Sant Ian 8 - Bibl Koad 21: Ar Bibl e Brezhoneg evit ar Vretoned

Pennad 8 Ar wreg avoultrerez

¹ Jezuz a yeas da Venez an Olived.

² Da c’houloù-deiz e tistroas adarre d’an templ hag an holl bobl a zeuas d’e gavout. O vezañ azezet e kelennas anezho.

³ Ar skribed hag ar farizianed a zegasas dezhañ ur wreg tapet en avoultriezh hag, o vezañ he lakaet en o c’hreiz,

⁴ e lavarjont dezhañ: Mestr, ar wreg-mañ a zo bet kavet o pec’hiñ dre avoultriezh.

⁵ Moizez el lezenn en deus gourc’hemennet deomp meinata ar seurt tud-se. Te eta, petra a lavarez?

⁶ Lavarout a raent kement-se evit e amprouiñ hag evit gallout e damall. Met Jezuz, o daoublegañ, a skrivas gant e viz war an douar, evel ma ne gleve ket.

⁷ Met evel ma talc’hent d’ober goulennoù outañ, e savas hag e lavaras dezho: An hini ac’hanoc’h a zo hep pec’hed ra daolo ar maen kentañ outi.

⁸ Hag o taoublegañ a-nevez, e skrivas war an douar.

⁹ Pa glevjont kement-se, o kaout rebech digant o c’houstiañs, ez ejont kuit an eil goude egile, ar re goshañ da gentañ betek ar re ziwezhañ. Ha Jezuz a chomas e-unan gant ar wreg a oa eno e-kreiz.

¹⁰ Jezuz, o vezañ savet hag o gwelout den nemet ar wreg, a lavaras dezhi: Gwreg, pelec’h emañ da damallerien? Ha n’en deus den kondaonet ac’hanout?

¹¹ Hi a lavaras: Den, Aotrou. Jezuz a lavaras dezhi: Ne varnan ket ac’hanout kennebeut, kae ha na bec’h ken.

Jezuz, sklêrijenn ar bed

¹² Neuze Jezuz a gomzas c’hoazh dezho hag a lavaras: Me eo sklêrijenn ar bed, an hini a heuilh ac’hanon ne gerzho ket en deñvalijenn, met bez’ en devo sklêrijenn ar vuhez.

¹³ Hag ar farizianed a lavaras dezhañ: Te a ro testeni ac’hanout da-unan, da desteni n’eo ket gwirion.

¹⁴ Jezuz a respontas dezho: Petra bennak ma roan testeni ac’hanon va-unan, va zesteni a zo gwirion rak, gouzout a ran a-belec’h on deuet ha pelec’h ez an. Met c’hwi, n’ouzoc’h ket a-belec’h e teuan na pelec’h ez an.

¹⁵ C’hwi a varn hervez ar c’hig, me ne varnan den.

¹⁶ Ha mar barnan, va barnedigezh a zo gwirion, rak n’on ket va-unan, met ganin emañ an Tad en deus va c’haset.

¹⁷ Skrivet eo en ho lezenn penaos testeni daou zen a zo gwirion.

¹⁸ Me eo a ro testeni ac’hanon va-unan, hag an Tad en deus va c’haset a ro ivez testeni ac’hanon.

¹⁹ Lavarout a rejont eta dezhañ: Pelec’h emañ da Dad? Jezuz a respontas: N’anavezit na me na va Zad. Mar anavezfec’h ac’hanon, ec’h anavezfec’h ivez va Zad.

²⁰ Jezuz a lavaras ar gerioù-mañ el lec’h ma oa an teñzor, o kelenn en templ. Ha den ne grogas ennañ, rak e eur ne oa ket deuet c’hoazh.

²¹ Neuze Jezuz a lavaras dezho c’hoazh: Mont a ran kuit hag e klaskot ac’hanon hag e varvot en ho pec’hed. Ne c’hellot ket dont e-lec’h ma’z an.

²² Ar Yuzevien a lavaras eta: Hag en em lazho e-unan, peogwir e lavar: Ne c’hellot ket dont e-lec’h ma’z an.

²³ Hag e lavaras dezho: C’hwi a zo eus an traoñ, me a zo eus an nec’h. C’hwi a zo eus ar bed-mañ, me n’on ket eus ar bed-mañ.

²⁴ Setu perak em eus lavaret deoc’h e varvot en ho pec’hedoù, rak ma ne gredit ket emaon, e varvot en ho pec’hedoù.

²⁵ Neuze e lavarjont dezhañ: Piv out-te? Jezuz a lavaras dezho: Ar pezh a lavaran deoc’h abaoe ar penn-kentañ.

²⁶ Kalz a draoù am eus da lavarout ac’hanoc’h ha da varn ennoc’h. Met an hini en deus va c’haset a zo gwirion hag e lavaran d’ar bed ar pezh am eus klevet digantañ.

²⁷ Ne gomprenjont ket e komze dezho eus an Tad.

²⁸ Jezuz a lavaras dezho: Pa ho po savet Mab an den, neuze ec’h anavezot emaon ha penaos ne ran netra ac’hanon va-unan, met e lavaran an traoù evel m’en deus va Zad o desket din.

²⁹ An hini en deus va c’haset a zo ganin. An Tad n’en deus ket va lezet va-unan, abalamour ma ran atav ar pezh a blij dezhañ.

