Ezekiel 23 - Bibl Koad 21: Ar Bibl e Brezhoneg evit ar Vretoned

Pennad 23

¹ Komz an AOTROU a voe disklêriet din o lavarout:

² Mab an den, bez' e oa div vaouez, merc'hed d'an hevelep mamm.

³ Gastaouiñ a rejont en Ejipt, gastaouiñ a rejont en o yaouankiz, o divronn a voe gwasket, askre o gwerc’hded a voe tarzhet.

⁴ An hini henañ a oa anvet Ohola, hag he c'hoar Oholiba. Din e oant, hag e c'hanjont mibien ha merc'hed. An hini anvet Ohola eo Samaria, hag Oholiba eo Jeruzalem.

⁵ Ohola a gastaouas, ha koulskoude e oa din, hag e karas hec'h amourouzien, hec'h amezeien asiriat

⁶ gwisket a limestra, gouarnerien ha pennoù-bras, tud yaouank kaer holl anezho, marc'hegerien pignet war gezeg-red.

⁷ Koufonet he deus he gastaouerezh dezho, d'an dibab eus mibien Asiria, ha d'an holl re he deus karet, en em saotret he deus gant o holl idoloù.

⁸ N'he deus ket dilezet he gastaouerezh eus an Ejipt, pa o doa kousket ganti en he yaouankiz, tarzhet o doa askre he gwerc’hded ha skuilhet o hudurnez warni.

⁹ Setu perak em eus he lakaet etre daouarn hec'h amourouzien, etre daouarn mibien Asiria ma kare.

¹⁰ Dizoloet o deus he noazhder, tapet o deus he mibien hag he merc'hed, he lakaet o deus da vervel dre ar c'hleze. Deuet eo da vezañ brudet e-touez ar maouezed, goude ar barnedigezhioù graet warni.

¹¹ He c'hoar Oholiba a welas kement-se, ha gwashoc'h e voe egeti, en ur ober muioc'h a c'hastaouerezh eget he c'hoar en he riboderezh.

¹² Karout a reas mibien eus Asiria, gouarnerien ha pennoù-bras, hec'h amezeien gwisket kaer, marc'hegerien pignet war gezeg-red, tud yaouank kaer holl anezho.

¹³ Hag e welis he doa en em saotret, ha ma heulient o-daou an hevelep hent.

¹⁴ Mont a reas ouzhpenn en he gastaouerezh, rak, en ur welout skeudennoù tud war ar voger, skeudennoù eus ar Galdeiz livet e ruz,

¹⁵ o tougen gourizoù war o divgroazell, tulbanoù neuennus war o fenn, gant doare renerien evel mibien Vabilon ganet e Kaldea,

¹⁶ ec'h orgedas outo adalek sell kentañ he daoulagad, hag e kasas kannaded dezho da Galdea.

¹⁷ Mibien Vabilon a zo deuet d'he c'havout da c'hourvez hec'h orged, ha saotret o deus anezhi gant o gastaouerezh. Hi en em saotras ganto, hag e tistagas hec'h ene diouto.

¹⁸ Evel-se e tizoloas he gastaouerezh hag e tizoloas he noazhder. Hag e tistagas va ene diouti, evel m'en doa distaget va ene diouzh he c'hoar.

¹⁹ Rak liesaet he deus he gastaouerezh, o soñjal en deizioù he yaouankiz, pa c'hastaoue e bro Ejipt.

²⁰ Hag ec'h orgedas ouzh hec'h amourouzien, ma oa o c'hig evel kig ezen hag o darempredoù evel darempredoù gant mirc'hi.

²¹ Distroet out da fallagriezh da yaouankiz, pa darzhe an Ejipsianed askre da werc’hded evit divronn da yaouankiz.

²² Setu perak, Oholiba, evel-henn e komz an Aotrou AOTROU: Setu e savan da amourouzien a-enep dit, ar re en deus distaget da ene diouto, hag e tegasin anezho a bep tu a-enep dit,

²³ mibien Vabilon hag an holl Galdeiz, Pekod, Shoa, Koa hag an Asiriz ganto, tud yaouank kaer holl anezho, gouarnourien ha pennoù-bras, aotrounez ha tud vrudet, pignet war gezeg-red holl anezho.

²⁴ Dont a raint a-enep dit, gant armoù, kirri hag ijinoù-ruilh, ha pobloù e niver bras, hag e lakaint a-enep dit a bep tu skoedoù bras, skoedoù bihan ha tokarnoù. Hag e roin dezho ar varnedigezh, hag e varnint ac'hanout hervez o barnedigezhioù.

²⁵ Hag e lakain va gwarizi a-enep dit, hag e raint dit gant fulor. Troc'hañ a raint dit da fri ha da zivskouarn, hag ar pezh vano ac'hanout a gouezho dre ar c'hleze, tapout a raint da vibien ha da verc'hed, hag ar pezh a vano ac'hanout a vo pulluc'het gant an tan.

