Izaia 32 - Bibl Koad 21: Ar Bibl e Brezhoneg evit ar Vretoned

Pennad 32

¹ Setu, ur roue a reno hervez ar reizhder, ha priñsed a c'houarno gant eeunder.

² Pep hini anezho a vo evel ur gwasked ouzh an avel hag ur vod ouzh ar glav, evel gwazhioù-dour en ul lec'h sec'h, evel skeud ur roc'h vras war un douar kras.

³ Neuze daoulagad ar re a wel ne vint ken dall, divskouarn ar re a glev a vo evezhiek,

⁴ kalon ar re skañv a intento an anaoudegezh, teod ar re valbouz a gomzo buan ha sklaer,

⁵ ne vo ken anvet jentil an hini diskiant, ne vo ken anvet hael an toueller.

⁶ Rak an hini diskiant ne lavar nemet follentezioù, e galon en em ro d'ar faosoni evit ober an direizhder, evit droukkomz a-enep an AOTROU, evit lezel goullo an ene marnaoniek, evit lemel an evaj digant an hini en deus sec'hed.

⁷ Binvioù an toueller a zo fall; korvigelloù a ijin evit koll gant gevier ar re c'hlac'haret, zoken pa gomz reizh ar paour.

⁸ Met an denjentil en deus mennadoù jentil, hag e kendalc'ho gant oberennoù jentil.

⁹ Gwragez diskiant, savit, selaouit ouzh va mouezh! Merc'hed dibalamour, roit ho skouarn da'm ger!

¹⁰ A-benn ur bloavezh hag un deiz bennak e nec'hot, c'hwi hag a zo dibalamour, rak ar vendem a c'hwito, ha ne zeuio ket an eost.

¹¹ Krenit, c'hwi hag a zo diskiant! Nec'hit, c'hwi hag a zo dibalamour! En em ziwiskit, en em lakait en noazh, gourizit ho tivgroazell.

¹² Hag e skoint war boull o c'halon o kaout soñj eus ar maezioù kaer hag eus ar gwiniennoù frouezhus.

¹³ War zouar va fobl e kresko an drein hag an drez, zoken war an holl diez a levenez eus ar gêr laouen.

¹⁴ Ar palez a vo dilezet, ar gêr drouzus a vo dilaosket, ar grec'hienn hag an tour a vo evel kevioù da viken, an ezen gouez a c'hoario enno, an tropelloù a beuro enno,

¹⁵ ken na vo skuilhet warnomp ar Spered eus an nec'h, ha ma vo troet ar gouelec'h en ul liorzh frouezhus, ha ma vo sellet al liorzh frouezhus evel ur goadeg.

¹⁶ An eeunder a vo o chom er gouelec'h, hag ar reizhder a raio e chomaj el liorzh frouezhus.

¹⁷ Oberenn ar reizhder a vo ar peoc'h, ha frouezh ar reizhder a vo an diskuizh hag ar surentez da viken.

¹⁸ Va fobl a vo o chom en un annez peoc'hus, e tiez sur, e lec'hioù diskuizhus ha sioul.

¹⁹ Met ar goadeg a vo diskaret dindan ar grizilh, ha kêr a vo izelaet-kenañ.

²⁰ Eürus, c'hwi hag a had e-kichen an doureier, hag a lez troad an ejen hag an azen da vont dishual.