Izaia 14 - Bibl Koad 21: Ar Bibl e Brezhoneg evit ar Vretoned

Pennad 14

¹ Rak an AOTROU en devo truez ouzh Jakob, dibab a raio Israel c'hoazh; adlakaat a raio anezho en o douar, an diavaezidi en em unano outo, hag en em stago ouzh ti Jakob.

² Ar pobloù a gemero anezho, hag o degaso en-dro d'o bro. Ti Israel o ferc'henno war douar an AOTROU evel servijerien hag evel servijerezed. Kas a raint en dalc'herezh ar re o doa o dalc'het, hag e vestroniint war ar re o doa o gwasket.

³ En deiz ma raio dit an AOTROU diskuizhañ eus da boan, eus da drubuilh, hag eus ar sklavelezh garv e oas bet lakaet dindani,

⁴ e tistagi ar c'hrennlavar-mañ a-enep roue Babilon, hag e lavari: Penaos en deus echuet ar gwasker? Penaos en deus echuet c'hoantidigezh an aour?

⁵ An AOTROU en deus torret bazh ar re zrouk, gwialenn ar renerien;

⁶ an hini a skoe ouzh ar pobloù gant fulor a daolioù dibaouez, an hini a c'houarne ar pobloù gant kounnar, a zo argaset dizamant.

⁷ An douar holl a zo er peoc'h, sioul eo, kanañ a reer a levenez.

⁸ Zoken ar gwez-siprez ha gwez-sedrez al Liban a laouena diwar da benn: Abaoe ma'z out kouezhet, den ne bign ken d'hon diskar.

⁹ Lec'h ar marv, en traoñ, a from en abeg da'z tegouezh. Dihuniñ a ra dirazout ar re varv, holl re c'halloudek an douar. Lakaat a ra holl rouaned ar pobloù da sevel diwar o zron.

¹⁰ Holl e stagont da gomz hag e lavaront dit: Te ivez, setu-te hep nerzh eveldomp! Deuet out da vezañ heñvel ouzhimp!

¹¹ Da bompad a zo diskennet e lec'h ar marv, gant son da delennoù. Gourvezet out war ur gwele a vreinadur, hag ar preñved a c'holo ac'hanout.

¹² Penaos ez out kouezhet eus an neñvoù, o sterenn lugernus, o mab ar gouloù-deiz? Penaos ez out bet diskaret d'an douar, te hag a vac'he ar broadoù?

¹³ Te a lavare ez kalon: Pignat a rin d'an neñvoù, sevel a rin va zron dreist stered Doue, azezañ a rin war venez ar vodadeg, e pennoù an hanternoz,

¹⁴ pignat a rin a-us da uhelderioù ar c'hoabr, heñvel e vin ouzh an Uhel-Meurbet.

¹⁵ Ha koulskoude ez out diskennet e lec'h ar marv, en donderioù ar poull.

¹⁶ Ar re a wel ac'hanout a baro o daoulagad warnout, sellout a raint gant evezh ouzhit: Hag aze emañ an hini a lakae an douar da grenañ, a vrañselle ar rouantelezhioù,

¹⁷ a droe ar bed e ur gouelec'h, a zistruje ar c'hêrioù, ha na zigore ket an ti d'e brizonidi?

¹⁸ Holl rouaned ar broadoù, ya holl, a ehan er c'hloar, pep hini en e di,

¹⁹ met te a zo bet taolet pell diouzh da vez, evel ur vroustenn hakr, evel dilhad ar re doullet gant ar c'hleze hag a vez taolet war mein ar poull, evel ur c'horf marv mac'het gant an treid.

²⁰ Ne vi ket unanet ganto er bez, rak glac'haret ec'h eus da zouar ha lazhet ec'h eus da bobl. Gouenn ar re zrouk ne vo biken anvet!

²¹ Kempennit lazhadeg e vibien, en abeg da zireizhder o zadoù, evit na savint ket ken da berc'hennañ an douar, na da c'holeiñ gant kêrioù dremm ar bed.

²² Sevel a rin en o enep, eme AOTROU an armeoù, hag e lamin eus Babilon hec'h anv hag he nemorant, ar mab hag ar mab-bihan, eme an AOTROU.

²³ Ober a rin anezhi un toull evit an heureuchined, ur c'heun, he skubañ a rin gant skubell an distruj, eme AOTROU an armeoù.

²⁴ AOTROU an armeoù en deus touet o lavarout: A-dra-sur, evel ma em eus o disklêriet en em gavo an traoù, hag ar pezh am eus divizet a c'hoarvezo:

²⁵ Breviñ an Asiria em douar, hag he mac'hañ war va menezioù. He yev a vo lamet kuit a-ziwarno, hag he bec'h a vo tennet a-ziwar o divskoaz.

²⁶ Eno emañ ar mennad divizet a-enep an douar holl, eno emañ an dorn astennet war an holl vroadoù.

²⁷ Rak AOTROU an armeoù en deus divizet, ha piv a harzo outañ? E zorn a zo astennet, ha piv a zistroio anezhañ?

²⁸ Ar bloavezh ma varvas ar roue Akaz e voe disklêriet an diougan-mañ:

²⁹ Na laouena ket, douar ar Filistined, dre ma'z eo bruzunet ar wialenn a skoe ganit, rak eus gouenn an naer e c'hano ur wiber, hag ar frouezh anezhi a vo un aerouant o nijal.

³⁰ Re gentañ-ganet ar beorien a vo leuniet, hag an ezhommeien a ziskuizho e surentez, met da wrizienn a lakain da vervel gant an naon, ha lazhet e vo ar pezh a vano ac'hanout.

³¹ Yud, dor! Garm, kêr! Bez holl er spouron, douar ar Filistined! Rak eus an hanternoz e teu ur moged, pep hini o terc'hel e renk ennañ.

³² Ha petra a vo respontet d'ar re zegaset eus ar vroad-se? Penaos eo an AOTROU en deus diazezet Sion, hag enni re c'hlac'haret e bobl o devo o repu.