Izaia 54 - Bibl Koad 21: Ar Bibl e Brezhoneg evit ar Vretoned

Pennad 54

¹ Laouena, gaonac'h, te na c'hanes ket, strak ha laosk kriadennoù a levenez, te na c'houzañves ket gwentloù ar gwilioud, rak mibien an hini dilezet a vo niverusoc'h eget re ar wreg he doa ur pried, eme an AOTROU.

² Ledana tachad da deltenn, astenn dizamant stignoù da dinelloù, hira da gerdin, starta da beulioù,

³ rak en em ledañ a ri a-zehou hag a-gleiz, da lignez a berc'henno ar broadoù, hag a vo o chom e kêrioù bet dismantret.

⁴ Na'z pez ket aon, ne vi ket dismegañset ha ne vi ket mezhekaet, rak ne vi ken displetaet, met ec'h ankounac'hai mezh da yaouankiz, ne'z po ken a soñj eus dismegañs da intañvelezh.

⁵ Rak da bried eo da Grouer, AOTROU an armeoù e anv, da zasprener eo Sant Israel, Doue an douar a-bezh a vo e anv.

⁶ Rak an AOTROU en deus da c'halvet evel ur vaouez dilezet ha glac'haret en he spered, evel ur wreg a yaouankiz a vefe bet kaset kuit, eme da Zoue.

⁷ Da zilezet em eus evit ur predig, met ez tegemerin gant trugarezioù bras.

⁸ Kuzhet em eus va dremm ur pennad ouzhit da goulz va c'hounnar, met truez am eus ouzhit dre un drugarez peurbadus, eme an AOTROU da zasprener.

⁹ Kement-mañ a vo evidon evel gant doureier Noe, evel pa em boa touet n'en em skuilhje ken doureier Noe war an douar, evel-se em eus touet na gounnarfen ken ouzhit ha na c'hourdrouzfen ken ac'hanout.

¹⁰ Pa zeufe ar menezioù da bellaat, hag ar c'hrec'hioù da vrañsellat, va zrugarez ne bellaio ket diouzhit, ha va emglev a beoc'h ne vrañsello ket, eme an AOTROU, en deus truez ouzhit.

¹¹ Te a zo glac'haret, pilet gant ar barr-amzer, hep frealz, ha setu ez an da sterniañ da vein gant antimoan ha da ziazezañ ac'hanout war safir,

¹² ober a rin da granelloù gant rubiz, da zorojoù gant mein-granat, da holl vogerioù gant mein prizius.

¹³ Da holl vibien a vo kelennet gant an AOTROU, ha peoc'h da vibien a vo bras.

¹⁴ Startaet e vi er reizhder, pell e vi diouzh ar gwaskerezh, ha na'z po ket da gaout aon, pell e vi diouzh ar spont, rak ne dostaio ket ouzhit.

¹⁵ Pa vo iriennoù ez enep, ne vint ket eus va ferzh, an neb a zroukc'hraio ez enep a gouezho dirazout.

¹⁶ Setu, me a grouas ar gov a c'hwezh war ar glaou entanet, hag a denn ac'hano ur benveg evit e labour, ha me a grouas an distrujer evit freuzañ.

¹⁷ Arm ebet goveliet a-enep dit ne zeuio da vat, ha pep teod a savo er varn ez enep a gondaoni. Evel-se eo hêrezh servijerien an AOTROU, diganin o devo o reizhder, eme an AOTROU.