavout mibien Ruben, mibien Gad hag hanter-veuriad Manase, da vro C'halaad,

¹⁴ ha dek priñs gantañ, ur priñs dre bep ti tadel eus pep meuriad Israel. Pep hini anezho a oa ur penn eus e di tadel e-touez milieroù Israel.

¹⁵ Dont a rejont da gavout mibien Ruben, mibien Gad hag hanter-veuriad Manase, da vro C'halaad, hag e komzjont outo o lavarout:

¹⁶ Evel-henn he deus lavaret holl vodadenn an AOTROU: Petra eo an torfed-se hoc'h eus graet a-enep Doue Israel? Perak hoc'h eus en em zistroet hiziv diouzh an AOTROU en ur sevel un aoter evit enebiñ hiziv ouzh an AOTROU?

¹⁷ Ha re nebeut e oa direizhder Peor, ha n'omp ket glanaet dioutañ betek hiziv, daoust d'ar gouli deuet war vodadenn an AOTROU ,

¹⁸ ma en em zistroit hiziv diouzh an AOTROU? Enebiñ a rit hiziv ouzh an AOTROU , ha warc'hoazh e fuloro a-enep holl vodadenn Israel!

¹⁹ Mard eo dic'hlan ar vro a berc'hennit, tremenit er vro a zo d'an AOTROU , e-lec'h ma chom tabernakl an AOTROU , hag e vo ho talc'h en hon touez. Met n'enebit ket ouzh an AOTROU ha na bellait ket diouzhimp, en ur sevel un aoter deoc'h, ouzhpenn aoter an AOTROU hon Doue.

²⁰ Akan mab Zerak, ha ne reas ket un torfed en ur gemer traoù lakaet da verz? Ha ne gouezhas ket fulor an AOTROU war holl vodadenn Israel? An den-se ne varvas ket e-unan evit e zireizhder.

²¹ Mibien Ruben, mibien Gad hag hanter-veuriad Manase a respontas, o lavarout da bennoù milieroù Israel:

²² Doue, an AOTROU Doue, Doue, an AOTROU Doue a anavez, hag Israel a anavezo, mard eo dre zispac'h ha mard eo evit un torfed a-enep an AOTROU , na zeuio ket eñ d'hor sikour hiziv!

²³ Ma hon eus savet un aoter evit en em zistreiñ diouzh an AOTROU , ha mard eo evit kinnig warni loskaberzhoù ha donezonoù, pe evit profañ aberzhoù a drugarekadennoù, ra c'houlenno kont an AOTROU e-unan,

²⁴ met graet hon eus kement-se rak aon hon eus na lavarfe en amzer da zont ho mibien d'hor mibien: Petra hoc'h eus d'ober gant an AOTROU Doue Israel?

²⁵ Lakaet en deus an AOTROU ar Jordan evit harz etre ni ha c'hwi, mibien Ruben ha mibien Gad, n'hoc'h eus lod ebet en AOTROU . Hag evel-se e paouezo hor mibien da zoujañ an AOTROU , en abeg d'ho mibien.

²⁶ Lavaret hon eus: Labouromp da sevel un aoter, ha ne vo ket evit loskaberzhoù nag evit aberzhoù,

²⁷ met evit ma vo un test etre hor rummadoù war hol lerc'h, evit ma c'hellimp servijañ an AOTROU dirazañ, gant hol loskaberzhoù, hon aberzhoù, hon aberzhoù a drugarekadennoù, evit na lavaro ket en amzer da zont ho mibien d'hor mibien: N'hoc'h eus lod ebet en AOTROU .

²⁸ Lavaret hon eus: Pa gomzint evel-se, deomp pe d'hor rummadoù war hol lerc'h, e lavarimp: Gwelit stumm aoter an AOTROU o deus graet hon tadoù, ha ne oa ket evit loskaberzhoù nag evit aberzhoù, met evit ma vefe un test etre ni ha c'hwi.

²⁹ Pell diouzhimp dispac'hañ a-enep an AOTROU pe en em zistreiñ hiziv diouzh lerc'h an AOTROU , en ur sevel un aoter evit loskaberzhoù, donezonoù pe aberzhoù, ouzhpenn aoter an AOTROU hon Doue a zo dirak e dabernakl!

³⁰ Pa glevas Fineas an aberzhour, priñsed ar vodadenn ha pennoù milieroù Israel a oa gantañ ar c'homzoù a lavaras mibien Ruben, mibien Gad ha mibien Manase, e voent sederaet.

³¹ Fineas mab Eleazar an aberzhour a lavaras da vibien Ruben, da vibien Gad ha da vibien Manase: Gouzout a reomp hiziv emañ an AOTROU en ho touez, pa n'hoc'h eus ket graet an torfed-se a-enep an AOTROU ; bremañ hoc'h eus dieubet mibien Israel eus dorn an AOTROU .

³² Fineas mab Eleazar an aberzhour hag ar briñsed a zistroas digant mibien Ruben ha digant mibien Gad eus bro C'halaad da vro Ganaan, da gavout mibien Israel ha da rentañ dezho kont.

³³ Mibien Israel a voe sederaet gant kement-se, mibien Israel a vennigas Doue, ha ne gomzjont ken da bignat d'ober brezel dezho evit distrujañ ar vro m'edo o chom enni mibien Ruben ha mibien Gad.

³⁴ Mibien Ruben ha mibien Gad a c'halvas an aoter Ed, rak test eo, emañ an AOTROU Doue etrezomp.