Geneliezh 13 - Bibl Koad 21: Ar Bibl e Brezhoneg evit ar Vretoned

Pennad 13 Abram ha Lot

¹ Abram a bignas eus an Ejipt etrezek ar c'hreisteiz, eñ, e wreg, kement a oa dezhañ ha Lot gantañ.

² Abram a oa gwall binvidik e tropelloù, en arc'hant hag en aour.

³ Neuze e tistroas dre lec'hioù eus ar c'hreisteiz betek Betel, betek al lec'h ma oa bet e deltenn da gentañ etre Betel hag Ai,

⁴ el lec'h ma oa an aoter en doa graet diagent. Hag Abram a c'halvas eno anv an AOTROU.

⁵ Lot a gerzhe gant Abram. Eñ ivez en doa deñved, ejened ha teltennoù.

⁶ Ar vro ne oa ket bras a-walc'h evit ma chomjent asambles, rak o madoù a oa ken stank ma ne c'helljont ket chom asambles.

⁷ Un tabut a savas etre mesaerien tropelloù Abram ha mesaerien tropelloù Lot. Ar Gananeiz hag ar Ferezianed a oa neuze o chom er vro.

⁸ Abram a lavaras da Lot: Gant na vo ket, me az ped, tabut etre me ha te, nag etre va mesaerien ha da vesaerien, rak ni a zo breudeur.

⁹ Ha n'emañ ket dirazout an holl vro? Pella eta diouzhin: mar kemerez a-gleiz, mont a rin a-zehou, ha mar kemerez a-zehou, mont a rin a-gleiz.

¹⁰ Lot, o sevel e zaoulagad, a welas holl blaenenn ar Jordan a oa douret penn-da-benn. A-raok ma tistrujas an AOTROU Sodom ha Gomora, o vont etrezek Zoar e oa evel liorzh an AOTROU, evel bro Ejipt.

¹¹ Lot a zibabas evitañ holl blaenenn ar Jordan hag ez eas ouzh kostez ar sav-heol. Hag e pellaas an eil digant egile.

¹² Abram a chomas e bro Ganaan. Lot a chomas e kêrioù ar blaenenn hag a fichas e deltennoù betek Sodom.

¹³ Tud Sodom a oa fall ha pec'herien bras dirak an AOTROU.

¹⁴ An AOTROU a lavaras da Abram goude ma oa pellaet Lot dioutañ: Sav eta da zaoulagad ha sell diouzh al lec'h emaout ennañ etrezek an hanternoz, ar c'hreisteiz, ar sav-heol hag ar c'huzh-heol,

¹⁵ rak an holl vro a welez a roin dit ha da'z lignez da viken.

¹⁶ Ober a rin ma vo da lignez evel poultr an douar; mar gell unan bennak kontañ poultrenn an douar, da lignez ivez a vo kontet.

¹⁷ Sav, kerzh dre ar vro a-hed hag a-led, rak he reiñ a rin dit.

¹⁸ Neuze Abram a zougas e deltennoù hag a zeuas da chom e dervennoù Mamre, a zo en Hebron. Hag e savas eno un aoter d'an AOTROU.