Izaia 19 - Bibl Koad 21: Ar Bibl e Brezhoneg evit ar Vretoned

Pennad 19

¹ Diougan diwar-benn an Ejipt. Setu, emañ an AOTROU douget war ur goabrenn skañv, dont a ra en Ejipt, idoloù an Ejipt a gren dirazañ, ha kalon an Ejipsianed a deuz en he c'hreiz.

² Atizañ a rin an Ejipsian a-enep an Ejipsian, hag e stourmint, pep hini a-enep e vreur, pep hini a-enep e amezeg, kêr a-enep kêr, rouantelezh a-enep rouantelezh.

³ Spered an Ejipt a vanko en he c'hreiz, hag e tistrujin he c'huzul; hag e c'houlennint alioù digant an idoloù, an divinourien, ar c'houlennataerien speredoù hag ar sorserien.

⁴ Lakaat a rin an Ejipt etre daouarn ur mestr garv, ur roue kriz a reno warno, eme an Aotrou, AOTROU an armeoù.

⁵ Doureier ar mor a vanko, ar stêr a zisec’ho hag a baouezo,

⁶ ar stêrioù a vo diheñchet, kanolioù an Ejipt a izelaio hag a vanko, ar c'horz hag ar broen a yelo da netra,

⁷ ar pradeier a zo e-kichen ar c'hanolioù pe e-kichen genoù ar c'hanolioù ha kement a zo hadet a-hed ar c'hanolioù a zisec'ho, a vo kaset pell ha ne vo ken.

⁸ Ar besketaerien a huanado, an holl re a daol er stêr o higenn a hirvoudo, ar re a astenn o roued war an doureier en em c'hlac'haro.

⁹ Ar re a labour lin fin a vo mezhek, evel ar re a wiad mezher gwenn.

¹⁰ Diazezoù ar vro a vo torret, an holl c'hopridi a vo digalonekaet.

¹¹ Priñsed Zoan n'int nemet tud diskiant, ar c'huzul eus alierien fur Faraon a zo deuet da vezañ ur bodad amoet. Penaos e lavarit da Faraon: Me ’zo mab ar furien, mab ar rouaned kozh?

¹² Pelec'h emaint? Pelec'h emañ da re fur? Ra zisklerint dit bremañ, ra gemennint ar pezh en deus divizet AOTROU an armeoù a-enep an Ejipt.

¹³ Priñsed Zoan o deus kollet o skiant, priñsed Nof en em douell, pennoù ar meuriadoù a laka an Ejipt da ziheñchañ.

¹⁴ An AOTROU en deus skuilhet en he c'hreiz ur spered a saouzan, ha deuet eo an Ejipt da vezañ brañsellet en hec'h holl labourioù, evel ma vez brañsellet un den mezv en ur zislonkañ.

¹⁵ Ha ne vo netra talvoudus d'an Ejipt eus kement a raio ar penn pe al lost, ar balmezenn pe ar vroenenn.

¹⁶ En deiz-se an Ejipt a vo evel gwragez, dianket ha spouronet e vo o welout dorn savet AOTROU an armeoù a vo savet a-enep dezhi.

¹⁷ Douar Juda a zeuio da vezañ ur spont evit an Ejipt, pep hini a gomzo diwar e benn a vo spouronet, en abeg d'ar mennad divizet gant AOTROU an armeoù a-enep dezhi.

¹⁸ En deiz-se e vo pemp kêr e bro Ejipt a gomzo yezh Kanaan hag a douo da AOTROU an armeoù; kêr an distruj a vo anvet unan anezho.

¹⁹ En deiz-se e vo un aoter savet d'an AOTROU e-kreiz bro Ejipt, ha war hec'h harzoù ur maen-eñvor savet d'an AOTROU.

²⁰ Kement-se a vo un arouez hag un testeni evit AOTROU an armeoù e bro Ejipt. Rak huchal a raint d'an AOTROU abalamour d'o gwaskerien, hag e kaso dezho ur salver hag un difenner d'o dieubiñ.

²¹ Hag an AOTROU en em roio da anavezout d'an Ejipsianed, hag an Ejipsianed a anavezo an AOTROU en deiz-se; kinnig a raint aberzhoù ha donezonoù, hag e raint gouestloù d'an AOTROU hag o seveno.

²² Evel-se an AOTROU a skoio gant an Ejipsianed, skeiñ ha yac'haat a raio, distreiñ a raint d'an AOTROU, aspedet e vo ganto hag e yac'haio anezho.

²³ En deiz-se e vo un hent eus Ejipt da Asiria, an Asiria a zeuio d'an Ejipt, an Ejipt d'an Asiria, hag an Ejipsianed a servijo gant an Asirianed.

²⁴ En deiz-se e vo unanet Israel evel un deirvet lodenn d'an Ejipt ha d'an Asiria, hag ar vennozh a vo e-kreiz an douar.

²⁵ AOTROU an armeoù a vennigo anezho o lavarout: Benniget ra vo Ejipt va fobl, hag Asiria labour va daouarn, hag Israel va hêrezh!