Geneliezh 35 - Bibl Koad 21: Ar Bibl e Brezhoneg evit ar Vretoned

Pennad 35 Jakob e Betel; ganedigezh Benjamin; marv Rachel; marv Izaak

¹ Doue a lavaras da Jakob: Sav, pign da Vetel ha chom eno, gra eno un aoter d'an Doue en em ziskouezas dit pa dec'hes dirak Ezaü da vreur.

² Jakob a lavaras d'e diegezh ha d'ar re holl a oa gantañ: Lamit an doueoù estren diouzh ho touez, en em c'hlanait ha cheñchit ho tilhad,

³ hag e savimp, hag e pignimp da Vetel, hag e raimp eno un aoter d'an Doue en deus respontet din da zeiz va enkrez hag a zo bet ganin e-pad va beaj.

⁴ Neuze e rojont da Jakob an holl zoueoù estren o doa, hag ar gwalinier a oa ouzh o divskouarn. Jakob a zouaras anezho didan an dervenn a oa e-kichen Sichem.

⁵ Goude-se ez ejont kuit. Doue a skoas a spont ar c'hêrioù a oa en-dro dezho ha n'ejont ket war-lerc'h mibien Jakob.

⁶ Jakob a zeuas da Luz, a zo Betel, e bro Ganaan, eñ hag an holl bobl a oa gantañ.

⁷ Sevel a reas eno un aoter hag e c'halvas al lec'h-se El-Betel, rak eno eo e oa Doue en em ziskouezet dezhañ pa dec'he dirak e vreur.

⁸ Debora, magerez Rebeka, a varvas hag a voe sebeliet izeloc'h eget Betel didan an dervenn a c'halver Allon-Bakuth.

⁹ Doue en em ziskouezas c'hoazh da Jakob pa oa deuet eus Paddan-Aram hag a vennigas anezhañ.

¹⁰ Doue a lavaras: Da anv a zo Jakob; ne vi ken galvet Jakob met Israel a vo da anv. Hag e roas dezhañ an anv Israel.

¹¹ Doue a lavaras: Me eo an Doue holl-c'halloudek. Bez frouezhus ha kresk; ur vroad ha zoken un engroez a vroadoù a c'hano diouzhit, rouaned a zeuio diouzh da lounezhi.

¹² Me a roio dit ar vro am eus roet da Abraham ha da Izaak, hag e roin ar vro-mañ da'z lignez war da lerc'h.

¹³ Doue a yeas kuit digantañ eus al lec'h m'en doa komzet outañ.

¹⁴ Jakob a savas ur peul e-lec'h m'en doa komzet outañ, ur peul-maen, hag e skuilhas un evaj-kinnig warnañ, hag e skuilhas eoul warnañ.

¹⁵ Jakob a c'halvas al lec'h m'en doa komzet outañ Doue: Betel.

¹⁶ Mont a rejont kuit eus Betel, hag e oa c'hoazh ur pennad-hent evit erruout en Efrata pa c'hanas Rachel. Hag he doe kalz a boan da wilioudiñ.

¹⁷ Evel m'he doa kalz a boan o wilioudiñ, an amiegez a lavaras: Na'z pez ket aon, rak c'hoazh ec'h eus ur mab.

¹⁸ Evel ma roe hec'h ene, rak mervel a reas, e c'halvas anezhañ Ben-Oni, met e dad e c'halvas Benjamin.

¹⁹ Rachel a varvas eta; ha sebeliet e voe war hent Efrata, a zo Betlehem.

²⁰ Jakob a savas eno ur peul war he bez. Peul bez Rachel eo, ha chomet eo c'hoazh betek hiziv.

²¹ Israel a yeas kuit hag a fichas e deltenn en tu all da Vigdal-Eder.

²² E-pad ma voe Israel o chom er vro-se, e c'hoarvezas ma yeas Ruben da gousket gant Bilha adwreg e dad. Israel a glevas-se. Jakob en doa daouzek mab.

²³ Mibien Lea: Ruben, kentañ-ganet eus Jakob, Simeon, Levi, Isakar ha Zabulon.

²⁴ Mibien Rachel: Jozef ha Benjamin.

²⁵ Mibien Bilha matezh Rachel: Dan ha Neftali.

²⁶ Mibien Zilpa matezh Lea: Gad hag Aser. Ar re-se eo mibien Jakob, a c'hanas dezhañ e Paddan-Aram.

²⁷ Jakob a zeuas etrezek Izaak e dad da v-Mamre e Kirjad-Arba, a zo Hebron, e-lec'h ma oa bet o chom Abraham hag Izaak.

²⁸ An amzer ma vevas Izaak a voe eta kant ha pevar-ugent vloaz.

²⁹ Neuze e tianalas hag e varvas, hag e voe dastumet etrezek e bobloù, oadet ha gwalc’het a zeizioù. Ezaü ha Jakob e vibien a sebelias anezhañ.