Jozue 16 - Bibl Koad 21: Ar Bibl e Brezhoneg evit ar Vretoned

Pennad 16 Lodenn roet da Efraim

¹ Setu al lodenn degouezhet dre ar sord da vibien Jozef. En em astenn a rae adalek ar Jordan e-kichen Jeriko da zoureier Jeriko ouzh ar reter, betek ar gouelec'h a bign eus Jeriko da venez Betel,

² hag ez ae eus Betel da Luz, hag e tremene war harz an Arkianed en Atarod,

³ hag e tiskenne war-zu ar c'huzh-heol da harz ar Jafletiz ha da harz Bet-Horon-Izel, ha betek Gezer, hag e tape ar mor.

⁴ Evel-se mibien Jozef, Manase hag Efraim, o doe o hêrezh.

⁵ Setu harz mibien Efraim hervez o ziegezhioù. Harz reter o hêrezh a oa eus Atarod-Adar betek Bet-Horon-Uhel,

⁶ hag ez ae an harz war-zu ar mor da Vikmetad en hanternoz, hag e troe an harz war-zu ar sav-heol etrezek Taanad-Silo, hag e tremene war-zu ar sav-heol dre Janoak,

⁷ hag e tiskenne eus Janoak da Atarod ha da Naarad, hag e tizhe Jeriko, hag e tape ar Jordan,

⁸ hag ez ae an harz eus Tappuak war-zu ar c'huzh-heol betek froud Kanah, hag e tape ar mor. Hennezh e voe hêrezh mibien Efraim hervez o ziegezhioù.

⁹ Mibien Efraim o doa ivez kêrioù distag e-kreiz hêrezh mibien Manase, kêrioù gant o c'hêriadennoù.

¹⁰ Hogen ne gasjont ket kuit ar Gananeiz a oa o chom e Gezer, hag ez eus bet Kananeiz o chom e-touez Efraim betek hiziv, o servijañ evel sklaved.