Geneliezh 43 - Bibl Koad 21: Ar Bibl e Brezhoneg evit ar Vretoned

Pennad 43 Distreiñ a ra breudeur Jozef en Ejipt

¹ An naonegezh a oa gwall vras er vro.

² P'o doe echuet da zebriñ ar gwinizh o doa degaset eus an Ejipt, o zad a lavaras: Distroit da brenañ un tamm boued deomp.

³ Juda a respontas: An den-se en deus lavaret kreñv deomp: Ne welot ket va dremm nemet e vefe ho preur ganeoc'h.

⁴ Mar kasez hor breur ganeomp, mont a raimp hag e prenimp boued dit.

⁵ Met ma ne gasez ket anezhañ, ned aimp ket di rak an den-se en deus lavaret: Ne welot ket va dremm nemet e vefe ho preur ganeoc'h.

⁶ Hag Israel a lavaras: Perak hoc'h eus graet ar boan-se din o tisklêriañ d'an den-se ho poa c'hoazh ur breur?

⁷ Respont a rejont: An den-se en deus goulennet diganeomp titouroù diwar-benn ac'hanomp ha diwar-benn hon tiegezh, o lavarout: Hag eo c'hoazh ho tad bev? Bez' hoc'h eus ur breur? Respontet hon eus dezhañ d'e c'houlennoù. Ha gallout a raemp anavezout e lavarje: Degasit ho preur?

⁸ Juda a lavaras da Israel e dad: Kas ar bugel ganin, ha ni a savo hag a yelo. Evel-se e vevimp ha ne varvimp ket, ni, te hag hor bugale.

⁹ Me a zo kret evitañ, digant va dorn en adc'houlenni. Ma ne zegasan ket anezhañ dit ha ma ne ginnigan ket anezhañ dirak da zremm, e vin kablus ez keñver da viken.

¹⁰ Rak ma n'hor bije ket daleet, e vijemp bet bremañ div wech distro.

¹¹ Israel o zad a lavaras: Mard eo evel-se, grit eta kement-mañ: Kemerit en ho seier eus gwellañ frouezh ar vro ha kasit ur prof d'an den-se: un nebeudad balzam, un nebeudad mel, louzoù-frondus, mir, pistachez hag alamandez.

¹² Kemerit arc'hant all etre ho taouarn hag adkasit en ho taouarn an arc'hant a zo bet lakaet deoc'h e genoù ho seier, marteze e oa un errol.

¹³ Kemerit ivez ho preur, savit ha distroit etrezek an den-se.

¹⁴ Ra roio an Doue hollc'halloudek deoc'h trugarez dirak an den-se, ra laosko deoc'h ho preur all ha Benjamin! Ha mard eo ret din bezañ forc'het diouzh va bugale, ra vin forc'het!

¹⁵ Kemer a rejont eta ar prof hag an doubl a arc'hant en o daouarn, ha Benjamin. Goude, o sevel, ez ejont d'an Ejipt hag en em zalc'hjont dirak Jozef.

¹⁶ Jozef a welas Benjamin ganto hag a lavaras da vestr e di: Kas an dud-se d'an ti, lazh ul loen bennak ha fich anezhañ, rak debriñ a raint ganin da greisteiz.

¹⁷ An den a reas evel m'en doa lavaret Jozef hag a gasas an dud-mañ da di Jozef.

¹⁸ An dud-mañ o doe aon pa voent kaset da di Jozef, hag e lavarjont: Abalamour d'an arc'hant a voe adlakaet en hor seier ar wech kentañ eo e kaser ac'hanomp, evit en em daoler hag en em stlaper warnomp, hag hor c'hemer evit sklaved ha kregiñ en hon ezen.

¹⁹ Neuze e tostajont ouzh mestr ti Jozef hag e komzjont dezhañ e-tal an nor,

²⁰ o lavarout: Aotrou, selaou ac'hanomp! Deuet omp ur wech kentañ da brenañ boued

²¹ ha, pa oamp en em gavet en ostaleri ha ma tigorjomp hor seier, setu, arc'hant pep hini ac'hanomp a oa e genoù e sac'h, hon arc'hant hervez e bouez, hag hon eus henn distroet etre hon daouarn.

²² Degaset hon eus arc'hant all ganeomp en hon daouarn evit prenañ boued. N'ouzomp ket piv en doa lakaet hon arc'hant en hor seier.

²³ Eñ a lavaras: Ra vo ar peoc'h ganeoc'h! N'ho pet ket aon, ho Toue eo. Doue ho tad eo an hini en deus roet un teñzor deoc'h en ho seier, resevet em eus hoc'h arc'hant. Hag e tegasas dezho Simeon.

²⁴ An den-se a gasas anezho e ti Jozef. Reiñ a reas dour dezho hag e walc'hjont o zreid; reiñ a reas ivez boued d'o ezen.

²⁵ Hag e kempennjont ar prof, o c'hortoz donedigezh Jozef da greisteiz, rak klevet o doa penaos e tlejent debriñ ar bara eno.

²⁶ Jozef a zistroas d'ar gêr. Neuze e kinnigjont dezhañ en ti ar prof o doa en o daouarn, hag e stoujont d'an douar dirazañ.

²⁷ Eñ a c'houlennas outo penaos edo an traoù ganto hag a lavaras: Ho tad a zo war an oad, an hini ho poa komzet din diwar e benn, ha yac'h eo? Bev eo bepred?

²⁸ Lavarout a rejont: Da servijer, hon tad, a zo yac'h, bev eo c'hoazh. Hag e plegjont hag e stoujont.

²⁹ Hag o sevel e zaoulagad, e welas Benjamin e vreur, mab e vamm, hag e lavaras: Hemañ eo ho preur yaouankañ ho poa komzet din diwar e benn? Hag e lavaras: Doue da ober trugarez dit, va mab!

³⁰ Jozef a hastas rak e galon a voe fromet ouzh e vreur, hag e klaskas ul lec'h evit gouelañ. Mont a reas en e gambr hag e ouelas.

³¹ Goude bezañ gwalc'het e zremm, ez eas er-maez hag, oc'h emvestroniañ, e lavaras: Servijit ar pred.

³² Hag e voe servijet a-du, hag int a-du. Servijet e voe ivez a-du an Ejipsianed a zebre gantañ, dre ma ne c'hell ket an Ejipsianed debriñ ar bara gant an Hebreed, kement-se a zo un euzhusted evit an Ejipsianed.

³³ Azezañ a rejont eta dirazañ, ar c'hentañ-ganet hervez e henañded hag an hini yaouankañ hervez e oad, hag an dud-se a selle an eil ouzh egile gant souezh.

³⁴ Hag e kasas meuzioù dezho azirazañ, met lodenn Benjamin a oa pemp gwech vrasoc'h eget al lodennoù all. Evañ a rejont, hag e laouenajont gantañ.