Ezekiel 27 - Bibl Koad 21: Ar Bibl e Brezhoneg evit ar Vretoned

Pennad 27

¹ Komz an AOTROU a voe disklêriet din o lavarout:

² Te, mab an den, displeg ur c'hlemmgan a-enep Tir,

³ ha lavar da Dir: Te, hag a zo o chom war vord ar mor, hag a ra kenwerzh gant ar pobloù eus inizi niverus, evel-henn e komz an Aotrou AOTROU: Tir, lavaret ec'h eus: Me a zo peurvat a gaerder!

⁴ Da harzoù a zo e kalon ar morioù, ar re o deus da savet o deus peurc'hraet da gaerder.

⁵ Graet o deus da lambruskoù gant siprez eus Senir, kemeret o deus sedrez eus al Liban evit ober da wernioù,

⁶ graet o deus da roeñvoù gant derv eus Basan, ha da c'horre-bourzh gant olifant sterniet e beuz eus inizi Kittim.

⁷ Lin fin eus an Ejipt gant broderezh en deus servijet dit da ouelioù ha da vanniel, gwisket ec'h eus dilhad limestra ha tane eus inizi Elisha.

⁸ Tud eus Sidon hag Arvad a zo bet da roeñverien. O Tir, ar re ijinusañ en da greiz a zo bet da sturien.

⁹ Henaourien eus Gebal hag he micherourien ijinus a zo bet en da greiz evit dresañ da freuzoù. Holl listri ar mor hag o martoloded a zo bet en da greiz evit ober kenwerzh gant da varc’hadourezh.

¹⁰ Tud eus Persia, Lud ha Pud a zo bet ez armead evel soudarded; ispilhet o deus en da di ar skoed hag an tokarn, splannder o deus roet dit.

¹¹ Mibien Arvad a zo bet gant da soudarded war da vogerioù tro-dro, ha tud kadarn a zo bet en da dourioù, ispilhet o deus ar skoed war da vogerioù tro-dro, peurc'hraet o deus da gaerder.

¹² Tarsiz he deus graet kenwerzh ganit en abeg da'z pinvidigezhioù a bep seurt, o pourvezañ da varc'hadoù gant arc'hant, houarn, staen ha plom.

¹³ Javan, Tubal ha Meshek a zo bet da varc'hadourien, oc'h eskemm sklaved ha listri arem ouzh da varc'hadourezh.

¹⁴ Tud eus ti Togarma o deus pourvezet da varc'hadoù gant kezeg-tenn, kezeg-brezel ha muled.

¹⁵ Mibien Zedan a zo bet da varc'hadourien; kenwerzh gant inizi niverus a zo bet etre da zaouarn, hag ec'h eus resevet en donezon kerniel olifant hag ebena.

¹⁶ Siria he deus graet kenwerzh ganit en abeg da fonnusted da draoù; pourvezet he deus da varc'hadoù gant emrodez, tane, broderezh, lin fin, koural ha rubiz.

¹⁷ Juda ha bro Israel a zo bet da varc'hadourien, oc'h eskemm gwinizh eus Minnid, pastezerezh, mel, eoul ha balzam ouzh da varc'hadourezh.

¹⁸ Damask he deus graet kenwerzh ganit en abeg da fonnusted da draoù ha da'z pinvidigezhioù a bep seurt, o reiñ dit gwin eus Helbon ha gloan gwenn.

¹⁹ Ha Dan ha Javan, adalek Uzal, o deus pourvezet da varc'hadoù gant houarn-goveliañ, spisoù ha raoskl.

²⁰ Dedan a zo bet da varc'hadourien e mezheroù prizius evit pignat war varc'h.

²¹ Arabia hag holl briñsed Kedar o deus graet kenwerzh etre da zaouarn o werzhañ dit deñved, meot ha bouc'hed.

²² Marc'hadourien Seba ha Raema a zo bet da varc'hadourien, o pourvezañ da varc'hadoù gant gwellañ louzoù-frondus, mein prizius a bep seurt hag aour.

²³ Haran, Kanne hag Eden, gant marc'hadourien Seba, Asiria ha Kilmad a zo bet da varc'hadourien.

²⁴ Da varc'hadourien int bet e traoù eus an dibab, e dilhad limestra, e broderezh, e mezheroù prizius lakaet e koufroù ereet gant kerdin ha graet gant koad sedrez, degaset war da varc'hadoù.

²⁵ Listri Tarsiz o deus mordoet evit da genwerzh. Leuniet out bet, e barr da vrud ez out bet e kalon ar morioù.

²⁶ Da roeñverien o deus da gaset war an doureier bras. Avel ar sav-heol en deus freuzet ac'hanout e kalon ar morioù.

²⁷ Da binvidigezhioù, da varc'hadoù, da genwerzh, da vartoloded, da sturierien, da zreserien-freuz, merourien da genwerzh, da holl dud a vrezel a oa du-se, an holl engroez a oa en da greiz, a gouezho e kalon ar morioù en devezh da lamm.

²⁸ Gant trouz kriadenn da sturien, e kreno an douaroù tro-dro.

²⁹ An holl re a embreg ar roeñv, ar vartoloded hag holl sturierien ar mor a ziskenno eus o listri hag en em zalc'ho war an douar,

³⁰ hag e lakaint o mouezh da vezañ klevet warnout, hag e c'harmint c'hwerv, hag e taolint poultr war o fenn, hag en em ruilhint el ludu,

³¹ hag e touzint o fenn en abeg dit, hag en em c'hourizint a seier, hag e ouelint warnout gant c'hwervoni en o ene, ha gant ur glac'har bras,

³² hag e tisplegint ur c'hlemmgan warnout en ur hirvoudiñ, hag e klemmint diwar da benn: Piv a voe evel Tir, didrouz e-kreiz ar mor?

³³ Pa'z ae en tu all d'ar morioù da varc’hadourezh, ec'h eus leuniet pobloù niverus, dre vrasted da binvidigezhioù ha da genwerzh ec'h eus pinvidikaet rouaned an douar,

³⁴ ha bremañ ez out freuzet dre ar morioù, e donder an doureier, da varc’hadourezh ha da holl engroez a zo kouezhet ganit.

³⁵ Holl dud an inizi a zo spouronet en abeg dit, o rouaned a zo spontet euzhus, o dremmoù a zo trejeboulet.

³⁶ Marc'hadourien ar pobloù a c'hwitell warnout, deuet out da vezañ ur saouzan, ha ne vi ken, biken!