Hebreed 7 - Bibl Koad 21: Ar Bibl e Brezhoneg evit ar Vretoned

Pennad 7 Melkizedek, skeudenn Krist

¹ Ar Melkizedek-se, roue Salem, beleg an Doue Uhel-Meurbet, a yeas war arbenn da Abraham pa zistroe goude bezañ trec’het ar rouaned, a vennigas anezhañ,

² hag a resevas ivez digant Abraham an deog eus kement en doa kemeret, a dalv da lavarout da gentañ roue ar reizhder hervez e anv, ouzhpenn a oa roue Salem da lavarout eo roue a beoc’h,

³ a zo hep tad, hep mamm, hep lignez, hep deroù a zeizioù na ziwezh a vuhez, met a zo rentet heñvel ouzh Mab Doue, a chom beleg da viken.

⁴ Bremañ eveshait pegen bras eo an hini a voe roet dezhañ gant an uheldad Abraham an deog eus ar preizhadur.

⁵ Ar re eus mibien Levi a ra ar garg a velegiezh o deus an urzh, hervez al lezenn, da sevel an deog war ar bobl, da lavarout eo war o breudeur deuet koulskoude eus lounezhi Abraham,

⁶ met eñ, ha ne oa ket eus an hevelep tiegezh evelto, a savas an deog war Abraham, hag a vennigas an hini en doa ar promesaoù.

⁷ Hogen, hep dislavar, an hini bihanañ eo a zo benniget gant an hini brasañ.

⁸ Amañ eo tud varvel hag a sav an deog, met aze eo testeniet penaos an hini en resev a zo bev.

⁹ Ouzhpenn, Levi, a sav an deog, en deus ivez paeet anezhañ dre Abraham, koulz lavarout,

¹⁰ rak e oa c’hoazh e lounezhi e dad, pa yeas Melkizedek war arbenn dezhañ.

¹¹ Mar bije eta ar barfeted en em gavet e belegiezh Levi, rak dindan houmañ eo a zo bet roet al lezenn d’ar bobl, petra e oa ezhomm c’hoazh ma savje ur beleg all hervez urzh Melkizedek ha nann hervez urzh Aaron?

¹² Hag ar velegiezh o vezañ cheñchet, e oa ret ivez ma vije ur cheñchamant a lezenn.

¹³ Rak an hini a vez lavaret kement-se diwar e benn a zo eus ur meuriad all, dioutañ den ebet n’en deus servijet ouzh an aoter.

¹⁴ Sklaer eo penaos hon Aotrou a zo deuet eus Juda, meuriad n’en deus lavaret Moizez netra diwar e benn e-keñver ar velegiezh.

¹⁵ Kement-se a zeu meurbet anatoc’h pa en em sav ur beleg hervez heñveledigezh Melkizedek,

¹⁶ a zo bet lakaet en e garg nann hervez ul lezenn eus ur gourc’hemenn kigel met hervez galloud ur vuhez peurbadus,

¹⁷ rak testeniet eo: Te a zo beleg da viken hervez urzh Melkizedek.

¹⁸ Evel-se ar gourc’hemenn kentañ a zo bet torret abalamour d’e zic’halloudegezh ha d’e zidalvoudegezh,

¹⁹ rak al lezenn n’he deus degaset netra d’ar barfeted. Lakaet eo bet en e lec’h un esperañs gwelloc’h, hag en em dostaomp ouzh Doue drezi.

²⁰ Ha n’eo ket bet lakaet en e garg hep le,

²¹ rak ar re all a zo bet lakaet beleien hep le, met hemañ a zo bet lakaet en e garg gant al le eus an hini en deus lavaret dezhañ: An Aotrou en deus touet ha n’en em dislavaro ket, te a zo beleg da viken hervez urzh Melkizedek.

²² Jezuz a zo evel-se deuet kret eus un emglev kalz gwelloc’h.

²³ Ouzhpenn e-keñver ar veleien, ez eus bet un niver bras anezho, rak ar marv en deus miret outo da chom atav.

²⁴ Met eñ, dre ma chom da viken, en deus ur velegiezh na dremeno ket.

²⁵ Dre-se e c’hell salviñ ervat ar re a dosta ouzh Doue drezañ, pa’z eo bev bepred evit erbediñ evito.

²⁶ Hag e oa ret deomp kaout un hevelep beleg-meur, santel, digablus, dinamm, dispartiet diouzh ar bec’herien, savet dreist an neñvoù,

²⁷ n’en deus ket ezhomm, evel ar veleien-veur, da ginnig bemdez aberzhoù, da gentañ evit e bec’hedoù e-unan, ha goude evit re ar bobl, rak graet en deus kement-se ur wech oc’h en em ginnig e-unan.

²⁸ Rak al lezenn a laka beleien-veur tud hag a zo dinerzh, met ger al le, deuet war-lerc’h al lezenn, a laka ar Mab hag a zo peurvat da viken.