Izaia 22 - Bibl Koad 21: Ar Bibl e Brezhoneg evit ar Vretoned

Pennad 22

¹ Diougan diwar-benn traonienn ar gweledigezhioù. Petra 'zo ganit, pa'z eo pignet da holl bobl war an toennoù?

² Kêr drouzus, leun a safar, kêr laouen! Da re varv n'int ket lazhet gant ar c'hleze, n'int ket lazhet en emgann.

³ Da holl bennoù o deus tec'het a-gevret, ereet int bet gant ar waregerien. Da holl re hag a zo bet kavet, a zo bet ereet a-gevret, pa oant o tec'hout da bell.

⁴ Abalamour da-se e lavaran: Distroit diouzhin ho taoulagad, ma ouelin gant c'hwervded. Na hastit ket frealziñ ac'hanon diwar-benn diskar merc'h va fobl.

⁵ Rak un deiz a drubuilh eo, a zistruj hag a spont a-berzh an Aotrou, AOTROU an armeoù, e traonienn ar gweledigezhioù; diskaret eo ar voger, hag e vez klevet er menez kriadennoù a estrenvan.

⁶ Elam en deus kemeret e glaouier-biroù, hag e oa kirri leun a dud hag a varc'hegerien; Kir en deus tennet e skoed er-maez.

⁷ Da draoniennoù kaerañ a oa leun a girri, ar varc'hegerien o deus en em renket dirak da zorojoù,

⁸ tennet eo bet ar pezh a c'holoe Juda, hag en deiz-se e selles etrezek harnezioù ti ar forest.

⁹ Gwelet hoc'h eus ar freuzoù niverus graet da gêr David, ha dastumet hoc'h eus an doureier eus ar stank izelañ,

¹⁰ niveret hoc'h eus tiez Jeruzalem, diskaret hoc'h eus anezho evit kreñvaat ar voger,

¹¹ graet hoc'h eus ivez ur mirlec'h etre an div voger, evit doureier ar stank kozh. Met n'hoc'h eus ket sellet ouzh an hini en deus graet kement-mañ, n'hoc'h eus ket gwelet an hini en deus e gempennet pell 'zo.

¹² E-pad ma c'halve an Aotrou, AOTROU an armeoù, da ouelañ en deiz-se, da huanadiñ, da douzañ ho pennoù, da c'hourizañ ar sac'h,

¹³ setu joa ha levenez, lazhañ a reer ejened, lazhañ a raed deñved, debriñ a raed kig, evañ a raed gwin, o lavarout: Debromp hag evomp, rak warc'hoazh e varvimp!

¹⁴ AOTROU an armeoù en deus lavaret da'm divskouarn: Biken an direizhder-se ne vo pardonet deoc'h, ken na varvot gantañ, eme an Aotrou, AOTROU an armeoù.

¹⁵ Evel-henn e komz an Aotrou, AOTROU an armeoù: Kae da gavout an teñzorier-mañ, Sebna, mirour ar palez, ha lavar:

¹⁶ Petra 'zo dit amañ? Piv a zo eus da diegezh amañ, ma ec'h eus toullet ur bez amañ evidout? Kleuzañ a ra ur bez dezhañ war an uhel, ha kizellañ a ra evitañ ul lojeiz er roc'h!

¹⁷ Setu, an AOTROU az taolo pell gant ur vrec'h nerzhus, da c'holeiñ a raio a-dra-sur,

¹⁸ da lakaat a raio du ruilhañ, ruilhañ evel ur bellenn etrezek un douar ledan ha bras, eno e varvi, eno e vi kirri da c'hloar, o mezh ti da vestr!

¹⁹ Me a argaso ac'hanout eus da garg, lamet e vi kuit eus da lec'h.

²⁰ En deiz-se e c'halvin va servijer Eliakim mab Hilkija,

²¹ e wiskañ a rin gant da doneg, e c'hourizañ a rin gant da c'houriz, lakaat a rin da c'halloud etre e zaouarn, hag e vo un tad evit tud Jeruzalem hag evit ti Juda.

²² Lakaat a rin war e skoaz alc'hwez ti David, digeriñ a raio ha den ne serro, serriñ a raio ha den ne zigoro.

²³ E lakaat a rin evel un tach en ul lec'h sur, bez' e vo evel un tron a c'hloar evit ti e dad,

²⁴ hag e vo staget outañ holl c'hloar ti e dad, an diskennidi bras ha bihan, an holl listri bihan, adalek an tasoù betek ar jarloù.

²⁵ En deiz-se, eme AOTROU an armeoù, an tach lakaet en ul lec'h sur a vo tennet, lamet e vo kuit hag e kouezho, hag ar samm a zouge a vo distrujet, rak an AOTROU en deus komzet.