Geneliezh 41 - Bibl Koad 21: Ar Bibl e Brezhoneg evit ar Vretoned

Pennad 41 Huñvreoù Faraon; Jozef gouarnour en Ejipt

¹ A-benn daou vloaz e c'hoarvezas m'en doe Faraon un huñvre. Setu, en em zalc'he tost d'ar stêr.

² Ha setu, e pignas seizh buoc'h kaer da welout ha lart eus ar stêr, hag e peurjont er prad.

³ Ha setu, seizh buoc'h all fall da welout ha treut a bignas eus ar stêr en o goude, hag en em zalc'hjont e-kichen ar re all war vord ar stêr.

⁴ Ar buoc'hed fall da welout ha treut a zebras ar seizh buoc'h kaer da welout ha lart. Ha Faraon a zihunas.

⁵ Hag e kouskas hag ec'h huñvreas un eil gwech. Setu, seizh tañvouezenn druz ha brav a vountas war un hevelep korzenn.

⁶ Ha seizh tañvouezenn treut ha devet gant avel ar sav-heol a greskas en o goude.

⁷ An tañvouezennoù treut a lonkas ar seizh tañvouezenn druz ha leun. Ha Faraon a zihunas. Setu an huñvre.

⁸ Diouzh ar beure, e spered a voe strafuilhet hag e kasas da c'hervel holl hudourien hag holl re fur an Ejipt. Faraon a lavaras e huñvreoù met ne oa den evit o displegañ dezhañ.

⁹ Neuze an hanafer bras a gomzas da Faraon, o lavarout: Emaon o vont da eñvoriñ hiziv va mankoù.

¹⁰ Faraon en em lakaas droug ennañ a-enep e servijerien hag a lakaas ac'hanon en toull-bac'h, e ti penn ar warded, me hag ar baraer bras.

¹¹ Neuze hor boe, eñ ha me, un huñvre en un hevelep nozvezh. Huñvreal a rejomp, pep hini e huñvre da zisplegañ dezhañ.

¹² Eno ganeomp e oa un den yaouank hebreat, servijer penn ar warded, hag e lavarjomp dezhañ hon huñvreoù hag o displegas deomp. Reiñ a reas da bep hini un displegadenn hervez e huñvre.

¹³ An traoù a zo en em gavet evel m'en doa o displeget, adlakaet on bet em c'harg hag eñ a voe krouget.

¹⁴ Faraon a gasas da c'hervel Jozef, a oa lakaet buan er-maez eus an toull-bac'h. Aotennet e oa, lakaet e oa da cheñch e zilhad, hag e teuas da gavout Faraon.

¹⁵ Faraon a lavaras da Jozef: Un huñvre am eus graet ha n'eus den ebet da reiñ an displegadenn anezhi. Klevet em eus lavarout e tisplegez un huñvre pa glevez anezhi.

¹⁶ Jozef a respontas da Faraon, o lavarout: N'eo ket me, Doue eo a roio da Faraon ur respont a beoc'h.

¹⁷ Faraon a lavaras da Jozef: Em huñvre, setu, en em zalc'hen war vord ar stêr.

¹⁸ Ha setu, eus ar stêr e pignas seizh buoc'h lart ha kaer da welout, hag e peurjont er prad.

¹⁹ Ha setu, seizh buoc'h all a bignas en o goude, dister, fall-meurbet da welout ha treut, n'em boa biskoazh gwelet reoù all ken vil en holl vro Ejipt.

²⁰ Ar buoc'hed treut ha fall da welout a zebras ar seizh buoc'h lart kentañ.

²¹ Mont a rejont en o c'hof hep na seblantjent bezañ aet ennañ, hag e oant ken fall da welout ha diagent. Neuze e tihunis.

²² Gwelout a ris c'hoazh, oc'h huñvreal, seizh tañvouezenn leun ha brav a vountas war un hevelep korzenn.

²³ Ha seizh tañvouezenn disec'h, treut ha devet gant avel ar sav-heol a greskas en o goude.

²⁴ An tañvouezennoù treut a lonkas ar seizh tañvouezenn brav. Lavaret em eus kement-se d'an hudourien, met hini anezho n'en displeg din.

²⁵ Jozef a lavaras da Faraon: Ar pezh en deus gwelet Faraon en e huñvre a zo un dra hepken, Doue en deus disklêriet da Faraon ar pezh ez a d'ober.

²⁶ Ar seizh buoc'h vrav a zo seizh vloaz hag ar seizh tañvouezenn vrav a zo seizh vloaz: un hevelep huñvre eo.

²⁷ Ar seizh buoc'h treut ha fall da welout a bignas goude ar re-se a zo seizh vloaz. Hag ar seizh tañvouezenn c'houllo ha devet gant avel ar sav-heol a vo seizh vloaz a naonegezh.

²⁸ Kement-se am eus lavaret da Faraon: Doue en deus roet da anavezout da Faraon ar pezh ez a d'ober.

²⁹ Setu ez a d'en em gavout seizh vloaz a fonnder en holl vro Ejipt.