³⁰ Pa lavaras an traoù-se, kalz a gredas ennañ.

Bugale Abraham pe bugale an diaoul

³¹ Neuze Jezuz a lavaras d’ar Yuzevien o doa kredet ennañ: Mar kendalc’hit em ger, emaoc’h e gwirionez va diskibien.

³² Anavezout a reot ar wirionez hag ar wirionez ho tieubo.

³³ Respont a rejont dezhañ: Ni a zo lignez Abraham ha biskoazh n’omp bet sklavourien da zen, penaos e lavarez: Dieubet e viot?

³⁴ Jezuz a respontas dezho: E gwirionez, e gwirionez, me a lavar deoc’h, an hini en em ro d’ar pec’hed a zo sklavour d’ar pec’hed.

³⁵ Met ar sklavour ne chom ket atav en ti, ar mab a chom ennañ atav.

³⁶ Mar dieub eta ar Mab ac’hanoc’h, e voit dieubet evit gwir.

³⁷ Gouzout a ran ez oc’h lignez Abraham, met e klaskit va lakaat d’ar marv abalamour n’en deus ket va ger a zegemer ennoc’h.

³⁸ Me a lavar ar pezh am eus gwelet e ti va Zad, ha c’hwi ivez a ra ar pezh hoc’h eus gwelet e ti ho tad.

³⁹ Int a respontas dezhañ: Hon tad eo Abraham. Jezuz a lavaras dezho: Ma vijec’h bugale Abraham, c’hwi a raje oberoù Abraham.

⁴⁰ Met bremañ e glaskit va lakaat d’ar marv, me, un den en deus lavaret deoc’h ar wirionez am eus desket digant Doue. Abraham n’en deus ket graet kement-se.

⁴¹ C’hwi a ra oberoù ho tad. Lavarout a rejont dezhañ: N’omp ket bet ganet eus un avoultriezh, un Tad hepken hon eus, Doue eo.

⁴² Neuze Jezuz a lavaras dezho: Ma vije Doue ho Tad, e karjec’h ac’hanon, rak eus Doue eo ez on hag e teuan. N’on ket deuet ac’hanon va-unan, met eñ eo an hini en deus va c’haset.

⁴³ Perak ne gomprenit ket va lavar? Abalamour na c’hellit ket selaou va ger.

⁴⁴ Ho tad a ziskennit anezhañ eo an diaoul hag e fell deoc’h ober c’hoantoù ho tad. Muntrer eo bet adalek ar penn-kentañ, ha n’en deus ket kendalc’het er wirionez dre ma n’eus ket a wirionez ennañ. Pa lavar gaou, e komz eus ar pezh a zo ennañ e-unan, rak gaouiat eo ha tad d’ar gaou.

⁴⁵ Hag abalamour ma lavaran ar wirionez, ne gredit ket ac’hanon.

⁴⁶ Piv ac’hanoc’h a gendrec’ho ac’hanon a bec’hed? Mar lavaran ar wirionez, perak ne gredit ket ac’hanon?

⁴⁷ An hini a zo eus Doue a selaou gerioù Doue. Dre-se eo ne selaouit ket, abalamour n’oc’h ket eus Doue.

Jezuz hag Abraham

⁴⁸ Neuze ar Yuzevien a respontas dezhañ: Ha n’hon eus ket lavaret mat penaos out ur Samaritan hag ez eus un diaoul ennout?

⁴⁹ Jezuz a respontas: Ne’m eus ket un diaoul met enoriñ a ran va Zad, hag e tizenorit ac’hanon.

⁵⁰ Met ne glaskan ket va gloar, bez’ ez eus unan hag e glask ha barn a ra.

⁵¹ E gwirionez, e gwirionez, me a lavar deoc’h, mar mir unan bennak va ger, ne welo biken ar marv.

⁵² Neuze ar Yuzevien a lavaras dezhañ: Bremañ ec’h anavezomp ez eus un diaoul ennout. Abraham a zo marv, ar brofeded ivez, ha te a lavar: Mar mir unan bennak va ger, ne welo biken ar marv.

⁵³ Ha brasoc’h out eget Abraham hon tad hag a zo marv? Ar brofeded ivez a zo marv. Da biv e fell dit en em dremen?

⁵⁴ Jezuz a respontas: Mar tennan gloar ac’hanon va-unan, va gloar n’eo netra. Va Zad eo an hini a ro gloar din, an hini a lavarit eo ho Toue.

⁵⁵ N’hoc’h eus ket e anavezet. Met me a anavez anezhañ, ha ma lavarfen n’anavezan ket anezhañ, e vefen ur gaouiad eveldoc’h. Met anavezout a ran anezhañ hag e viran e c’her.

⁵⁶ Abraham ho tad en deus tridet gant levenez o soñjal e tlee gwelout va deiz. E welet en deus hag eo en em laouenaet.

⁵⁷ Neuze ar Yuzevien a lavaras dezhañ: Ne’c’h eus ket c’hoazh hanter kant vloaz hag ec’h eus gwelet Abraham?

⁵⁸ Jezuz a lavaras dezho: E gwirionez, e gwirionez, me a lavar deoc’h, a-raok ma voe Abraham, emaon.

⁵⁹ Neuze e kemerjont mein evit o zeurel gantañ, met Jezuz en em guzhas hag a yeas er-maez eus an templ o tremen dre o c’hreiz, hag evel-se ez eas kuit.