Ezekiel 45 - Bibl Koad 21: Ar Bibl e Brezhoneg evit ar Vretoned

Pennad 45

¹ Pa rannot dre ar sord ar vro evel hêrezh, e savot evel ur prof d'an AOTROU, ul lodenn eus ar vro a vo santel: pemp mil warn-ugent ilinad a hirder, ha dek mil a ledander. Santel e vo en hec'h holl astennidigezh.

² Enni e vo evit ar santual ur c'harrez a bemp kant war bemp kant, hag ur pennad frank tro-dro a hanter-kant ilinad.

³ Diwar ar muzulioù-mañ, e vuzuilhi un hirder a bemp mil warn-ugent hag ul ledander a dek mil, hag eno e vo ar santual hag al lec'h santel-meurbet.

⁴ Homañ a vo lodenn santel ar vro evit an aberzhourien, bez' e vo da servijerien ar santual, a dosta ouzh an AOTROU evit servijañ anezhañ. Ul lec'h e vo evit o ziez, hag ul lec'h santel evit ar santual.

⁵ Ar pemp mil warn-ugent a hirder war zek mil a ledander a vo d'al Levited a ra servij an ti, evel o dalc'h, gant ugent kambr.

⁶ Hag e kemerot evel domani-kêr pemp mil a ledander war bemp mil warn-ugent a hirder, a-hed al lodenn santel savet. Evit holl di Israel e vo.

⁷ Evit ar priñs e virot ul lodenn, ouzh an daou du eus al lodenn santel savet hag eus an domani-kêr, a-dal d'al lodenn santel savet ha d'an domani-kêr, ouzh tu ar c'huzh-heol etrezek ar c'huzh-heol, ouzh tu ar sav-heol etrezek ar sav-heol, war un hirder a-geñver da unan eus al lodennoù, adalek harz ar c'huzh-heol betek harz ar sav-heol.

⁸ E zouar e vo, e berzh en Israel, ha va friñsed ne waskint ken va fobl. Hag e lezint ar vro da di Israel, hervez e veuriadoù.

⁹ Evel-henn e komz an Aotrou AOTROU: Priñsed Israel, a-walc'h! Lamit kuit an taerder hag ar skraperezh, grit hervez ar barnedigezhioù hag ar reizhder, tennit ho preizherezh diwar va fobl, eme an Aotrou AOTROU.

¹⁰ Ra vo reizh ar valañs, ha ra vo reizh an efa, reizh ar bat.

¹¹ An efa hag ar bat o devo an hevelep muzul: ar bat a zalc'ho un dekvedenn eus un homer, hag an efa un dekvedenn eus un homer; diouzh an homer e vo o muzul.

¹² Ar sikl a vo ugent gera, hag ar vinenn a vo evidoc'h ugent sikl, pemp sikl warn-ugent ha pemzek sikl.

¹³ Setu amañ ar prof savet a ginnigot: ur c'hwec'hvedenn eus un efa dre homer ed, hag ur c'hwec'hvedenn eus un efa dre homer heiz.

¹⁴ Ha setu ar reolenn evit an eoul, evit ur bat a eoul: un dekvedenn eus ur bat dre bep kor, a zo dek bat pe un homer, rak dek bat a ra un homer.

¹⁵ Hag un oan eus an tropell diwar daou c'hant, eus peurvanoù druz Israel, evit un donezon, evit ul loskaberzh, hag evit un aberzh a drugarekadennoù, d'ober dic'haou evito, eme an Aotrou AOTROU.

¹⁶ Holl bobl ar vro a vo rediet d'ar prof savet-se evit priñs Israel.

¹⁷ Met ret e vo d'ar priñs da reiñ al loskaberzhoù, an donezonoù, an evadkinnigoù, evit al lidoù, al loarioù nevez, an deizioù sabad, evit holl c'houelioù ti Israel. Kinnig a raio an aberzh-dic'haouiñ, an donezon, al loskaberzh hag an aberzh a drugarekadennoù, d'ober dic'haou evit ti Israel.

¹⁸ Evel-henn e komz an Aotrou AOTROU: D'ar c'hentañ miz, d'ar c'hentañ deiz eus ar miz, e kemeri ur c'hole yaouank disi, evit glanaat ar santual.

¹⁹ An aberzhour a gemero eus gwad an aberzh-dic'haouiñ, hag en lakaio war bostoù an ti, war bevar c'horn framm an aoter, ha war bostoù dor al leurenn diabarzh.

²⁰ Ober a ri er memes doare d'ar seizhvet deiz eus ar miz, evit ar re o devo pec'het diratozh pe dre zievezh. Evel-se e ri dic'haou evit an ti.

²¹ D'ar c'hentañ miz, d'ar pevarzekvet deiz eus ar miz, e vo ar Pask: Ar gouel a bado seizh devezh, hag e vo debret bara hep goell.

²² En deiz-se, ar priñs a ginnigo evitañ hag evit holl bobl ar vro ur c'hole evel aberzh-dic'haouiñ.

²³ E-pad ar seizh devezh eus ar gouel-mañ, e kinnigo evel loskaberzh d'an AOTROU seizh kole ha seizh tourz, disi, bemdez, e-pad ar seizh devezh, hag ivez ur menn-gavr, bemdez, evel aberzh-dic'haouiñ.

²⁴ Hag e kinnigo evel donezon un efa a vleud dre gole, un efa dre dourz, hag un hin a eoul dre efa.

²⁵ D'ar seizhvet miz, d'ar pemzekvet deiz eus ar miz, d'ar gouel, e kinnigo e-pad seizh deiz an hevelep traoù, diwar-benn an aberzh-dic'haouiñ, diwar-benn al loskaberzh, diwar-benn an donezon, ha diwar-benn an eoul.