²⁶ Diwiskañ a raint da zilhad dit, hag e lamint kuit da vragerizoù a lakaez.

²⁷ Hag e rin paouez da zrougiezh a-ziouzhit ha da c'hastaouerezh eus bro Ejipt, ne savi ken da zaoulagad war-zu enno, ha na'z po ken soñj eus an Ejipt.

²⁸ Rak evel-henn e komz an Aotrou AOTROU: Setu e lakain ac'hanout etre daouarn ar re a gasaez, etre daouarn ar re en deus distaget da ene diouto.

²⁹ Ober a raint ouzhit gant kasoni, tapout a raint frouezh da labour, hag e tilezint ac'hanout en noazh, noazh-bev. Dizoloet e vo noazhder da avoultriezh, da dorfedoù ha da c'hastaouerezh.

³⁰ Graet e vo an traoù-se dit dre ma ec'h eus gastaouet e-kichen ar broadoù, dre ma ec'h eus en em saotret gant o idoloù.

³¹ Kerzhet ec'h eus war hent da c'hoar, setu perak e lakain hec'h hanaf en da zorn.

³² Evel-henn e komz an Aotrou AOTROU: Evañ a ri hanaf da c'hoar, don ha ledan e vo, bez' e vi un dra vezhus hag ur c'hoapadenn, ha bras eo e endalc'had.

³³ Leuniet e vi a vezventi hag a c'hlac'har dre hanaf an distruj hag ar rivin, a zo hanaf da c'hoar Samaria.

³⁴ Evañ a ri anezhañ, hag en goullonderi. Krignat a ri an tammoù outañ, hag e rogi da zivronn, rak komzet em eus, eme an Aotrou AOTROU.

³⁵ Setu perak evel-henn e komz an Aotrou AOTROU: Peogwir ec'h eus va ankounac'haet ha va zaolet a-drek da gein, doug te ivez ar boan eus da zrougiezh hag eus da c'hastaouerezh.

³⁶ An AOTROU a lavaras din: Mab an den, ha ne varni ket Ohola hag Oholiba? Disklêr dezho o euzhusterioù,

³⁷ penaos o deus graet avoultrerez hag ez eus gwad war o daouarn; ya, graet o deus avoultrerez gant o idoloù, ha zoken lakaet o deus o mibien da dremen dre an tan, ar re o doa ganet din, evit o debriñ.

³⁸ Setu amañ ar pezh o deus graet c'hoazh din: En un hevelep deiz o deus saotret va santual ha disakret va deizioù sabad.

³⁹ Goude bezañ aberzhet o mibien d'o idoloù, en hevelep deiz ez int aet da'm santual evit e zisakrañ; setu ar pezh o deus graet e-kreiz va zi.

⁴⁰ Hag ouzhpenn-se, kaset o deus da gerc'hat tud o tont eus ur vro bell, kaset o deus kannaded dezho, ha setu, deuet int. Evito ec'h eus en em walc'het, livet da zremm ha kinklet gant bragerizoù,

⁴¹ azezet ec'h eus war ur gwele pompadus, ma oa kempennet un daol dirazañ, ha lakaet ec'h eus va ezañs ha va eoul warni.

⁴² Eno e veze klevet trouz un engroez laouen, hag e-touez ar bern tud-mañ e voe degaset Sabeaned eus ar gouelec'h, o deus lakaet kelc'hennoù ouzh o daouarn ha kurunennoù kaer war o fennoù.

⁴³ Ha lavaret em eus diwar-benn an hini koshaet gant an avoultriezh: Hag e talc'hint bremañ da c'hastaouiñ ganti, hag hi ganto?

⁴⁴ Hag e teujont d'he c'havout, evel ma'z eer da gavout ur c'hast; evel-se ez ejont da gavout Ohola hag Oholiba, maouezed leun a zrougiezh.

⁴⁵ Met tud reizh o barno, evel ma vez barnet avoultrerezed hag evel ma vez barnet ae re a skuilh gwad, rak avoultrerezed ez int ha gwad a zo war o daouarn.

⁴⁶ Setu perak evel-henn e komz an Aotrou AOTROU: Me a lakaio ur strollad da bignat a-enep dezho, hag e vint roet d'an dismegañs ha d'ar preizherezh.

⁴⁷ Hag ar strollad-mañ a veinataio anezho gant mein, hag o drailho a dammoù gant ar c'hleze; lazhañ a raint o mibien hag o merc'hed, hag e tevint o ziez dre an tan.

⁴⁸ Hag e rin paouez an drougiezh er vro, hag an holl vaouezed a vo desket tremen hep heñvelout ouzh o drougiezh.

⁴⁹ Lakaet e vo ho trougiezh da gouezhañ warnoc'h, dougen a reot pec'hedoù hoc'h idoloù, hag e ouiot ez on me an AOTROU.