Jeremiaz 48 - Bibl Koad 21: Ar Bibl e Brezhoneg evit ar Vretoned

Pennad 48

¹ Diwar-benn Moab, evel-henn e komz AOTROU an armeoù, Doue Israel: Gwalleur da Nebo, rak gwastet eo! Kirjataim a zo mezhek, tapet eo. Ar gêr greñv a zo mezhet ha spontet.

² Moab n'he deus ken da dennañ gloar eus Hesbon, ijinet eo bet droug a-enep dezhi: Deuit, distrujomp hi a-douez ar broadoù! Ha te ivez, Madmen, te a vo distrujet, hag ar c'hleze a yelo war da lerc'h.

³ Ur vouezh o c'harmiñ a zeu eus Horonajim, freuz ha distruj bras.

⁴ Moab a zo brevet, e re vihan a ra klevout o c'hriadennoù.

⁵ Pignat a reor en ur ouelañ savenn Lukid, hag e klevor garmoù a enkrez o tont eus diskenn Horonajim en abeg d'an enebourien.

⁶ Tec'hit, savetait ho puhez! Hag e viot evel en noazh en ur gouelec'h.

⁷ Peogwir ec'h eus fiziet ez labourioù hag ez teñzorioù, e vi tapet ivez. Ha Kemosh a yelo d'an harlu, gant hec'h aberzhourien hag he fennoù.

⁸ An distrujer a yelo en holl gêrioù, ha kêr ebet na dec'ho. An draonienn a vo rivinet hag ar blaenenn a vo distrujet, hervez ar pezh en deus lavaret an AOTROU.

⁹ Roit eskell da Voab, rak a-dra-sur e nijo. E gêrioù a zeuio da vezañ ur gouelec'h, ne vo den o chom enno.

¹⁰ Ra vo milliget an hini a raio labour an AOTROU gant leziregezh, ha ra vo milliget an hini a zinac'ho ouzh e gleze ar gwad!

¹¹ Moab a oa sioul abaoe e yaouankiz, diskuizhañ a rae war e lec'hidenn, ne oa ket bet taolet eus ul lestr d'egile, n'eo ket aet d'an harlu, evel-se e vlaz a zo chomet gantañ hag e c'hwezh n'eo ket bet cheñchet.

¹² Setu e teu an deizioù, eme an AOTROU, ma kasin dezhañ tud a dreuzlestro anezhañ, a c'houllondero e listri, a lakaio e seier-lêr a-dammoù.

¹³ Ha Moab a vo mezhek eus Kemosh, evel ma'z eo bet ti Israel mezhek eus Betel, a oa e fiziañs.

¹⁴ Penaos e lavarit: Ni a zo tud galloudek ha kadarn em emgann?

¹⁵ Moab a zo drailhet, e gêrioù a bign e moged, an dibab eus e dud yaouank a ziskenn d'al lazhadeg, eme ar Roue a zo e anv AOTROU an armeoù.

¹⁶ Diskar Moab a zo tost, hag e walleur a ya buan war-raok.

¹⁷ Ha c'hwi holl a anavez e anv, lavarit: Penaos eo bet torret ar walenn nerzhus-se, ar vazh veurdezus-se?

¹⁸ Diskenn eus da c'hloar hag azez war an douar krazet, annezadez, merc'h Dibon! Rak distrujer Moab a bign a-enep dit, diskaret en deus da greñvlec'hioù.

¹⁹ En em zalc'h war an hent ha sell, annezadez Aroer! Goulenn ouzh an tec'had hag ouzh an hini a ya kuit, lavar: Petra a zo c'hoarvezet?

²⁰ Moab a zo mezhek, rak brevet eo bet. Huanadit ha yudit! Embannit war an Arnon ez eo drailhet Moab,

²¹ hag ez eo deuet ar varn war vro ar blaenenn, war Holon, war Jahaz, war Vefaad,

²² war Zibon, war Nebo, war Vet-Diblataim,

²³ war Girjataim, war Vet-Gamul, war Vet-Meon,

²⁴ war Geriod, war Vozra, war holl gêrioù bro Voab, pell pe tost.

²⁵ Korn Moab a zo troc'het, hag e vrec'h a zo torret, eme an AOTROU.

