Izaia 28 - Bibl Koad 21: Ar Bibl e Brezhoneg evit ar Vretoned

Pennad 28

¹ Gwalleur da gurunenn lorc'hus mezvierien Efraim, d'ar bleuñv gweñvet a zo e wiskamant kaerañ hag a zo a-us da draonienn strujus an dud mezevellet gant gwin.

² Setu, unan nerzhus ha kreñv 'zo gant an AOTROU, unan heñvel ouzh un arnev grizilh, heñvel ouzh un tarzh-avel distrujus, heñvel ouzh ur barrad-amzer gant doureier bras o liñvañ; teurel a ra kement-se d'an douar gant e zorn.

³ Mac'het e vo gant an treid kurunenn lorc'hus mezvierien Efraim.

⁴ Hag ar bleuñv gweñvet a zo e wiskamant kaerañ hag a zo a-us d'an draonienn strujus, evel ur frouezhenn darev a-raok an hañv, a vo gwelet, ha kerkent ha ma vo en dorn, e vo lonket.

⁵ En deiz-se e vo AOTROU an armeoù ur gurunenn skedus hag un talgen a c'hloar evit an nemorant eus e bobl,

⁶ ur spered a varnedigezh evit an hini a zo azezet war gador ar varnedigezh, hag un nerzh evit ar re a gas en-dro an enebour o stourm outo ouzh an nor.

⁷ Met int ivez a vrañsell gant ar gwin, hag e tiheñchont gant an evajoù kreñv; an aberzhour hag ar profed a vrañsell gant an evajoù kreñv, beuzet int er gwin, hag e tiheñchont gant an evajoù kreñv; brañsellat a reont er weledigezh, strebotiñ a reont er varnedigezh.

⁸ An holl daolioù a zo leun a zislonkadurioù hag a lastez, ha ne chom lec'h ebet.

⁹ Da biv e vo kelennet an anaoudegezh? Da biv e vo roet da glevout kentelioù da gompren? Da vugale nevez-dizonet, diframmet diouzh ar vronn?

¹⁰ Rak ret eo reiñ kemenn war gemenn, kemenn war gemenn, reolenn war reolenn, reolenn war reolenn, un tamm amañ, un tamm aze.

¹¹ Evel-se, dre un haketerezh a vuzelloù hag en ur yezh estren eo e komzo ouzh ar bobl-mañ.

¹² Lavaret en devoa dezho: Amañ emañ an diskuizh, lezit da ziskuizhañ an hini a zo bec'hiet, amañ emañ an distan. Met n'eo ket bet fellet dezho selaou.

¹³ Setu perak komz an AOTROU a vo dezho kemenn war gemenn, kemenn war gemenn, reolenn war reolenn, reolenn war reolenn, un tamm amañ, un tamm aze, evit ma kouezhint war o c'hein en ur gerzhout ha ma vint torret, evit ma kouezhint en ur stign ha ma vint paket.

¹⁴ Selaouit eta komz an AOTROU a ren war ar bobl-mañ a Jeruzalem, tud goapaerien:

¹⁵ Dre ma hoc'h eus lavaret: Graet hon eus emglev gant ar marv, graet hon eus marc'had gant lec'h ar marv, pa dremeno ar walenn o liñvañ ne dapo ket ac'hanomp, rak kemeret hon eus da repu an touell, kuzhet omp dindan ar gaou.

¹⁶ En abeg da-se evel-henn e komz an Aotrou AOTROU: Setu, e lakaan e Sion ur maen da ziazez, ur maen amprouet, ur maen-korn prizius, ur sol start, hag an hini a gredo ennañ ne hasto ket.

¹⁷ Lakaat a rin ar varnedigezh da vezañ eeun hag ar reizhder da vezañ rezet. Ar grizilh a gaso kuit repu an touell, an doureier a veuzo kuzh ar gaou.

¹⁸ Hoc'h emglev gant ar marv a vo kaset da netra, ho marc'had gant lec'h ar marv ne zalc'ho ket; pa dremeno ar walenn o liñvañ, e viot flastret ganti.

¹⁹ Kerkent ha ma tremeno e krogo ennoc'h, rak tremen a raio beure goude beure, en deiz hag en noz; hag ar spont hepken a vo he c'hemennadenn.

²⁰ Ar gwele a vo re verr evit en em astenn ennañ, ar c'holoenn a vo re strizh evit en em c'holeiñ ganti.

²¹ Sevel a raio an AOTROU evel e menez Perazim, e kounnaro evel e traonienn Gabaon, evit ober e labour, e labour dizanavez, hag evit kas da benn e oberenn, e oberenn zivoas.

²² Ha bremañ, na rit ket goap, gant aon na vefe adstardet hoc'h ereoù, rak klevet em eus penaos eo merket an distruj gant an Aotrou, AOTROU an armeoù, a-enep an holl vro.

²³ Roit ho skouarn, selaouit ouzh va mouezh, bezit evezhiek, klevit va gerioù.

²⁴ An hini a dro douar evit hadañ, hag e troio douar dalc'hmat? Hag e vo dalc'hmat o tigeriñ hag o terriñ moudennoù e zouar?

²⁵ P'en devo plaenaet ar gorre, ha ne skuilho ket an aned? Ha ne hado ket ar c'houmin? Ha ne lakaio ket ar gwinizh a-renk, an heiz el lec'h merket, ar yell war ar ribloù?

²⁶ E Zoue a zesk dezhañ ar reolenn da heuliañ.

²⁷ Rak an aned ne vez ket gwasket gant ar ruilh, war ar c'houmin ne vez ket lakaet da dreiñ rod ar c'harr, met e vez pilet an aned gant ur wialenn hag ar c'houmin gant ur vazh.

²⁸ Dornañ a reer an ed, met ne wasker ket anezhañ dalc'hmat; bountañ a reer rod ar c'harr ha treid ar c'hezeg warnañ, hep flastrañ anezhañ.

²⁹ Kement-se a zeu ivez eus AOTROU an armeoù. Burzhudus eo e guzul, ha bras-meurbet e furnez.