Galated 2 - Bibl Koad 21: Ar Bibl e Brezhoneg evit ar Vretoned

Pennad 2 Pevarzek vloaz goude, ...

¹ Pevarzek vloaz goude, e pignis a-nevez da Jeruzalem gant Barnabaz hag e kemeris ivez Tit ganin.

² Mont a ris di hervez un diskuliadur, hag e tisklêris dirazo an Aviel a brezegen e-touez ar baganed, hag e tisklêris anezhañ dreist-holl d’ar re a zo evel kolonennoù, gant aon da redek pe da vezañ redek en aner.

³ Ha Tit e-unan, hag a oa ganin, ne voe ket rediet da vezañ amdroc’het, petra bennak ma oa Gresian.

⁴ Ha kement-se a c’hoarvezas abalamour d’ar fals-vreudeur antreet e kuzh en hon touez, deuet e-barzh evit spiañ al librentez hon eus e Jezuz-Krist, hag evit hol lakaat e sklaverezh.

⁵ Ne fellas ket deomp plegañ ur pennadig hepken dezho, evit ma vije kendalc’het ar wirionez eus an Aviel en ho touez.

⁶ E-keñver ar re a zo kontet evit bezañ tud a-bouez, ne sell ket ouzhin petra int bet gwechall rak Doue ne ra diforc’h ebet e-touez an dud, ar re a zo kontet evit bezañ a-bouez n’o deus lavaret netra din.

⁷ Er c’hontrol, pa weljont e oa bet fiziet ennon an Aviel evit ar re ziamdroc’h evel ma oa bet e Pêr evit an amdroc’hidi,

⁸ rak an hini en deus labouret e Pêr evit e lakaat da abostol an amdroc’hidi en deus ivez labouret ennon evit ar baganed,

⁹ ha pa anavezjont ar c’hras a oa bet roet din, Jakez, Kefaz ha Yann, int hag a zo sellet evel kolonennoù, a roas din ha da Varnabaz an dorn a gevredigezh, evit ma’z ajemp, ni etrezek ar baganed, int etrezek an amdroc’hidi.

¹⁰ Dleout a raemp hepken kaout soñj eus ar beorien, hag em eus henn graet gant aked.

Paol a eneb ouzh Pêr

¹¹ Met pa zeuas Pêr da Antioch, me a enebas outañ a-dal, dre ma telleze bezañ tamallet.

¹² Rak a-raok ma oa deuet hiniennoù a-berzh Jakez, e tebre gant ar baganed. Met adalek ma oant erruet, en em dennas ha en em zalc’has pell diganto o kaout aon rak an amdroc’hidi.

¹³ Hag asambles gantañ ar Yuzevien all a heulias e bilpouzerezh, en hevelep doare ma voe sachet Barnabaz zoken en o filpouzerezh.

¹⁴ Pa welis ne gerzhent ket eeun hervez wirionez an Aviel, e lavaris da Bêr dirazo holl: Te a zo ur Yuzev, mar bevez evel ar baganed ha nann evel ar Yuzevien, perak e rediez ar baganed da vevañ evel ar Yuzevien?

¹⁵ Ni, Yuzevien a c’hanedigezh ha nann pec’herien a-douez ar baganed,

¹⁶ oc’h anavezout n’eo ket reishaet an den dre oberoù al lezenn met dre ar feiz eus Jezuz-Krist, hon eus hon-unan kredet e Jezuz-Krist, evit bezañ reishaet dre ar feiz e Krist ha nann dre oberoù al lezenn, rak kig ebet ne vo reishaet dre oberoù al lezenn.

¹⁷ Met e-pad ma’z omp o klask bezañ reishaet dre Grist, mar degouezhfe deomp-ni hon-unan bezañ kavet pec’herien, daoust ha Krist a vefe eta ministr ar pec’hed? N’eo ket!

¹⁸ Rak mar adsavan an traoù am eus distrujet, en em zisklêrian va-unan un torrer eus al lezenn,

¹⁹ rak dre al lezenn eo ez on marv d’al lezenn, evit bevañ da Zoue.

²⁰ Kroazstaget on bet asambles gant Krist ha, mar bevan, n’eo ket me ken a vev met Krist eo a vev ennon. Mar bevan c’hoazh er c’hig, e vevan dre ar feiz e Mab Doue en deus va c’haret hag a zo en em roet e-unan evidon.

²¹ Ne gasan ket da netra gras Doue, rak mar deu ar reizhder eus al lezenn, Krist eta a zo marvet en aner.