Izaia 9 - Bibl Koad 21: Ar Bibl e Brezhoneg evit ar Vretoned

Pennad 9

¹ Ar bobl a gerzhe en deñvalijenn he deus gwelet ur sklêrijenn vras, hag ar sklêrijenn he deus lugernet war ar re a oa o chom e bro skeud ar marv.

² Liesaet ec'h eus ar vroad, kresket ec'h eus he levenez, laouenaat a reont dirazout, evel ma laouenaer da vare an eost, evel ma youc'her gant levenez o lodennañ an diwisk.

³ Rak torret ec'h eus ar yev a boueze warno, hag ar vazh a skoe gant o divskoaz, gwialenn o gwasker, evel en deiz Madian.

⁴ Pep botez a zo douget gant ar brezelour er veskadeg, hag an dilhad ruilhet er gwad, a vo devet ha lonket gant ar flammoù.

⁵ Rak ur bugel a zo ganet deomp, ur mab a zo roet deomp, ar galloud a zo bet lakaet war e zivskoaz, ha galvet e vo: Burzhudus, Kuzulier, Doue kreñv, Tad peurbadus, Priñs ar peoc'h.

⁶ Kreskiñ e c'halloud, reiñ ur peoc'h diziwezh da dron David ha d'e rouantelezh, evit en startaat hag en harpañ er varnedigezh hag er reizhder, adalek bremañ ha da viken, gred AOTROU an armeoù a raio kement-se.

⁷ An Aotrou en deus kaset ur gomz da Jakob, kouezhet eo war Israel.

⁸ Ar bobl a-bezh en devo anaoudegezh a gement-se, Efraim ha tud Samaria, ar re a lavar gant lorc'h ha rogentez en o c'halon:

⁹ Kouezhet eo ar brikennoù, met gant mein-ben e savimp! Troc'het eo bet ar gwez-sikomor, met gwez-sedrez a lakaimp en o lec'h!

¹⁰ An AOTROU a savo enebourien Rezin a-enep ar bobl, hag a atizo o eneberien,

¹¹ ar Siria dre a-raok hag ar Filistined dre a-dreñv, hag e lonkint Israel a-leizh o genoù. Ha ne zigounnar ket, e zorn a zo atav astennet.

¹² Ar bobl ne zistro ket d'an hini a sko ganti, ne glask ket AOTROU an armeoù.

¹³ An AOTROU a lamo kuit eus Israel ar penn hag al lost, ar balmezenn hag ar vroenenn, en hevelep deiz.

¹⁴ Ar penn eo an henaour hag an den enoret, al lost eo ar profed a gelenn ar gaou.

¹⁵ Renerien ar bobl-mañ a ziank anezhi, hag ar re a zo renet drezo en em goll.

¹⁶ Setu perak an AOTROU ne gavo ket a blijadur en o zud yaouank, ha n'en devo ket a druez ouzh o emzivaded nag ouzh o intañvezed, rak n'int holl nemet tud fall ha drouk, pep genoù a lavar euzhusted. Ha ne zigounnar ket, e zorn a zo atav astennet.

¹⁷ Rak an drougiezh a zev evel un tan a lonk drez ha spern, deviñ a raio al lec'hioù stankañ eus ar c'hoadoù, ma sav kolonennoù moged.

¹⁸ En abeg da gounnar AOTROU an armeoù, an douar a zo entanet, hag ar bobl a zeu da vezañ preizh an tan, den ne espern e vreur.

¹⁹ Regiñ a reer a-zehou hag o devo naon, lonkañ a reer a-gleiz ha n'o devo ket o gwalc'h, pep hini a zebro kig e vrec'h.

²⁰ Manase a-enep Efraim, Efraim a-enep Manase, o-daou a-enep Juda, ha ne zigounnar ket, e zorn a zo atav astennet.