Jozue 21 - Bibl Koad 21: Ar Bibl e Brezhoneg evit ar Vretoned

Pennad 21 Kêrioù al Levited

¹ Pennoù-tadel al Levited a dostaas ouzh Eleazar an aberzhour, ouzh Jozue mab Nun, hag ouzh pennoù-tadel meuriadoù mibien Israel,

² hag e komzjont outo e Silo, e bro Ganaan, o lavarout: An AOTROU en deus gourc'hemennet dre c'henoù Moizez reiñ deomp kêrioù evit chom enno, gant an douaroù tro-dro evit hol loened.

³ Mibien Israel a roas eus o hêrezh d'al Levited, hervez gourc'hemenn an AOTROU , ar c'hêrioù-mañ gant an douaroù tro-dro.

⁴ Ar sord a zegouezhas da diegezhioù ar Gehatited. Ha mibien Aaron an aberzhour, a-douez al Levited, o doe dre ar sord trizek kêr, diwar veuriad Juda, diwar veuriad Simeon ha diwar veuriad Benjamin.

⁵ Mibien all Kehad o doe dre ar sord dek kêr diwar diegezhioù meuriad Efraim, diwar veuriad Dan ha diwar hanter-veuriad Manase.

⁶ Mibien Gershon o doe dre ar sord trizek kêr diwar diegezhioù meuriad Isakar, diwar veuriad Aser, diwar veuriad Neftali ha diwar hanter-veuriad Manase e Basan.

⁷ Mibien Merari, hervez o ziegezhioù, o doe daouzek kêr diwar veuriad Ruben, diwar veuriad Gad ha diwar veuriad Zabulon.

⁸ Mibien Israel a roas d'al Levited, dre ar sord, ar c'hêrioù-se gant an douaroù tro-dro, evel m'en doa gourc'hemennet an AOTROU dre c'henoù Moizez.

⁹ Reiñ a rejont eta diwar veuriad mibien Juda ha diwar veuriad mibien Simeon ar c'hêrioù-mañ, a vo galvet dre o anvioù.

¹⁰ Evit mibien Aaron, eus tiegezh ar Gehatited, a oa mibien Levi, a voe al lodenn gentañ degouezhet evito,

¹¹ e voe roet: Kirjad-Arba, tad Anak, a zo Hebron, e menez Juda, gant an douaroù tro-dro;

¹² parkoù kêr hag he c'hêriadennoù a voe roet da Galeb mab Jefune, evit e zalc'h;

¹³ roet e voe eta da vibien Aaron an aberzhour ar gêr-repuiñ evit ar vuntrerien Hebron gant he douaroù, Libna gant he douaroù,

¹⁴ Jattir gant he douaroù, Eshtemoa gant he douaroù,

¹⁵ Holon gant he douaroù, Debir gant he douaroù,

¹⁶ Ain gant he douaroù, Juta gant he douaroù, Bet-Shemesh gant he douaroù, nav c'hêr diwar an daou veuriad-se;

¹⁷ diwar veuriad Benjamin, Gabaon gant he douaroù, Geba gant he douaroù,

¹⁸ Anatod gant he douaroù, Almon gant he douaroù, peder c'hêr.

¹⁹ Holl gêrioù an aberzhourien mibien Aaron: trizek kêr gant o douaroù.

²⁰ Tiegezhioù mibien Kehad, al Levited all eus mibien Kehad, o doe en o lodenn kêrioù diwar veuriad Efraim,

²¹ roet e voe dezho ar gêr-repuiñ evit ar vuntrerien Sichem gant he douaroù e menez Efraim, Gezer gant he douaroù,

²² Kibzaim gant he douaroù, Bet-Horon gant he douaroù, peder c'hêr;

²³ diwar veuriad Dan, Elteke gant he douaroù, Gibbeton gant he douaroù,

²⁴ Ajalon gant he douaroù, Gad-Rimmon gant he douaroù, peder c'hêr;

²⁵ diwar hanter-veuriad Manase, Taanak gant he douaroù, Gad-Rimmon gant he douaroù, div gêr.

²⁶ Holl gêrioù tiegezhioù mibien all Kehad: dek gant o douaroù.

²⁷ Mibien Gershon eus tiegezh al Levited o doe diwar hanter-veuriad Manase ar gêr-repuiñ evit ar vuntrerien Golan e Basan gant he douaroù, Beeshtera gant he douaroù, div gêr;

²⁸ diwar veuriad Isakar, Kishjon gant he douaroù, Dabrad gant he douaroù,

²⁹ Jarmud gant he douaroù, En-Gannim gant he douaroù, peder c'hêr;

³⁰ diwar veuriad Aser, Misheal gant he douaroù, Abdon gant he douaroù,

³¹ Helkad gant he douaroù, Reob gant he douaroù, peder c'hêr;

³² diwar veuriad Neftali, ar gêr-repuiñ evit ar vuntrerien Kedesh e Galilea gant he douaroù, Hammod-Dor gant he douaroù, Kartan gant he douaroù, teir c'hêr.

³³ Holl gêrioù tiegezhioù ar C'hershonited: trizek kêr gant o douaroù.

³⁴ Tiegezhioù mibien Merari, al Levited all, o doe diwar veuriad Zabulon, Jokneam gant he douaroù, Karta gant he douaroù,

³⁵ Dimna gant he douaroù, Nahala gant he douaroù, peder c'hêr;

³⁶ diwar veuriad Ruben, Bezer gant he douaroù, Jahza gant he douaroù,

³⁷ Kedemod gant he douaroù, Mefaad gant he douaroù, peder c'hêr;

³⁸ diwar veuriad Gad, ar gêr-repuiñ evit ar vuntrerien Ramod e Galaad gant he douaroù, Mahanaim gant he douaroù,

³⁹ Hesbon gant he douaroù, Jaezer gant he douaroù, peder c'hêr.

⁴⁰ Holl gêrioù tiegezhioù mibien Merari, tiegezhioù all al Levited, o lodenn a voe daouzek kêr.

⁴¹ Holl gêrioù al Levited e-kreiz dalc'hoù mibien Israel: eizh kêr ha daou-ugent gant o douaroù.

⁴² Pep hini eus ar c'hêrioù-se he devoa he douaroù tro-dro; evel-se e oa evit an holl gêrioù-se.

⁴³ An AOTROU a roas da Israel an holl vro en doa touet reiñ d'o zadoù. He ferc'hennjont hag e voent o chom enni.

⁴⁴ An AOTROU a roas dezho diskuizh a bep kostez, evel m'en doa touet d'o zadoù, hag hini ebet eus o enebourien ne zalc'has dirazo; an AOTROU a lakaas o holl enebourien etre o daouarn.

⁴⁵ Ne c'hwitas komz ebet an holl gomzoù mat lavaret gant an AOTROU da di Israel, kement tra a voe peurc'hraet.