Ezekiel 48 - Bibl Koad 21: Ar Bibl e Brezhoneg evit ar Vretoned

Pennad 48

¹ Setu anvioù ar meuriadoù: Adalek penn an hanternoz, a-hed hent Hetlon, betek digor Hamad, Hazar-Enan, harz Damask war-zu an hanternoz, war vevenn Hamad, eus ar sav-heol d'ar c'huzh-heol, e vo lodenn Dan.

² Ouzh harz Dan, eus ar sav-heol d'ar c'huzh-heol, e vo lodenn Aser.

³ Ouzh harz Aser, eus ar sav-heol d'ar c'huzh-heol, e vo lodenn Neftali.

⁴ Ouzh harz Neftali, eus ar sav-heol d'ar c'huzh-heol, e vo lodenn Vanase.

⁵ Ouzh harz Manase, eus ar sav-heol d'ar c'huzh-heol, e vo lodenn Efraim.

⁶ Ouzh harz Efraim, eus ar sav-heol d'ar c'huzh-heol, e vo lodenn Ruben.

⁷ Ouzh harz Ruben, eus ar sav-heol d'ar c'huzh-heol, e vo lodenn Juda.

⁸ Ouzh harz Juda, eus ar sav-heol d'ar c'huzh-heol, e vo al lodenn savet a ginnigot: pemp mil warn-ugent ilinad a ledander, hag an hirder evel unan al lodennoù eus ar sav-heol d'ar c'huzh-heol. Ar santual a vo en he c'hreiz.

⁹ Al lodenn a savot evel ur prof d'an AOTROU en devo pemp mil warn-ugent ilinad a hirder, ha dek mil a ledander.

¹⁰ Al lodenn santel savet-mañ a vo evito, evit an aberzhourien: pemp mil warn-ugent ouzh an hanternoz, dek mil a ledander ouzh ar c'huzh-heol, dek mil ouzh ar sav-heol, pemp mil warn-ugent ouzh ar c'hreisteiz. Santual an AOTROU a vo en he c'hreiz.

¹¹ D'an aberzhourien santelaet e vo, da vibien Zadok, ar re o deus miret va servij ha n'o deus ket diheñchet, pa ziheñche mibien Israel evel ma tiheñche al Levited.

¹² Dezho e vo ul lodenn savet diwar al lodenn savet diaraok diwar ar vro, ul lodenn santel-meurbet, a-hed harz al Levited.

¹³ Ouzh harz an aberzhourien, al Levited o devo pemp mil warn-ugent ilinad a hirder, ha dek mil a ledander. An holl hirder a vo pemp mil warn-ugent, hag al led a vo dek mil.

¹⁴ Ne werzhint ha ne eskemmint netra diouti, frouezh kentañ ar vro ne vint ket douget eno, rak un dra santel eo evit an AOTROU.

¹⁵ Ar pemp mil a chomo e ledander, diwar ar pemp mil warn-ugent, a vo ul lec'h boutin evit kêr, evit he chomlec'hioù hag evit he fabourzioù. Kêr a vo er c'hreiz.

¹⁶ Ha setu he muzulioù: kostez an hanternoz, pevar mil pemp kant; kostez ar c'hreisteiz, pevar mil pemp kant; kostez ar sav-heol, pevar mil pemp kant; kostez ar c'huzh-heol, pevar mil pemp kant.

¹⁷ Fabourzioù kêr o devo ouzh an hanternoz daou-c'hant hanter-kant, ouzh ar c'hreisteiz daou-c'hant hanter-kant, ouzh ar sav-heol daou-c'hant hanter-kant, ouzh ar c'huzh-heol daou-c'hant hanter-kant.

¹⁸ Ar pezh a chomo war an hirder a-hed al lodenn savet diwar al lodenn santel, en devo dek mil ouzh tu ar sav-heol ha dek mil ouzh tu ar c'huzh-heol. Hag e vo a-hed al lodenn savet diwar al lodenn santel, ha leve an daou bennad-se a vo ar boued evit ar re a labouro e kêr.

¹⁹ Ar re a labouro e kêr, a-douez holl veuriadoù Israel, a labouro er pennadoù-se.

²⁰ An holl lodenn savet he devo pemp mil warn-ugent war bemp mil warn-ugent. Ur c'harrez e vo al lodenn savet, oc'h enderc'hel domani kêr.

²¹ An nemorant a vo evit ar priñs, d'an daou du d'al lodenn savet santel ha da zomani kêr, a-hed ar pemp mil warn-ugent eus al lodenn savet betek harz ar sav-heol, ha war-zu ar c'huzh-heol a-hed ar pemp mil warn-ugent betek harz ar c'huzh-heol, a-hed al lodennoù, evit ar priñs; al lodenn savet santel ha santual an ti a vo er c'hreiz.

²² Evel-se, d'ar priñs e vo ar pezh en em gavo etre harz Juda hag harz Benjamin, nemet domani al Levited ha domani kêr, a vo e-kreiz domani ar priñs.

²³ Ha setu evit nemorant ar meuriadoù. Eus ar sav-heol d'ar c'huzh-heol, e vo lodenn Venjamin.

²⁴ Ouzh harz Benjamin, eus ar sav-heol d'ar c'huzh-heol, e vo lodenn Simeon.

²⁵ Ouzh harz Simeon, eus ar sav-heol d'ar c'huzh-heol, e vo lodenn Isakar.

²⁶ Ouzh harz Isakar, eus ar sav-heol d'ar c'huzh-heol, e vo lodenn Zabulon.

²⁷ Ouzh harz Zabulon, eus ar sav-heol d'ar c'huzh-heol, e vo lodenn C'had.

²⁸ Ouzh harz Gad, war-zu ar c'hreisteiz: Ouzh ar c'hreisteiz, an harz a vo adalek Tamar betek doureier Meriba e Kadesh, a-hed ar froud betek ar Mor Bras.

²⁹ Honnezh eo ar vro a lodennot dre ar sord en hêrezh da veuriadoù Israel, hag ar re-se eo o lodennoù, eme an Aotrou AOTROU.

³⁰ Setu amañ monedigezhioù kêr: Ouzh tu an hanternoz, ar muzul a vo pevar mil pemp kant ilinad,

³¹ ha dorojoù kêr a vo anvet hervez meuriadoù Israel: teir dor ouzh an hanternoz, unan anvet dor Ruben, unan anvet dor Juda, unan anvet dor Levi.

³² Ouzh tu ar sav-heol, pevar mil pemp kant, ha teir dor, unan anvet dor Jozef, unan anvet dor Venjamin, unan anvet dor Zan.

³³ Ouzh tu ar c'hreisteiz, pevar mil pemp kant, ha teir dor, unan anvet dor Simeon, unan anvet dor Isakar, unan anvet dor Zabulon.

³⁴ Ouzh tu ar c'huzh-heol, pevar mil pemp kant, ha teir dor, unan anvet dor C'had, unan anvet dor Aser, unan anvet dor Neftali.

³⁵ An dro he devo triwec'h mil ilinad, hag adalek hiziv, anv kêr a vo: An AOTROU a zo amañ.