Izaia 44 - Bibl Koad 21: Ar Bibl e Brezhoneg evit ar Vretoned

Pennad 44

¹ Ha bremañ selaou, o Jakob va servijer, hag Israel am eus dibabet!

² Evel-henn e komz an AOTROU, an hini en deus da graet ha stummet adalek kof da vamm, an hini a zo da sikour: Na'z pez ket aon, o Jakob va servijer, ha Jeshurun am eus dibabet!

³ Skuilhañ a rin doureier war an hini en deus sec'hed, ha stêrioù war an douar disec'h. Skuilhañ a rin va Spered war da lignez, ha va bennozh war da ziskennidi.

⁴ Hag e kreskint evel pa vefent e-kreiz ar geot, evel haleg a-hed an dour o redek.

⁵ Unan a lavaro: Me a zo d'an AOTROU. Unan all a lavaro: Me a zo da Jakob. Unan all a skrivo gant e zorn: D'an AOTROU, hag e vo lesanvet dre anv Israel.

⁶ Evel-henn e komz an AOTROU, Roue Israel hag e zasprener, AOTROU an armeoù: Me eo ar c'hentañ ha me eo an diwezhañ, ha n'eus Doue all ebet estregedon.

⁷ Piv a laka e vouezh da glevout eveldon abaoe ma em eus diazezet ar bobl gozh? Ra en disklêrio ha ra en prouo. Ra gemenno an amzer da zont hag an traoù a dle c'hoarvezout.

⁸ N'ho pet ket aon ha na vezit ket spontet. Ha ne'm eus ket e roet da anavezout dit ha kemennet abaoe pell 'zo? C'hwi a zo va zestoù: Hag-eñ ez eus un doue estregedon? N'eus ket ur roc'h all, n'anavezan ket unan all.

⁹ Oberourien ar skeudennoù kizellet n'int holl nemet netra, hag o oberennoù kaerañ ne servijont da vann ebet. Int o-unan a zo testoù a gement-se dezho: ne welont ket ha n'anavezont ket, evit ma vint mezhek.

¹⁰ Piv en deus doareet un doue ha teuzet ur skeudenn gizellet, evit tremen hep kaout gounid ebet?

¹¹ Setu ma vo mezhek e holl genlabourerien, rak an oberourien-se n'int nemet tud. Ra en em zastumint ha ra en em ziskouezint holl, spouronet ha mezhekaet e vint holl!

¹² Ar gov a gemer ur vouc'hal, hag e labour gant glaou. Doareañ a ra gant morzholioù, labourat a ra dre nerzh e vrec'h, kement m'en deus naon ha ma'z eo dinerzh, n'ev ket a zour hag eo faezh.

¹³ Ar c'halvez a astenn ur gordenn. Tresañ a ra gant ur gleizenn, stummañ a ra gant ur gizell, merkañ a ra gant ur c'helc'hier, da reiñ evel dremm un den, e doare kaer a zen, evit ma vo o chom en ti.

¹⁴ Troc'hañ a ra sedrez, hag e kemer ur wezenn-siprez pe un dervenn en deus dibabet e-touez gwez ar goadeg. Plantañ a ra ur wezenn, hag ar glav a laka anezhi da greskiñ.

¹⁵ Hag e servijint d'an den da zeviñ; kemer a raio diouto evit en em dommañ; ganto ec'h enaouo tan evit poazhañ bara; ober a ra ivez un doue diouto evit e azeuliñ, ur skeudenn gizellet evit stouiñ dirazi.

¹⁶ An hanter anezho a zev en tan; gant an hanter-se e fich e gig, e ra ur rost hag en deus e walc'h; en em dommañ a ra ivez hag e lavar: Mat! En em dommañ a ran, gwelout a ran ar flamm!

¹⁷ Ha gant ar peurrest e ra un doue, e skeudenn gizellet, hag e stou dirazi, ec'h azeul anezhi, e ped anezhi en ur lavarout: Dieub ac'hanon, rak va doue out.

¹⁸ N'anavezont ha ne gomprenont netra. Goloet eo o daoulagad ha ne c'hellont ket gwelout, o c'halon ha ne c'hellont ket kompren.

¹⁹ Hini ebet ned a ennañ e-unan, den n'en deus anaoudegezh pe skiant evit lavarout: An hanter anezho am eus devet en tan, poazet em eus bara war ar glaou, rostet em eus kig hag e zebret em eus; daoust hag e rin un euzhusted gant an nemorant? Hag e stouin dirak un tamm koad?

²⁰ Emañ o peuriñ ludu, dianket eo gant e galon douellet, ne c'hell na dieubiñ e ene na lavarout: Ha ne vefe ket ur gaou a zalc'han em dorn?

²¹ O Jakob, o Israel, az pez soñj a gement-mañ! Rak va servijer ez out. Da stummet em eus evit bezañ va servijer, o Israel! Ne vi ket ankounac’haet ganin.

²² Diverket em eus da zrougoberoù evel ur goabrenn deñval, ha da bec'hedoù evel ur goumoulenn. Distro davedon, rak da zasprenet em eus.

²³ Kanit, o neñvoù! Rak an AOTROU en deus graet e oberenn. Youc'hit, o donderioù an douar! Laoskit kriadennoù a levenez, o menezioù, koadegoù hag holl wez a zo enno! Rak an AOTROU en deus dasprenet Jakob ha diskouezet e c'hloar en Israel.

²⁴ Evel-henn e komz an AOTROU, da zasprener, an hini en deus da stummet adalek ar c'hof: Me eo an AOTROU, an hini a ra an holl draoù, an hini en deus astennet an neñvoù ha kompezet an douar, eñ e-unan.

²⁵ Me a ra c'hwitañ arouezioù ar c'haouiaded, me a laka da ziskiantaat an divinourien, me a ra kilañ ar re fur, me a dro o anaoudegezh da follentez,

²⁶ me a starta komz va servijer, me a beurc'hra kuzul va c'hannaded, me a lavar da Jeruzalem: Tud a vo o chom ennout, ha da gêrioù Juda: Savet e viot en-dro, adsavet e vo ho tismantroù glac'haret,

²⁷ me a lavar d'an donder: Disec'het e vi, da stêrioù a gasin da hesk,

²⁸ me a lavar diwar-benn Kiruz: Va mesaer eo, kas a raio da benn va holl youl, lavarout a raio da Jeruzalem: Adsavet e vi, ha d'an templ: Diazezet e vi.