Jozue 14 - Bibl Koad 21: Ar Bibl e Brezhoneg evit ar Vretoned

Pennad 14 Kaleb a resev Hebron da hêrezh

¹ Setu amañ hêrezh mibien Israel e bro Ganaan, ar pezh a lodennas dezho evel hêrezh Eleazar an aberzhour, Jozue mab Nun, ha pennoù-tadel meuriadoù mibien Israel.

² O hêrezh a voe roet dezho dre ar sord, evel m'en doa gourc'hemennet an AOTROU dre Voizez evit an nav meuriad hag an hanter-veuriad.

³ Rak Moizez en doa roet o hêrezh da zaou veuriad ha d'un hanter-veuriad en tu all d'ar Jordan, met n'en devoa ket roet a hêrezh d'al Levited en o zouez.

⁴ Mibien Jozef a rae daou veuriad, Manase hag Efraim, ha ne voe ket roet a lod d'al Levited er vro, nemet kêrioù da chom enno gant o douaroù tro-dro evit o chatal hag evit o madoù.

⁵ Mibien Israel a reas evel m'en doa gourc'hemennet an AOTROU da Voizez, hag e lodennjont ar vro.

⁶ Mibien Juda a dostaas ouzh Jozue e Gilgal, ha Kaleb mab Jefune ar C'henizian a lavaras: Gouzout a rez ar pezh en deus lavaret an AOTROU da Voizez den Doue e Kadesh-Barnea.

⁷ Oadet a zaou-ugent vloaz e oan pa gasas Moizez servijer an AOTROU ac'hanon eus Kadesh-Barnea evit spiañ ar vro, hag e rentis dezhañ kont en eeunder va c'halon.

⁸ Va breudeur a oa pignet ganin a lakaas kalon ar bobl da deuziñ, met me a heulias en holl leunder an AOTROU va Doue.

⁹ Moizez a douas en deiz-se o lavarout: A-dra-sur an douar en deus mac'het da droad a vo da viken un hêrezh evidout hag evit da vibien, dre ma ec'h eus heuliet en holl leunder an AOTROU va Doue.

¹⁰ Ha bremañ, setu, an AOTROU en deus miret din va buhez, evel m'en doa lavaret. Bez' ez eus pemp bloaz ha daou-ugent abaoe m'en deus lavaret an AOTROU ar gomz-se da Voizez, pa gerzhe Israel er gouelec'h, hag hiziv, setu, em eus an oad a bemp bloaz ha pevar-ugent.

¹¹ Hag ez on c'hoazh hiziv ken nerzhus hag en deiz ma kasas ac'hanon Moizez; bez' em eus bremañ an hevelep nerzh hag an hini em boa neuze evit ar brezel hag evit mont ha dont.

¹² Ro din eta ar menez en doa komzet an AOTROU diwar e benn en deiz-se, rak klevet ec'h eus en deiz-se edo an Anakim eno, gant kêrioù bras ha kreñv. Marteze e vo an AOTROU ganin hag e kasin anezho kuit, evel m'en deus lavaret an AOTROU .

¹³ Jozue a vennigas anezhañ, hag e roas Hebron da Galeb mab Jefune da hêrezh.

¹⁴ Setu perak e voe Hebron da Galeb mab Jefune ar C'henizian da hêrezh betek hiziv, dre m'en doa heuliet en holl leunder an AOTROU Doue Israel.

¹⁵ Anv Hebron a oa gwechall Kirjad-Arba, hag a oa bet un den galloudek e-touez an Anakim. Hag ar vro a voe sioul hep brezel.