Izaia 26 - Bibl Koad 21: Ar Bibl e Brezhoneg evit ar Vretoned

Pennad 26

¹ En deiz-se e vo kanet ar c'hantik-mañ e bro Juda: Ur gêr greñv hon eus, ar silvidigezh a vo lakaet enni evit moger-difenn hag evit ramparzh.

² Digorit an dorojoù, ma teuio e-barzh ar vroad reizh, an hini a vir ar fealded.

³ Mirout a rez ur peoc'h asur d'an hini a zo nerzhus e galon, dre m'en em fiz ennout.

⁴ Fiziit da virviken en AOTROU, rak en Aotrou AOTROU eo roc'h ar c'hantvedoù.

⁵ Lakaat a ra da ziskenn ar re a zo o chom en nec'h, pilat ar ra ar gêr savet e-krec'h, he fil betek an douar, he zaol er boultrenn.

⁶ Mac'het eo gant an treid, gant treid ar beorien, dindan kammedoù an ezhommeien.

⁷ Hent an hini reizh a zo eeun, hag e plaenaez e hent d'an den reizh.

⁸ Ya, da c'hortozomp, o AOTROU, en hent da varnedigezhioù! Da anv ha da eñvor eo c'hoant hon ene.

⁹ Va ene a c'hoanta ac'hanout en noz. Em c'hreizon va spered a glask ac'hanout a-vintin, rak pa vez da varnedigezhioù war an douar, tud ar bed a zesk ar reizhder.

¹⁰ Hag e vo graet trugarez d'an den fall? Ne zesk ket ar reizhder, hag e raio an droug e bro ar wirionez, ha ne sello ket ouzh meurded an AOTROU.

¹¹ AOTROU, da zorn a zo savet uhel, ne welont ket anezhañ, met mar gwelont da c'hred evit da bobl, neuze e vint mezhekaet, hag an tan miret evit da enebourien a lonko anezho.

¹² AOTROU, ar peoc'h a roi deomp, rak kement a reomp, te eo an hini en peurc'hra ennomp.

¹³ AOTROU hon Doue, aotrounez all egedout o deus renet warnomp, met drezout nemetken e c'hellomp gervel da anv.

¹⁴ Marv int ha ne vevint ket ken, aet int da get ha ne savint ket ken, o c'hastizet hag o distrujet ec'h eus, kaset ec'h eus zoken da netra o eñvor.

¹⁵ Kresket ec'h eus ar vroad, AOTROU, kresket ec'h eus ar vroad, hag ar c'hloar a zo roet dit. Astenn holl harzoù an douar!

¹⁶ AOTROU, en o estrenvan ez ejont da'z kavout, stlabezet o deus o c'hlemmoù pa'z eo bet da gastiz warno.

¹⁷ Evel ur wreg vrazez prest da wilioudiñ a c'houzañv gwentloù hag a gri en he foanioù, evel-se omp bet, pell diouzh da zremm, o AOTROU!

¹⁸ Koñsevet hon eus, gouzañvet hon eus gwentloù, n'hon eus ganet nemet avel, n'hon eus ket dezouget ar silvidigezh d'an douar, na lakaet da c'henel tud er bed.

¹⁹ Da re varv a vevo! Va c'horf marv a savo! Dihunit ha kanit gant levenez, tud ar boultrenn! Rak da c'hlizhenn a zo evel glizhenn ar sklêrijenn, hag an douar a roio en-dro ar re aet da get.

²⁰ Kae va fobl, kae da'z kambroù, serr an dorojoù war da lerc'h, en em guzh evit ur pennad bihan, betek ma vo tremenet ar gounnar.

²¹ Rak setu, dont a ra an AOTROU er-maez eus e chomlec'h, evit kastizañ drougiezh tud an douar. Hag an douar a ziskouezo ar gwad bet skuilhet warnañ, ha ne guzho ket ken e re lazhet.