³⁰ Hag e teuio seizh vloaz a naonegezh en o goude hag an holl fonnder-se a vo ankounac'haet e bro Ejipt, hag an naonegezh a guzumo ar vro.

³¹ Ar fonnder n'en em ziskouezo ken er vro abalamour d'an naonegezh a zeuio goude, rak gwall vras e vo.

³² Ha diwar-benn ma'z eo an huñvre en em roet div wech da Faraon, eo abalamour ma'z eo kement-se divizet gant Doue, ha pres 'zo gant Doue henn ober.

³³ Bremañ, ra zibabo Faraon un den skiantek ha fur ha ra lakaio anezhañ war vro Ejipt.

³⁴ Ra lakaio eta Faraon kefridiourien war ar vro ha ra dailhint ar bempvedenn diwar vro Ejipt e-pad ar seizh bloavezh a fonnder,

³⁵ ra zastumint an holl vevañs eus ar bloavezhioù mat a zeuio bremañ, dindan urzh Faraon ra zaspugnint gwinizh ha bevañs er c'hêrioù ha ra o diwallint.

³⁶ Ar bevañs-se a vo a-du evit ar vro, evit ar seizh bloavezh a naonegezh a zeuio e bro Ejipt, evit na vo ket ar vro kuzumet gant an naonegezh.

³⁷ Ar c'homzoù-se a blijas da Faraon ha d'e holl servijerien.

³⁸ Faraon a lavaras d'e servijerien: Ha kavout a rafen un den evel hemañ, un den en deus spered Doue ennañ?

³⁹ Ha Faraon a lavaras da Jozef: P'en deus roet Doue dit da anavezout kement-mañ, n'eus den skiantek ha fur eveldout.

⁴⁰ Te eo a vo mestr war va zi, ha va holl bobl a sento ouzh da c'henoù. Brasoc'h e vin hepken egedout dre an tron.

⁴¹ Faraon a lavaras da Jozef: Sell, da lakaat a ran da vestr war holl vro Ejipt.

⁴² Faraon a lamas e walenn diwar e zorn hag he lakaas ouzh dorn Jozef. Hag e wiskas anezhañ gant dilhad lin fin, hag e lakaas ur gelc'henn aour en-dro d'e c'houzoug.

⁴³ En lakaas da bignat war e eil karr, hag e veze kriet a-raok dezhañ: D'an daoulin! En lakaas da vestr war holl vro Ejipt.

⁴⁴ Faraon a lavaras da Jozef: Me eo Faraon! Hepdout den ne savo e zorn pe e droad en holl vro Ejipt.

⁴⁵ Faraon a c'halvas Jozef Zafnad-Paneak hag a roas dezhañ Asnad merc'h Poti-Fera aberzhour On da wreg. Ha Jozef a yeas da weladenniñ bro Ejipt.

⁴⁶ Jozef a oa oadet a dregont vloaz pa en em zalc'has dirak Faraon roue Ejipt. Jozef eta a yeas kuit a-zirak Faraon hag a redas holl vro Ejipt.

⁴⁷ An douar a roas gant fonnder e-pad ar seizh bloavezh a leunder.

⁴⁸ Jozef a zastumas an holl vevañs eus ar seizh bloavezh-se e bro Ejipt hag a lakaas ar bevañs er c'hêrioù. Lakaat a reas e pep kêr ar bevañs eus an douaroù a-ziwar-dro.

⁴⁹ Jozef a zastumas un niver ken bras a winizh ma oa evel traezh ar mor, kement ken na gonted ken anezhañ dre ma ne oa ken niver evit kontañ.

⁵⁰ A-raok n'en em gavas ar bloavezhioù a naonegezh, e c'hanas da Jozef daou vab, ganet dezhañ gant Asnad merc'h Poti-Fera aberzhour On.

⁵¹ Jozef a c'halvas ar c'hentañ-ganet Manase rak Doue, emezañ, en deus roet din da ankounac'haat va holl boan hag holl di va zad.

⁵² Hag e c'halvas an eil Efraim rak Doue, emezañ, en deus va rentet frouezhus e bro va glac'har.

⁵³ Neuze ec'h echuas ar seizh bloavezh a leunder a voe e bro Ejipt.

⁵⁴ Ar seizh bloavezh a naonegezh a zeuas, evel m'en doa lavaret Jozef. An naonegezh a voe en holl vroioù met en holl vro Ejipt e voe bara.

⁵⁵ Pa voe holl vro Ejipt en naonegezh, ar bobl a grias da Faraon evit kaout bara. Faraon a respontas d'an holl Ejipsianed: It da gavout Jozef ha grit ar pezh a lavaro deoc'h.

⁵⁶ An naonegezh a voe eta war holl c'horre ar vro, ha Jozef a zigoras an holl c'hrignoloù hag a werzhas d'an Ejipsianed. An naonegezh a oa bras e bro Ejipt.

⁵⁷ Hag eus an holl vroioù e teued d'an Ejipt da brenañ gwinizh digant Jozef, rak an naonegezh a oa bras war an douar holl.