Ezekiel 29 - Bibl Koad 21: Ar Bibl e Brezhoneg evit ar Vretoned

Pennad 29

¹ D'an dekvet bloaz, d'an dekvet miz, d'an daouzekvet eus ar miz, komz an AOTROU a voe disklêriet din o lavarout:

² Mab an den, tro da zremm ouzh Faraon roue an Ejipt, hag e profedi a-enep dezhañ hag a-enep an Ejipt a-bezh.

³ Komz ha lavar: Evel-henn e komz an Aotrou AOTROU: Setu em eus droug ouzhit Faraon roue an Ejipt, krokodil bras gourvezet e-kreiz da stêrioù, hag a lavar: Va stêr a zo din, me am eus graet anezhi.

⁴ Lakaat a rin ur c'hrog ouzh da javed, hag e stagin pesked da stêrioù ouzh da skant. Me a denno ac'hanout a-greiz da stêrioù, gant holl besked da stêrioù staget ouzh da skant.

⁵ Da deurel a rin d'ar gouelec'h, te hag holl besked da stêrioù, hag e kouezhi war c'horre ar maezioù; ne vi na dastumet na tapet, roet e vi e peuriñ da loened an douar ha da laboused an neñv.

⁶ Hag holl annezidi an Ejipt a ouezo ez on me an AOTROU, rak e vint bet nemet ur vazh korz evit ti Israel.

⁷ P'o deus kroget ennout gant an dorn, ez out torret hag ec'h eus roget dezho o skoaz a-bezh, ha pa'z int en em harpet warnout, ez out bruzunet hag ec'h eus lakaet o holl lounezhi difiñv.

⁸ Setu perak evel-henn e komz an Aotrou AOTROU: Setu, e lakain ar c'hleze da zont warnout, hag e tilamin eus da greiz tud ha loened.

⁹ Bro Ejipt a zeuio da vezañ ur glac'har hag ur rivin, hag e ouezint ez on me an AOTROU, rak lavaret en deus: Ar stêr a zo din, me am eus graet anezhi.

¹⁰ Setu perak em eus droug ouzhit hag ouzh da stêrioù, hag e lakain bro Ejipt da vezañ ur rivin bras hag ur glac'har, adalek Migdol betek Sien ha betek harzoù Kush.

¹¹ Troad den ne dremeno enni, ha troad loen ebet ne dremeno kennebeut, hag e-pad daou-ugent vloaz ne vo ket poblet.

¹² Lakaat a rin bro Ejipt da vezañ ur glac'har e-touez ar broioù glac'haret, he c'hêrioù a vo distro e-pad daou-ugent vloaz e-touez kêrioù rivinet. Hag e stlabezin an Ejipsianed e-mesk ar broadoù, hag o strewin e meur a vro.

¹³ Koulskoude evel-henn e komz an Aotrou AOTROU: A-benn daou-ugent vloaz e tastumin an Ejipsianed a-douez ar pobloù ma vint bet stlabezet enno,

¹⁴ hag e tegasin en-dro re zalc'het an Ejipt, hag e rin dezho mont en-dro da vro Batroz, en o bro c'henidik, met e vint eno ur rouantelezh dinerzh.

¹⁵ Hag e vo an izelañ eus ar rouantelezhioù, ne savo ken dreist ar broadoù, he dinerzhañ a rin evit na reno ken war ar broadoù.

¹⁶ Ne lakaio ken ti Israel e fiziañs enni, hag o devo soñj eus o direizhder pa droent etrezek enni. Hag e ouezint ez on me an Aotrou AOTROU.

¹⁷ D'ar seizhvet bloaz warn-ugent, d'ar c'hentañ miz, d'ar c'hentañ eus ar miz, komz an AOTROU a voe disklêriet din o lavarout:

¹⁸ Mab an den, Nebukadnezar roue Babilon en deus lakaet e armead d'ober ur servij poanius a-enep Tir. An holl bennoù a zo deuet da vezañ moal hag an holl divskoaz kignet; ha n'en deus bet gopr ebet eus Tir, nag eñ nag e armead, evit ar servij en deus graet a-enep dezhi.

¹⁹ Setu perak evel-henn e komz an Aotrou AOTROU: Setu e roan bro Ejipt da Nebukadnezar roue Babilon. Sevel a raio kuit hec'h engroez, hag e kaso gantañ ar preizh, hag e raio riñs; kement-se a vo gopr e armead.

²⁰ Evit paeañ al labour en deus graet a-enep Tir, e roan dezhañ bro Ejipt, rak oberiet o deus evidon, eme an Aotrou AOTROU.

²¹ En deiz-se e lakain ur c'horn da vountañ da di Israel, hag e tigorin dit da c'henoù en o zouez, hag e ouezint ez on me an AOTROU.