Geneliezh 5 - Bibl Koad 21: Ar Bibl e Brezhoneg evit ar Vretoned

Pennad 5 Diskennidi Adam

¹ Setu amañ levr lignez Adam. E deiz ma krouas Doue an den, ober a reas anezhañ en heñveledigezh Doue.

² Krouiñ a reas anezho den ha denez, bennigañ a reas anezho hag e roas dezho an anv a Adam e deiz ma voent krouet.

³ Adam a vevas kant ha tregont vloaz hag a voe tad da ur mab en e heñveledigezh, hervez e skeudenn, hag e roas dezhañ an anv a Sed.

⁴ Deizioù Adam, goude ganedigezh Sed, a voe eizh kant vloaz, hag a voe tad da vibien ha da verc'hed.

⁵ An holl amzer ma vevas Adam a voe eta nav c'hant ha tregont vloaz, neuze e varvas.

⁶ Sed a vevas kant pemp bloaz hag a voe tad da Enosh.

⁷ Sed, goude ma voe bet tad da Enosh, a vevas eizh kant seizh vloaz, hag a voe tad da vibien ha da verc'hed.

⁸ An holl amzer ma vevas Sed a voe eta nav c'hant daouzek vloaz, neuze e varvas.

⁹ Enosh a vevas dek vloaz ha pevar-ugent hag a voe tad da Genan.

¹⁰ Enosh, goude ma voe bet tad da Genan, a vevas eizh kant pemzek vloaz, hag a voe tad da vibien ha da verc'hed.

¹¹ An holl amzer ma vevas Enosh a voe eta nav c'hant pemp bloaz, neuze e varvas.

¹² Kenan a vevas dek vloaz ha tri-ugent hag a voe tad da Vahalaleel.

¹³ Kenan, goude ma voe bet tad da Vahalaleel, a vevas eizh kant ha daou-ugent vloaz, hag a voe tad da vibien ha da verc'hed.

¹⁴ An holl amzer ma vevas Kenan a voe eta nav c'hant dek vloaz, neuze e varvas.

¹⁵ Mahalaleel a vevas pemp bloaz ha tri-ugent hag a voe tad da Jered.

¹⁶ Mahalaleel, goude ma voe bet tad da Jered, a vevas eizh kant ha tregont vloaz, hag a voe tad da vibien ha da verc'hed.

¹⁷ An holl amzer ma vevas Mahalaleel a voe eta eizh kant pemzek vloaz ha pevar-ugent, neuze e varvas.

¹⁸ Jered a vevas kant daou vloaz ha tri-ugent hag a voe tad da Enok.

¹⁹ Jered, goude ma voe bet tad da Enok, a vevas eizh kant vloaz, hag a voe tad da vibien ha da verc'hed.

²⁰ An holl amzer ma vevas Jered a voe eta nav c'hant daou vloaz ha tri-ugent, neuze e varvas.

²¹ Enok a vevas pemp bloaz ha tri-ugent hag a voe tad da Vetushela.

²² Enok a gerzhas gant Doue e-pad tri c'hant vloaz goude ma voe bet tad da Vetushela, hag a voe tad da vibien ha da verc'hed.

²³ An holl amzer ma vevas Enok a voe eta tri c'hant pemp bloaz ha tri-ugent.

²⁴ Enok a gerzhas eta gant Doue, ha ne voe gwelet mui rak Doue a gemeras anezhañ.

²⁵ Metushela a vevas kant seizh vloaz ha pevar-ugent hag a voe tad da Lemek.

²⁶ Metushela, goude ma voe bet tad da Lemek, a vevas seizh kant daou vloaz ha pevar-ugent, hag a voe tad da vibien ha da verc'hed.

²⁷ An holl amzer ma vevas Metushela a voe eta nav c'hant nav bloaz ha tri-ugent, neuze e varvas.

²⁸ Lemek a vevas kant daou vloaz ha pevar-ugent hag a voe tad da ur mab.

²⁹ Gervel a reas anezhañ Noe, en ur lavarout: Hemañ hon dic'hlac'haro eus hol labour hag eus ar boan a ro d'hon daouarn an douar en deus milliget an AOTROU.

³⁰ Lemek, goude ma voe bet tad da Noe, a vevas pemp kant pemzek vloaz ha pevar-ugent, hag a voe tad da vibien ha da verc'hed.

³¹ An holl amzer ma vevas Lemek a voe eta seizh kant seitek vloaz ha tri-ugent, neuze e varvas.

³² Noe a vevas pemp kant vloaz hag a voe tad da Sem, da Cham ha da Jafed.