Sant Ian 10 - Bibl Koad 21: Ar Bibl e Brezhoneg evit ar Vretoned

Pennad 10 Jezuz, ar mesaer mat

¹ E gwirionez, e gwirionez, me a lavar deoc’h, an hini na ya ket e kraou an deñved dre an nor, met a bign dre ul lec’h all, a zo ul laer hag ur brigant.

² Met an hini a ya dre an nor a zo mesaer an deñved.

³ Ar porzhier a zigor dezhañ an nor hag an deñved a glev e vouezh. Gervel a ra e zeñved e-unan dre o anv hag e kas anezho er-maez.

⁴ Pa en deus degaset er-maez e zeñved e-unan, e kerzh a-raok dezho, hag an deñved a heuilh anezhañ abalamour ma’c’h anavezont e vouezh.

⁵ Met ne heuilhint ket un diavaeziad, tec’hout a raint kentoc’h, dre ma n’anavezont ket mouezh an diavaezidi.

⁶ Jezuz a lavaras dezho ar barabolenn-se, met ne gomprenjont ket ar pezh a lavare dezho.

⁷ Neuze Jezuz a lavaras dezho c’hoazh: E gwirionez, e gwirionez, me a lavar deoc’h, me eo dor an deñved.

⁸ Ar re holl a zo deuet a-raok din a zo laeron ha briganted, met an deñved n’o deus ket o selaouet.

⁹ Me eo an nor. Mar deu e-barzh unan bennak drezon, e vo salvet. Dont ha mont a raio hag e kavo peurvan.

¹⁰ Al laer ne zeu nemet evit laerezh, lazhañ ha distrujañ. Me a zo deuet evit m’o devo ar vuhez, ha m’o devo anezhi gant fonnuster.

¹¹ Me eo ar mesaer mat. Ar mesaer mat a ro e vuhez evit e zeñved.

¹² Met an devezhour n’eo ket ar mesaer hag an deñved n’int ket dezhañ. Pa wel ar bleiz o tont, e tilez an deñved hag e tec’h. Ar bleiz a grog en deñved hag a stlabez anezho.

¹³ An devezhour a dec’h, abalamour ma’z eo devezhour ha na gemer ket preder eus an deñved.

¹⁴ Me eo ar mesaer mat, me a anavez va hini hag anavezet on gant va hini.

¹⁵ Evel ma’c’h anavez an Tad ac’hanon, ec’h anavezan ivez an Tad. Ha reiñ a ran va buhez evit an deñved.

¹⁶ Deñved all am eus ha n’int ket eus ar c’hraou-mañ. Ret eo din degas anezho ivez hag e klevint va mouezh. Hag e vo un tropell hepken hag ur mesaer hepken.

¹⁷ Dre gement-mañ eo e kar va Zad ac’hanon, o vezañ ma lezan va buhez evit hec’h adkemer.

¹⁸ Den ne lam anezhi diganin, me a lez anezhi ac’hanon va-unan. Ar galloud am eus d’he lezel hag ar galloud d’hec’h adkemer, an urzh-se am eus bet digant va Zad.

¹⁹ Neuze e voe dizunvaniezh adarre etre ar Yuzevien, abalamour d’ar gerioù-se.

²⁰ Kalz anezho a lavaras: Un diaoul en deus, diskiantet eo. Perak e selaouit anezhañ?

²¹ Re all a lavaras: Ar gerioù-se n’int ket eus un den dalc’het gant un diaoul. Hag un diaoul a c’hell digeriñ daoulagad ar re dall?

Jezuz hag an Tad a zo Unan

²² Bez’ e oa e Jeruzalem gouel an Dedi. Ar goañv a oa.

²³ Evel ma kerzhe Jezuz en templ dindan porched Salomon,

²⁴ ar Yuzevien en em zastumas en-dro dezhañ hag a lavaras dezhañ: Betek pegeit e talc’hi hon ene en douetañs? Mar d-out ar C’hrist, lavar deomp splann.

²⁵ Jezuz a respontas dezho: Henn lavaret em eus deoc’h ha ne gredit ket. An oberoù a ran en anv va Zad a ro testeni ac’hanon.

²⁶ Met ne gredit ket abalamour n’oc’h ket eus va deñved, evel ma em eus lavaret deoc’h.

²⁷ Va deñved a glev va mouezh, anavezout a ran anezho hag e teuont war va lerc’h.

²⁸ Me a ro dezho ar vuhez peurbadus. Biken ne vint kollet ha den n’o lamo eus va dorn.

²⁹ Va Zad en deus o roet din, ha brasoc’h eo eget an holl. Den ne c’hell o lemel eus dorn va Zad.

³⁰ Me hag an Tad a zo unan.

³¹ Neuze ar Yuzevien a gemeras a-nevez mein evit e veinata.

³² Jezuz a lavaras dezho: Diskouezet em eus kalz a oberoù mat a-berzh va Zad, evit pehini anezho e veinatait ac’hanon?

³³ Ar Yuzevien a respontas dezhañ: N’eo ket evit un ober mat e veinataomp ac’hanout, met evit ur gwallgomz: rak n’out nemet un den, hag en em rez Doue.

³⁴ Jezuz a respontas dezho: Ha n’eo ket skrivet en ho lezenn: Lavaret em eus: C’hwi a zo doueed?

³⁵ Mar he deus galvet doueed ar re ma oa bet kaset dezho ger Doue, hag ar Skritur ne c’hell ket bezañ torret,

³⁶ perak e lavarit e wallgomzan, me an hini en deus an Tad santelaet ha kaset er bed, abalamour ma em eus lavaret: Me eo Mab Doue?

³⁷ Ma ne ran ket oberoù va Zad, na gredit ket ac’hanon.

³⁸ Met mar o gran, ha pa ne gredfec’h ket ac’hanon, kredit da’m oberoù, evit ma’c’h anavezot ha ma kredot ez eo an Tad ennon hag ez on ennañ.

³⁹ Neuze e klaskjont c’hoazh kregiñ ennañ, met en em dennas eus o daouarn.

⁴⁰ Mont a reas a-nevez en tu all d’ar Jordan, e-lec’h ma oa Yann o vadeziñ da gentañ, hag e chomas eno.

⁴¹ Kalz a dud a zeuas d’e gavout hag a lavaras: Yann, evit gwir, n’en deus graet mirakl ebet, met kement en deus Yann lavaret diwar-benn hemañ a zo gwir.

⁴² Ha kalz a gredas ennañ el lec’h-se.