²⁶ Mezvit eñ, rak eo savet a-enep an AOTROU. Ra en em ruilho Moab en e c'hwedadenn, ha ra vo eñ ivez ur c'hoapadenn.

²⁷ Ha ne oa ket bet Israel ur c'hoapadenn evidout? Daoust hag e oa e-touez al laeron, ma hejez da benn adalek ma komzez dioutañ?

²⁸ Tud Moab, dilezit ar c'hêrioù ha chomit er reier, bezit evel ar goulm, a ra he neizh ouzh digor ur vougev.

²⁹ Klevet hon eus lorc'h Moab, lorc'hus-tre eo, e rogentez, e lorc'h, e ourgouilh, e galon c'hwezet.

³⁰ Anavezout a ran, eme an AOTROU, e fouge; aner eo e vrabañserezh, aner eo o oberennoù.

³¹ Setu perak e hirvoudin war Voab, garmiñ a rin diwar-ben Moab a-bezh. War dud Kir-Heres e huanador.

³² Gwinienn Sibma, warnout e ouelin muioc'h eget war Jaezer, da vrankoù a yae dreist ar mor, hag e tapent mor Jaezer. An distrujer a zo kouezhet war da frouezh-hañv ha war da vendem.

³³ Ar joa hag al levenez a zo aet kuit eus ar parkeier frouezhus hag eus bro Voab, hag em eus hesket ar gwin er gwaskerelloù. Ne vo ken jaodret gant youc'hoù, met kriadennoù a vrezel a vo, ha nann kriadennoù a levenez.

³⁴ En abeg da c'harmoù Hesbon e reont klevout o mouezh betek Eleale ha betek Jahaz, adalek Zoar betek Horonajim ha betek Eglad-Shelishija, rak doureier Nimrim a vo ivez glac'haret.

³⁵ Me a raio, eme an AOTROU, na vo den ebet ken e Moab o pignat war an uhellec'hioù evit kinnig ezañs d'e zoueoù.

³⁶ Setu perak va c'halon a huanado war Voab evel fleütoù, va c'halon a huanado evel fleütoù war dud Kir-Heres, dre ma'z eo kollet an teñzorioù o deus dastumet.

³⁷ Rak pep penn a vo moal, pep barv a vo troc'het, war bep dorn e vo flañchoù, ha war an divgroazell e vo seier.

³⁸ War holl doennoù Moab ha war e leurioù, pep tra a vo kañvoù, rak brevet em bo Moab evel ul lestr a zisplij, eme an AOTROU.

³⁹ Huanadit: Penaos eo bet torret? Penaos e tro kein Moab en e vezh? Moab a vo ur c'hoapadenn hag ur spont evit an holl re a vo en-dro dezhañ.

⁴⁰ Rak evel-henn e komz an AOTROU: Setu emañ o nijal evel un erer, hag ec'h astenno e eskell war Voab.

⁴¹ Keriod a zo kemeret, e greñvlec'hioù a zo tapet, kalon brezelerien Moab a vo, en deiz-se, evel kalon ur vaouez er poanioù.

⁴² Moab a vo distrujet, ne vo ken ur bobl, rak en em savet eo a-enep an AOTROU.

⁴³ Warnout e vo ar spont, ar poull hag ar roued, o Moabad, eme an AOTROU.

⁴⁴ An hini a dec'h dirak ar spont a gouezho er poull, an hini a adpigno eus ar poull a vo tapet er roued. Rak warnañ, war Voab, e lakain da zont bloavezh e varnedigezh, eme an AOTROU.

⁴⁵ Dindan skeud Hesbon ec'h ehan an dec'hidi dre ziouer a nerzh, un tan a zeuio eus Hesbon, hag ur flamm eus kreiz Sihon, a lonko ur c'hostez eus Moab, ha lein penn mibien an tousmac'h.

⁴⁶ Gwalleur dit Moab! Kollet eo pobl Gemosh! Rak da vibien a zo kaset en harlu, ha da verc'hed en harlu.

⁴⁷ Koulskoude, en deizioù diwezhañ, ec'h adsavin harluidi Moab. Betek amañ ez a barnedigezh Moab.