Geneliezh 32 - Bibl Koad 21: Ar Bibl e Brezhoneg evit ar Vretoned

Pennad 32 Jakob a zo prest da vont da gavout Ezaü; e stourm gant an ael e Peniel

¹ Jakob a gendalc'has e hent hag aeled Doue en em gavas gantañ.

² P'en doa gwelet anezho, Jakob a lavaras: Kamp Doue eo! Hag e c'halvas al lec'h-se Mahanaim.

³ Jakob a gasas kannaded a-raok dezhañ war-zu Ezaü e vreur, da vro Seir, war vaezioù Edom.

⁴ Gourc'hemenn a reas dezho, o lavarout: Komz a reot evel-henn ouzh Ezaü va aotrou: Setu ar pezh a lavar da servijer Jakob: Chomet on e ti Laban hag on bet eno betek bremañ.

⁵ Bez' em eus ejened, ezen, deñved, mevelien ha mitizhien, hag e kasan d'henn disklêriañ da'm aotrou evit ma kavin trugarez dirak da zaoulagad.

⁶ Ar gannaded a zistroas da gavout Jakob hag a lavaras: Aet omp da gavout da vreur Ezaü, hag e kerzh war-arbenn dit gant pevar c'hant den.

⁷ Jakob a oa spontet bras ha leuniet a enkrez. Neuze e lodennas ar bobl a oa gantañ, an deñved, an ejened hag ar c'hañvaled e div vandenn,

⁸ hag e lavaras: Mar sko Ezaü unan eus ar bandennoù, ar vandenn a chomo a c'hello tec'hel kuit.

⁹ Jakob a lavaras: O Doue va zad Abraham ha Doue va zad Izaak, AOTROU, te hag ac'h eus lavaret din: Distro da'z pro hag etrezek da gerentiezh, hag e vin mat ez keñver!

¹⁰ Re vihan on evit an holl vadelezhioù hag an holl fealded ac'h eus diskouezet e-keñver da servijer, rak treuzet em eus ar Jordan-mañ gant va bazh ha bremañ e ran div vandenn.

¹¹ Me az ped, salv ac'hanon eus dorn va breur, eus dorn Ezaü! Rak aon am eus na zeufe ha na skofe ac'hanon, hag ar vamm gant ar vugale.

¹² Koulskoude, te ac'h eus lavaret: A-dra-sur e vin mat ez keñver hag e lakain da lignez da zont da vezañ evel traezh ar mor na c'heller ket kontañ abalamour d'e niver bras.

¹³ Tremen a reas an noz el lec'h-se. Kemer a reas eus ar pezh a zeuas en e zorn evit ober ur prof da Ezaü, e vreur:

¹⁴ daou c'hant gavr hag ugent bouc'h, daou c'hant dañvadez hag ugent maout,

¹⁵ tregont kañvalez a roe da zenañ gant o re vihan, daou-ugent buoc'h ha dek tarv, ugent azenez ha dek azen yaouank.

¹⁶ O lakaat a reas etre daouarn e servijerien, pep tropell an eil goude egile, hag e lavaras d'e servijerien: Tremenit a-raok din ha lakait ur pennad etre ur vandenn hag eben.

¹⁷ Neuze e c'hourc'hemennas d'an hini kentañ, o lavarout: Pa en em gavo Ezaü va breur ganit ha pa c'houlenno ouzhit: Da biv out? Da belec'h emaout o vont? Da biv eo ar pezh a zo dirazout?

¹⁸ Lavarout a ri: Da'z servijer Jakob. Ur prof eo, a gas da Ezaü va aotrou, ha setu e teu e-unan war hol lerc'h.

¹⁹ Reiñ a reas an hevelep urzh d'an eil ha d'an trede, ha d'ar re holl a yae war-lerc'h an tropelloù, o lavarout: Evel-se e komzot pa en em gavot gant Ezaü:

²⁰ Lavarout a reot: Setu, da servijer Jakob a zeu war hol lerc'h. Rak lavarout a rae: Dousaat a rin anezhañ gant ar prof a ya dirazon, ha goude-se e welin e zremm, marteze e tegemero ac'hanon en un doare trugarezus.

²¹ Ar prof a dremenas eta dirazañ, met eñ a chomas er c'hamp e-pad an noz.

²² Sevel a reas en noz-se hag e kemeras e ziv wreg, e ziv vatezh hag e unnek mab, hag e tremenas roudouz Jabok.

²³ O c'hemer a reas eta hag o lakaas da dremen ar froud. Lakaat a reas ivez da dremen ar pezh en doa.

²⁴ Jakob a chomas e-unan. Hag un den a c'hourenas gantañ betek sav gouloù-deiz.

²⁵ Pa welas an den ne c'helle ket en trec'hiñ, e skoas war bleg e vorzhed, ha pleg morzhed Jakob a voe dilec'hiet e-pad ma c'hourenas gantañ.

²⁶ Lavarout a reas: Lez ac'hanon da vont, rak gouloù deiz a zo deuet. Hag eñ a lavaras: Ne lezin ket ac'hanout da vont ken na'z po va benniget.

²⁷ Lavarout a reas: Petore anv ac'h eus? Hag eñ a lavaras: Jakob.

²⁸ Lavarout a reas: Da anv ne vo ken Jakob met Israel. Rak gourenet ec'h eus gant Doue ha gant tud, ha trec'het ec'h eus.

²⁹ Jakob a reas goulennoù outañ, o lavarout: Desk din da anv, me az ped. Respont a reas: Perak e c'houlennez va anv? Hag e vennigas anezhañ eno.

³⁰ Jakob a c'halvas al lec'h-se Peniel, rak lavarout a reas: Gwelet em eus Doue dremm ouzh dremm ha va ene a zo bet saveteet.

³¹ Pa voe tremenet gantañ Peniel, an heol a savas warnañ, hag e kamme diouzh e vorzhed.

³² Setu perak, betek hiziv, mibien Israel ne zebront ket nervenn ar vorzhed, an hini a zo war bleg ar vorzhed, dre ma voe skoet pleg morzhed Jakob e nervenn ar vorzhed.